Lukha 9

₁Jesu wabita bafundzi bakhe labali-12 watsi abasondzele kuye; wase ubanika emandla, neligunya lekukhipha emadimoni nekuphilisa labanetifo. ₂Wase uyabatfuma kutsi bayewushumayela umbuso waNkulunkulu baphilise nalabagulako.

₃Watsi kubo: “Ningaphatsi lutfo lwalendlela, ningaphatsi naludvondvolo lwekudvondvolotela, nemgodla wetihambi, nekudla, nemali, ngisho nemphahla yekuntjintja. ₄Lapho banemukela khona, hlalani kulelo khaya nize nihambe kulelo dolobha. ₅Lapho banganemukeli khona lishiyeni lelo dolobha, nitsintsitse lutfuli etinyaweni tenu, kuze kube bufakazi bekunala kwabo.”

₆Bahamba-ke, bangenela imiti ngemiti bashumayela liVangeli, baphilisa kuto tonkhe tindzawo.

₇Herodi, inkhosi yaseGalile, weva ngato tonkhe letintfo letatenteka; wadzidzeka kakhulu, ngobe labanye bantfu bebatsi: “Johane uMbhabhatisi sewuvukile ekufeni;” ₈labanye bebatsi ngu-Elija lotibonakalisile; kantsi labanye bebatsi ngulomunye webaphrofethi basendvulo lovuke ekufeni.

₉Herodi watsi: “Ngayijuba inhloko yaJohane; kodvwa manje sengubani lona lesengiva ngaye konkhe loku?” Wase wetama kumbona.

₁₀Nase babuyile baphostoli, bafike batjela Jesu konkhe lababekwentile. Wase uhamba nabo uya edolobheni eBhethsayida. ₁₁Tatsi kube tikuve loko leticumbi tebantfu, tamlandzela. Watemukela, wakhuluma ngembuso waNkulunkulu, waphilisa nalabo bebadzinga kuphiliswa.

₁₂Nalishonako lilanga, baphostoli labali-12 beta kuye batsi: “Bacitse labantfu bahambe baye emitini nasemakhaya bayewutifunela kudla kanye nendzawo yekulala, ngobe ilihlane kakhulu lendzawo lesikuyo.”

₁₃Kodvwa Jesu watsi kubo: “Banikeni nine matfupha labangahle bakudle.”

Baphendvula batsi: “Lesinako tinkhwa letisihlanu netinhlanti letimbili, ngaphandle kwekutsi siyewutsenga lokunye sitekwengeta, kuze kutekwenela bonkhe labantfu.”

₁₄Bekungaba ti-5 000 temadvodza labelapho. Jesu watsi kubafundzi bakhe: “Hlalisani labantfu ngema-50 sicumbi sisinye.”

₁₅Bafundzi bakhe benta njengobe abeshito, babahlalisa phansi bonkhe. ₁₆Jesu wase utsatsa letinkhwa letisihlanu netinhlanti letimbili wabuka ezulwini, watibusisa, watihlephula wase utinika bafundzi bakhe kutsi babele bantfu. ₁₇Bonkhe badla besutsa; bafundzi base babutsa timvutfuluka letatisele, kwagcwala emabhasikidi lali-12.

₁₈Kwatsi Jesu asathandaza yedvwana bafundzi bakhe banaye, wababuta watsi: “Bantfu batsi ngingubani?”

₁₉Bafundzi bamphendvula batsi: “Labanye batsi unguJohane uMbhabhatisi, labanye batsi ungu-Elija, kantsi labanye batsi ungulomunye webaphrofethi basendvulo uvukile ekufeni.”

₂₀Wababuta watsi: “Nine nitsi ngingubani?”

Phetro wamphendvula watsi: “UnguKhristu waNkulunkulu.”

₂₁Jesu wabadvonsa ngendlebe watsi loko bangakutjeli muntfu, ₂₂wachubeka watsi: “INdvodzana yeMuntfu ifanele kuhlupheka kakhulu, ilahlwe tibondza tenkholo, nebaphristi labakhulu nebafundzisi bemtsetfo. Iyawubulawa, ivuswe ekufeni ngelilanga lesitsatfu.”

₂₃Wase utsi kubo bonkhe: “Lofuna kungilandzela, kufanele atidzele, etjatse siphambano sakhe onkhe emalanga, angilandzele. ₂₄Ngobe lofuna kusindzisa imphilo yakhe, uyawulahlekelwa ngiyo, kodvwa lolahlekelwa yimphilo yakhe ngenca yami, uyakuyisindzisa.

₂₅“Kodvwa kuyawumbuyiselani umuntfu kuzuza live lonkhe, bese ulahlekelwa nguye lucobo lwakhe nome abhujiswe? ₂₆Nangabe umuntfu unemahloni ngami nangemavi ami, neNdvodzana yeMuntfu iyawuba nemahloni ngaye nayita ngenkhatimulo yayo nangebukhosi beYise kanye neyetingilosi letingcwele. ₂₇Ase nginitjele naliciniso kutsi, bakhona lapha emkhatsini wenu labangeyikufa bangakawuboni umbuso waNkulunkulu.”

₂₈Ngemuva kweliviki akushito loko, Jesu watsatsa boPhetro, naJohane, naJakobe wenyukela nabo entsabeni ayewuthandaza. ₂₉Asathandaza buso bakhe bagucuka, netimphahla takhe taba mhlophe tamengetela. ₃₀Kusenjalo kwabonakala emadvodza lamabili asakhuluma naye, kwakuboMosi na-Elija; ₃₁babonakala ngebukhatikhati banenkhatimulo yasezulwini bakhuluma naJesu ngeluhambo lwakhe belutawugcwaliseka eJerusalema lokwakuyinjongo yaNkulunkulu.

