Lukha 17

₁Jesu watsi kubafundzi bakhe: “Tilingo tetono kufanele kutsi tenteke; kodvwa maye kulowo letita ngaye! ₂Bekuyawuba ncono kutsi kuboshelwe litje entsanyeni yakhe, bese ujikijelwa elwandle, kunekutsi ente nome munye walaba labancane kutsi one. ₃Caphelani! Nangabe umnakenu ona, mekhute, nangabe uyaphendvuka, mtsetselele.

₄“Nangabe akona emahlandla lasikhombisa ngelilanga linye solomane atsi kuwe: ‘Ngiyacolisa,’ kufanele umtsetselele.”

₅Baphostoli base batsi eNkhosini: “Yandzisa kukholwa kwetfu.”

₆INkhosi yabaphendvula yatsi: “Kube beningaba nekukholwa lokungangenhlavu yendlulamitsi, beningatsi kulesihlahla: ‘Dzephuneka uyewumila elwandle!’ Besiyawunilalela.”

₇“Ase ngitsi lomunye wenu unesisebenti lesilimako nome leselusa tinkhomo nome timvu. Nase sibuya ensimini angasho yini kuso kutsi: ‘Hlala phansi kucala udle naku kudla’? ₈Cha! Esikhundleni saloko angatsi kuso: ‘Faka sidziya sakho, ungilungisele kudla kwami, unginike ngidle nginatse; emvakwaloko-ke nawe utawuhlala phansi udle unatse.’ ₉Uyasibonga yini sisebenti lesisuke sente loko lebesifanele sikwente? ₁₀Kanjalo-ke nani nanente konkhe lenitjelwe kutsi nikwente, nibotsi: ‘Sitisebenti letingakafaneli kubongwa, ngobe sente lebesifanele kutsi sikwente.’ ”

₁₁Endleleni Jesu asaya eJerusalema wendlula emkhatsini weSamariya neGalile. ₁₂Asangena emtini wahlangabetwa ngemadvodza labelishumi labephetfwe bulephelo ema bucadlwana naye, ₁₃amemeta atsi: “Nkhosi Jesu, sihawukele.”

₁₄Watsi nakawabona Jesu, watsi: “Hambani nitibonakalise kubaphristi.”

Nangempela atsi asahamba, bulephelo bahhohloka. ₁₅Lenye yatsi kube ibone kutsi seyiphilile, yancandzeka idvumisa Nkulunkulu ngelivi lelikhulu. ₁₆Yefika yatilahla phansi etinyaweni taJesu imbonga. Yona-ke beyingumSamariya. ₁₇Jesu watsi: “Beningesilo yini lishumi ekuphilisweni kwenu? Baphi labayimfica? ₁₈Akatfolakalanga namunye yini, lowabuyela emuva weta kutawubonga Nkulunkulu ngaphandle kwalomchamuki?”

₁₉Wase utsi kuye: “Sukuma uhambe; kukholwa kwakho kukusindzisile.”

₂₀Labanye baFarisi babuta Jesu batsi: “Umbuso waNkulunkulu uyawufika nini?” Wabaphendvula watsi: “Umbuso waNkulunkulu awuti ngendlela lebonakalako. ₂₁Kute loyawutsi: ‘Ase nibuke nankhu!’ nome: ‘Nankhuya!’ Ngobe umbuso waNkulunkulu ukini.”

₂₂Wase utsi kubafundzi bakhe: “Siyeta sikhatsi lapho niyawufisa shangatsi ningabona linye nje lemalanga eNdvodzana yeMuntfu, kodvwa ningeke nilibone. ₂₃Bayawuba khona labayawutsi kini: ‘Ase nibuke lapha!’ nome batsi: ‘Ase nibuke naku!’ Kodvwa ningayi, ningabalandzeli. ₂₄Njengembane ubaneka uvundla kabili esibhakabhakeni, iyawuba njalo neNdvodzana yeMuntfu ngelilanga layo. ₂₅Kodvwa kwekucala ifanele ihlupheke kakhulu ilahlwe bantfu balesitukulwane.

₂₆“Njengobe kwakunjalo ngemalanga aNowa, kuyawuba njalo nangemalanga eNdvodzana yeMuntfu. ₂₇Bonkhe bantfu bebadla, banatsa, bateka bafati, bendziswa, kwaze kwaba lilanga Nowa langena ngalo emkhunjini lana zamcolo wababulala bonkhe. ₂₈Kuyawuba njengesikhatsi saLoti; bebadla, banatsa, batsenga, batsengisa, balima, bakha tindlu. ₂₉Mhlazana Loti esuka eSodoma, umlilo nesibabule kwana kuphuma ezulwini, kwababulala bonkhe. ₃₀Kuyawuba njalo nangelilanga leyiyakwembulwa ngalo iNdvodzana yeMuntfu.

₃₁“Umuntfu loyawube asetikwendlu yakhe ngalelo langa, angehli kuyawutsatsa timphahla takhe endlini, kanjalo futsi nemuntfu losensimini, angabuyeli emuva. ₃₂Khumbulani umkaLoti. ₃₃Umuntfu lowetama kusindzisa imphilo yakhe, uyawulahlekelwa ngiyo. Kodvwa umuntfu lolahlekelwa yimphilo yakhe, uyawuyisindzisa. ₃₄Nginitjela kutsi: Kulobo busuku bantfu bayawube balele bababili embhedzeni munye; lomunye uyawutsatfwa, lomunye asale ngemuva. ₃₅Bafati lababili bayawube bagaya ndzawonye; lomunye uyawutsatfwa, lomunye asale ngemuva. [ ₃₆Emadvodza lamabili ayawube asensimini; lenye iyakutsatfwa, lenye isale ngemuva.]”

₃₇Bafundzi bambuta batsi: “Kuphi, Nkhosi?”

Jesu wabaphendvula watsi: “Lapho kunesidvumbu khona, nemangce ahlangana khona.”