Matewu 13

₁Ngalo lelo langa Jesu waphuma endlini wayawuhlala ngaselwandle. ₂Sicumbi sebantfu sasondzela kuye samtungeleta, bantfu baba banyenti kangangekutsi wangena esikebheni wahlala ekhatsi, bantfu bema elusentseni.

₃Wabatjela tintfo letinyenti ngemifanekiso, watsi: “Bekukhona umuntfu lowahamba wayawuhlanyela. ₄Ekuhlanyeleni kwakhe lenye inhlanyelo yawela endleleni, kwefika tinyoni tayidla tayicedza. ₅Kepha lenye yawela emhlabatsini losemadvwaleni, yasheshe yamila, ngobe yayite umhlabatsi lowenele. ₆Latsi ngekuphuma lilanga lahashula titfombo tabuna, ngenca yekutsi tatite timphandze letijulile. ₇Lenye inhlanyelo yawela emanyeveni, yamila; emanyeva akhula aminyetela titfombo. ₈Kodvwa lenye yawela emhlabatsini lovundzile, yatsela titselo: lenye ngelikhulu, lenye ngema-60, lenye ngema-30.

₉“Lonendlebe yekuva akeve!”

₁₀Kwase kufika bafundzi bakhe kuye batsi: “Ukhulumelani kubo ngemifanekiso?”

₁₁Wabaphendvula watsi: “Nine ninikiwe lwati lwetimfihlakalo tembuso welizulu, kodvwa bona abakanikwa. ₁₂Ngobe lowo lonako uyawunikwa kube kunyenti, kodvwa lowo lote uyakwemukwa naloko lokuncane lanako. ₁₃Kungako nje ngikhuluma kubo ngemifanekiso, ngobe nome babuka ababoni, nome beva abevisisi, abacondzi. ₁₄Kugcwaliseka kubo siprofetho sa-Isaya lesitsi:

₁₆“Kodvwa-ke nine nibusisiwe, ngobe emehlo enu ayabona, netindlebe tenu tiyeva. ₁₇Ngobe ngicinisile, ngitsi kini: Banyenti baprofethi nebantfu labalungile lababefisa kubona loku lenikubonako, kodvwa abazange bakubone; futsi babefisa kuva loku lenikuvako, kodvwa abazange bakuve.”

₁₈“Lalelani-ke kutsi umfanekiso ngemhlanyeli usho kutsini. ₁₉Bantfu labatsi nabeva livi lembuso kepha bangete balicondza, bayaye befikelwe nguLomubi, abemuke loko bekuhlanyelwe etinhlitiyweni tabo: loko-ke kusho inhlanyelo leyayihlanyelwe endleleni. ₂₀Kuhlanyelwa kwenhlanyelo emhlabatsini losemadvwaleni kusho labo labalivako livi lembuso balemukele masinyane ngekujabula. ₂₁Kepha ngekubate timphandze letijulile etinhlitiyweni tabo, bahlala sikhashana nje. Kutsi kungavela tinhlupheko nome kutingelwa ngenca yelivi, bese bahlubuka masinyane. ₂₂Kuhlanyelwa kwenhlanyelo emanyeveni kusho labalivako livi lembuso, kodvwa tinhlupheko macondzana nalemphilo nelutsandvo lwebunjinga kuyaye kuliminyetele livi bangabe basatsela titselo. ₂₃Lena leyayihlanyelwe emhlabatsini lovundzile ifanekisa lowo lolivako livi, alicondze, bese utsela titselo: lomunye ngelikhulu, lomunye ngema-60, nalomunye ngema-30.”

₂₄Lomunye umfanekiso lawubeka utsi: “Umbuso welizulu ufanana nendvodza leyahamba yayawuhlanyela inhlanyelo lenhle ensimini yayo. ₂₅Kepha ebusuku, bantfu sebalele bonkhe, kwefika sitsa sayo sahlanyela lukhula emkhatsini walamabele, sesuka sahamba. ₂₆Latsi kube likhule likhaba litsele titselo, kwase kubonakala lukhula. ₂₇Tisebenti talendvodza teta kuyo tatsi: ‘Mnumzane, njengobe wawuhlanyele inhlanyelo lenhle ensimini yakho, pho, lolukhula luphumaphi?’ ₂₈Lendvodza yaphendvula yatsi: ‘Loko kwentiwa sitsa.’ Tase tiyabuta titsi: ‘Uyafuna yini siyeluzuphuna lolukhula?’ ₂₉Kodvwa yena watsi: ‘Cha, ngobe nitawutsi nizuphuna lukhula, kantsi senizuphuna nalamabele. ₃₀Yekelani nje kukhule kokubili ndzawonye, kuze kube sikhatsi sekuvuna, kuvunwe; nasekuvunwa ngitawutjela labavunako kutsi babutse lukhula kucala, balubophe tincumbi, kuze lutewushiswa; bese-ke nibutsela emabele ndzawonye esiteni sami.’ ”

