Lukha 8

₁Emvakwesikhatsi Jesu wahamba wadzabula emadolobha nemadolobhana ashumayela liVangeli ngembuso waNkulunkulu. Bafundzi bakhe labali-12 babehamba naye, ₂kanye nalabanye bafati lababephiliswe emadimonini nasetifeni: Mariya waseMagdala lebekukhishwe kuye emadimoni labesikhombisa, ₃Jwana umkaKhuza, indvuna yesigodlo saHerodi, naSusana, nalabanye labanyenti bafati lababekhonta Jesu nebafundzi bakhe ngaloko lababenako.

₄Kwatsi lapho bantfu labanyenti sebabutsene bachamuka emadolobheni lehlukene, Jesu wase ubatjela nankhu umfanekiso lotsi:

₅“Umhlanyeli waphuma wayawuhlanyela inhlanyelo yakhe. Ekuhlanyeleni kwakhe lenye inhlanyelo yakhe yawela endleleni, lapho yanyatselwa khona bantfu, kwafika netinyoni tayidla. ₆Lenye yawela emhlabatsini losemadvwaleni, yashesha yamila, kodvwa yashesha yaphelelwa ngemandla yabuna, ngobe yayingenawo umhlabatsi lonemswakama. ₇Lenye yawela emanyeveni, yakhula kanye nawo, ase ayayiminyetela. ₈Lenye yawela emhlabatsini lovundzile, yamila, yatsela ngemakhulu.”

Jesu wase utsi-ke: “Lonendlebe yekuva akeve!”

₉Bafundzi baJesu bambuta kutsi usho kutsini lomfanekiso. ₁₀Wabatjela watsi: “Nine niphiwe lwati lwetimfihlakalo tembuso waNkulunkulu, kodvwa kulabanye kushunyayelwa ngemifanekiso, kuze batsi bayabona kodvwa bangabonisisi, batsi bayeva kantsi abevisisi kahle.”

₁₁“Lomfanekiso uchaza loku: Inhlanyelo livi laNkulunkulu. ₁₂Kuhlanyelwa kwaleyo leyawela endleleni kufanekisa labo labalivako livi laNkulunkulu bese kufika Sathane uyalisusa etinhlitiyweni tabo, kuze bangakholwa funa basindziswe. ₁₃Kuhlanyelwa kwaleyo leyawela emhlabatsini losemadvwaleni kufanekisa labo labatsi nabalivako livi laNkulunkulu balemukele ngekutfokota, kodvwa ngenca yekungalijulisi kwabo etinhlitiyweni tabo, bakholwa sikhashana. Kutsi kungefika kulingwa, bese balilahla phansi. ₁₄Kuhlanyelwa kwaleyo leyawela emhlabatsini losemanyeveni kusho labo labatsi sebalivile livi laNkulunkulu, kodvwa tinhlupheko nebunjinga, netinjabulo talomhlaba kubaminyetele batsele titselo letingavutfwa. ₁₅Kuhlanyelwa kwaleyo leyawela emhlabatsini lovundzile kufanekisa labo labalivako livi laNkulunkulu baligcine ngekutitfoba lokukhulu babeketele, baze batsele titselo letihle.”

₁₆“Kute umuntfu longakhanyisa sibane, bese usimbonya ngesitja nome asibeke phansi kwembhedze. Esikhundleni saloko usibeka etikwelitafula, kuze kutsi labangenako bakubone lokukhanya.

₁₇“Konkhe lokufihlakele kuyawuvetwa ebaleni. Nalokufihliwe kuyawubonakaliswa ekukhanyeni.

₁₈“Caphelani-ke kutsi niva njani; ngobe lonako uyakwengetelwa, kodvwa longenalutfo uyakwemukwa naloko lokungatsi unako.”

₁₉Unina nabomnakaboJesu beta kuye, kodvwa behluleka kusondzela madvutane naye, ngobe bantfu bebaminyetelene kakhulu. ₂₀Bamtjela Jesu batsi: “Unyoko nabomnakenu beme la ngephandle, bacela kukubona.”

₂₁Kodvwa yena watsi: “Make nabomnaketfu ngulabo labeva livi laNkulunkulu balente.”

₂₂Ngalelinye lilanga Jesu nebafundzi bakhe bakhwela esikebheni, wase utsi kubo: “Asambeni sewelele ngesheya kwalolwandle.” Nembala bentjweza, ₂₃yena wase uyalala. Kwase kufika sivunguvungu sihhusha la elwandle, kwaze kwangena nemanti esikebheni, ngako babasengotini. ₂₄Baya kuye bafike bamvusa batsi: “Mfundzisi, Mfundzisi, sesiyafa!”

Waphaphama wase uyasikhalimela lesivunguvungu nemagagasi; kwabindza, kwaba khona kuthula.

₂₅Wase utsi kubo: “Kuphi kukholwa kwenu?”

Besaba bamangala, badzimate bakhulumisana bodvwana batsi: “Ngubani kantsi lona, ngobe ukhalimela umoya nemanti kumlalele?”

₂₆Bahamba ngesikebhe bewelela eveni laseGegesa ngesheya kweLwandle lwaseGalile. ₂₇Nakehlela elusentseni lwemanti, Jesu wahlangana nendvodza leyayiphume edolobheni. Yayinemadimoni. Kwase kusikhatsi lesidze ihamba ngcunu lendvodza ingasahlali nekhaya, seyihlala emadlizeni. ₂₈Yatsi nayibona Jesu, yakhala kakhulu, yaze yatilahla embikwakhe, yatsi: “Jesu, Ndvodzana yaNkulunkulu Losetikwako Konkhe! Ufunani kimi? Ngiyakuncenga ngitsi ungangihluphi.”