₃₂Phetro nebangani bakhe babephetfwe butfongo lobukhulu, kodvwa babebhekile bayibona inkhatimulo yaJesu kanye nalamadvodza. ₃₃Atsi nasehlukana lamadvodza, Phetro watsi kuye: “Mfundzisi, kuhle lokutsi sibe lapha. Asakhe emathende lamatsatfu: lelinye libe lakho, lelinye libe laMosi, lelinye libe la-Elija.” Empeleni abengati kutsi utsini.

₃₄Asakhuluma loko, kwachamuka lifu labasitsa ngesitfunti salo, bafundzi besaba nababona kusondzela lelifu. ₃₅Kwase kuvakala livi liphuma kulelifu litsi: “Lena yiNdvodzana yami, lengiyikhetsile, yilaleleni!”

₃₆Latsi libindza lelivi, kwabesekusele Jesu yedvwana. Bafundzi bakufihla loko, abazange batjele muntfu ngalababekubonile ngalawo malanga.

₃₇Ngakusasa sebehlile entsabeni, sicumbi lesikhulu seta sihlangabeta Jesu. ₃₈Kwase kumemeta indvodza emkhatsini waso itsi: “Mfundzisi, ase ungibonele nangu umsa wami, indvodzana yekuphela. ₃₉Kunemoya lomhlaselako ummemetise kakhulu, bese uba nesitfutfwane, aze akhihlite emagwebu emlonyeni; kumshumphisa kangangekutsi uze ehluleke ngisho nekuhamba, kulukhuni kuphuma kwawo. ₄₀Ngancenga bafundzi bakho kutsi bawukhiphe lomoya, kodvwa behluleka.”

₄₁Jesu waphendvula watsi: “Yehheni, nine situkulwane lesonakele nalesingakholwa, ngiyawuhlala nani kuze kube ngunini nginibeketelela? Mletse lapha lomsa wakho.”

₄₂Watsi naketa lomfana, lidimoni lamjika phansi, waba nesitfutfwane. Jesu wawekhuta lomoya lomubi, wamphilisa lomfana, wase umbuyisela kuyise. ₄₃Bonkhe bantfu bamangala ngalamandla aNkulunkulu lamakhulu kangaka.

Bantfu bebasamangele ngako konkhe lokwakwentiwa nguJesu, nakatsi kubafundzi bakhe: ₄₄“Ningabokukhohlwa naku lengitanitjela kona! INdvodzana yeMuntfu itawunikelwa etandleni tebantfu.”

₄₅Kodvwa abazange bayive lenkhulumo kutsi isho kutsini, ngobe beyifihlakele kubo futsi ingevakali, kantsi babesaba nekumbuta ngalendzaba.

₄₆Bafundzi baJesu babese bayaphikisana ngekutsi ngubani lomkhulu kunabo bonkhe. ₄₇Kodvwa Jesu asabonile kutsi bacabangani, wase uletsa umntfwana, wammisa eceleni kwakhe. ₄₈Wase utsi kubo: “Umuntfu lowemukela lomntfwana ngelibito lami, wemukela mine; nalowo lowemukela mine, wemukela lowo longitfumile. Ngobe lowo lomncane kakhulu kunani nonkhe, nguye lomkhulu kunani nonkhe.”

₄₉Johane wakhuluma watsi: “Mfundzisi, sibone umuntfu akhipha emadimoni ngelibito lakho, samtjela satsi akakhawule, ngobe akahambisani natsi.”

₅₀Jesu wase utsi kuye: “Ningamyekelisi, ngobe longalwi nani ungakini.”

₅₁Sekusele emalangana ekutsi Jesu atsatfwe ayiswe ezulwini, watimisela kutsi aye eJerusalema. ₅₂Watfumela titfunywa ngembili kwakhe, letesuka tangena edolobheni lemaSamariya kuyawumlungisela khona. ₅₃Kodvwa bantfu balapho abazange bamemukele, ngobe kwakukhanya kutsi ucondze kuya eJerusalema.

₅₄BoJakobe naJohane, bafundzi bakhe, nabakubona loku, batsi: “Nkhosi, uyafuna yini sibite umlilo wehle ezulwini ubacedze bonkhe?”

₅₅Kodvwa Jesu wagucuka wabekhuta. ₅₆Base bachubekela kulelinye lidolobha.

₅₇Basesendleleni, kwefika indvodza kuJesu yatsi: “Ngitakulandzela nome ngukuphi lapho uya khona.”

₅₈Jesu watsi kuyo: “Timphungutja tinemigodzi, netinyoni tinetidleke, kodvwa iNdvodzana yeMuntfu ayinandzawo yekulala iphumule.”

₅₉Wase utsi kulenye indvodza: “Ngilandzele!”

Kodvwa yona yatsi: “Nkhosi, asewungivumele ngiyewungcwaba babe.”

₆₀Jesu waphendvula watsi: “Yekela labafile bangcwabane bodvwana. Wena hamba uyewushumayela umbuso waNkulunkulu!”

₆₁Lenye indvodza yatsi: “Ngitakulandzela, Nkhosi, kodvwa asewungivumele sengiyewuvalelisa likhaya lami.”

₆₂Jesu watsi kuye: “Wonkhe lobambe likhuba alima bese ubuka emuva, akawufaneli umbuso waNkulunkulu.”