₂₉Yayisho loko nje, ngobe Jesu abesawekhutile lomoya lomubi kutsi awuphume kuyo. Lomoya wase uyibambe kanyenti kwale nome seyibanjwe njengesiboshwa, yaboshwa tandla netinyawo ngetinketane. Yayitidzabula itilahle le, lelidimoni liyihambise iyewuhlala etsafeni.

₃₀Jesu wayibuta watsi: “Ungubani libito lakho?”

Lendvodza yamphendvula yatsi: “Sibanyenti,” ngobe yayingenwe ngemadimoni lamanyenti. ₃₁Emadimoni abese ancenga Jesu kutsi amane angawatfumeli emgodzini longenamkhawulo.

₃₂Kwakunetingulube letinyenti edvute, tidla eceleni lentsaba. Emadimoni amncenga Jesu kutsi amane awavumele angene etingulubeni; wawavumela. ₃₃Aphuma-ke emadimoni kulendvodza angena etingulubeni; tonkhe tingulube tesuka ngematubane tewusa sihosha taye tatitsela ekhatsi eLwandle lwaseGalile, tacwila tonkhe tafa.

₃₄Lamadvodza labeluse letingulube akubona loko lokwakwentekile, ase ayagijima ahamba atifafata edolobheni nasemitini letindzaba. ₃₅Bantfu baphuma sebayawubona lokwasekwentekile. Batsi beta kuJesu, bakhandza lomuntfu labenemadimoni ahleti ngasetinyaweni taJesu, embetse kahle, nemcondvo wakhe sewusangulukile; bonkhe bantfu besaba. ₃₆Base bayabachazela labo bebabonile kutsi kwenteke njani nekutsi lomuntfu uphile kanjani. ₃₇Sonkhe lesicumbi sebantfu baseGegesa samcela Jesu kutsi sale esuka kuleyo ndzawo, ngobe bonkhe befikelwa kwesaba lokukhulu. Ngako-ke Jesu wase ukhwela esikebheni, wahamba.

₃₈Lendvodza lekwakukhishwe kuyo emadimoni yancusa Jesu yatsi: “Ngicela ngisale sengihamba nawe.”

Kodvwa Jesu wamhambisa watsi: ₃₉“Buyela ekhaya ubatjele ngaloko Nkulunkulu lakwentele kona.”

Lendvodza yahamba kuso sonkhe leso sigodzi, ihamba ilandzisa bantfu ngaloko Nkulunkulu labesayentele kona.

₄₀Sicuku sebantfu samhlangabeta Jesu nasabuya, ngobe bonkhe babelindzele yena. ₄₁Kwase kufika indvodza, libito layo kunguJayiru, siphatsimandla selisinagoge. Yatijika etinyaweni taJesu yamncenga kutsi aye ekhaya layo, ₄₂ngobe lesidzandzane sayo lekwakukuphela kwaso, sineminyaka leli-12, sasigulela kufa.

Watsi Jesu asahamba, bantfu bamkaka ngala nangala.

₄₃Umfati labesagule iminyaka leli-12 opha asacedze imali yakhe yonkhe aya etinyangeni, setehluleke tonkhe, ₄₄wasondzela emvakwaJesu; wafike watsintsa umphetfo wengubo yaJesu, kopha kwaphela khona lapho konkhe swe! ₄₅Jesu wabuta watsi: “Ngubani longitsintsile?”

Bonkhe batilandvula, kodvwa Phetro watsi: “Mfundzisi, kufanele, ngobe bantfu banyenti labakukakile nalabakuminyetele!”

₄₆Kodvwa Jesu watsi: “Kukhona longiphatsile! Ngiyeva kutsi kukhona emandla laphumile kimi.”

₄₇Lomfati asabonile kutsi abengeke asatifihla, wase uyativeta kuJesu watilahla phansi embikwakhe asachachatela luvalo, watilandza kuye embikwebantfu bonkhe, kutsi umphatseleni nekutsi sewuphile masinyane kangakanani. ₄₈Jesu watsi kuye: “Ndvodzakati, kukholwa kwakho kukusindzisile; hamba ngekuthula.”

₄₉Watsi asakhuluma Jesu, kwachamuka sigijimi site kulesiphatsimandla lesasinguJayiru, safike satsi: “Indvodzakati yakho seyifile, sale ungabe usamhlupha uMfundzisi.”

₅₀Kepha Jesu nakuva loko, watsi kuJayiru: “Ungesabi wena, kholwa nje kuphela; itawuphila.”

₅₁Lapho Jesu efika ekhaya wabalela kutsi bangene bonkhe ngaphandle kwaPhetro, naJohane, naJakobe, neyise wemntfwana kanye nenina. ₅₂Bonkhe bantfu bebakhala badzindza sililo, kodvwa Jesu watsi: “Ningakhali, ngobe akafi, ulele nje.”

₅₃Bamane bamhleka bulima nje, ngobe besebati kutsi sewufile. ₅₄Kodvwa Jesu wambamba ngesandla watsi kuye: “Ntfombatane! Vuka!”

₅₅Umphefumulo wabuya, umntfwana wavuka masinyane. Jesu watsi abamuphe lokudliwako adle. ₅₆Batali bakhe bamangala kakhulu. Kepha Jesu wabadvonsa ngendlebe kutsi bangatjeli muntfu ngaloko lokwakwentekile.