₃₁Lomunye umfanekiso labatjela wona wawutsi: “Umbuso welizulu ufanana nenhlavu yendlulamitsi, layitsatsa lomunye umuntfu wayihlanyela ensimini yakhe. ₃₂Yona yincane kakhulu, kepha naseyikhulile iba yinkhulu kunato tonkhe tihlahla, kudzimate kufike netinyoni temoya, takhele tidleke tato emagaleni aso.”

₃₃Waphindze wabatjela lomunye umfanekiso watsi: “Umbuso welizulu ufanana nembiliso leyatsatfwa ngumfati wayibhica nemabinta lamatsatfu emphuphu, kwabila konkhe.”

₃₄Konkhe loku Jesu wakukhuluma esicukwini ngemifanekiso. Ngaphandle kwemifanekiso kute lakukhuluma kuso, ₃₅kuze kugcwaliseke loko lokwakhulunywa ngemprofethi kutsi:

₃₆Jesu wesuka lapho watishiya ticumbi, wangena endlini. Bafundzi bakhe beta kuye, befika batsi: “Ase usichasisele lomfanekiso ngelukhula ensimini kutsi usho kutsini.”

₃₇Yena wabaphendvula watsi: “Lona lowahlanyela inhlanyelo lenhle yiNdvodzana yeMuntfu. ₃₈Insimi ngulomhlaba, inhlanyelo lenhle bantfwana bembuso, kepha lukhula bantfwana baLomubi. ₃₉Sitsa lesahlanyela lukhula nguSathane. Kuvuna kusho siphetfo saletikhatsi, bavuni-ke tingilosi.

₄₀“Ngako-ke njengobe lukhula lwabutfwa lwashiswa, kuyawuba njalo nasekupheleni kwelive. ₄₁INdvodzana yeMuntfu iyawutfumela tingilosi tayo tiyewubutsa tikhiphe konkhe lokubanga kona nabo bonkhe benti balokubi embusweni wayo, ₄₂tibalahle emlilweni lowesabekako, lapho bayawukhala kudzimate kugedletele ematinyo. ₄₃Lapho bantfu baNkulunkulu bayawukhanya njengelilanga embusweni weYise.

“Lalelani-ke, naninendlebe yekuva.”

₄₄“Umbuso welizulu ufanana nemcebo lofihlwe ensimini. Kwenteka indvodza yawutfola, yabuye yawugcibedzela. Yajabula kangangekuba yahamba yayawutsengisa ngako konkhe leyayinako yancandzeka, yayawutsenga leyo nsimi.”

₄₅“Futsi umbuso welizulu ufanana nemtsengi labefuna ematje laligugu lelikhulu. ₄₆Watsi kube alitfole lelinye lawo lelalidule kakhulu, wase uyahamba wayawutsengisa ngako konkhe lanako, wabuyela wayawulitsenga.”

₄₇“Futsi umbuso welizulu ufanana nelinetha lelafakwa elwandle, labutsa tonkhe tinhlobo tetinhlanti. ₄₈Latsi nase ligcwele, badwebi balidvonsela elusentseni lwelwandle bahlala phansi, behlukanisa letinhlanti. Letinhle batifaka etitjeni, kwatsi letimbi batilahla. ₄₉Kuyawuba njalo ekupheleni kwelive, kuyawuphuma tingilosi tikhiphe lababi emkhatsini walabalungile, ₅₀tibajike emlilweni lowesabekako, lapho bantfu bayawukhala kakhulu bagedletelise nematinyo.”

₅₁Jesu wababuta watsi: “Nikuve kahle yini konkhe loku?”

Baphendvula batsi: “Yebo, sikuvile.”

₅₂Wase utsi kubo: “Ngako-ke wonkhe umfundzisi wemtsetfo loba ngumfundzi embusweni welizulu, unjengemnikati wemuti lokhipha engcebeni yakhe lokusha nalokudzala.”

₅₃Watsi Jesu nasacedzile ngalemifanekiso, wase uyesuka kuleyo ndzawo. ₅₄Wabuyela edolobheni lakubo. Wabafundzisa esinagogeni labo, bamangala badzimate batsi: “Lomuntfu wakutfolaphi lokuhlakanipha lokungaka, nalemisebenti yemandla? ₅₅Akusiyo yini indvodzana yembati le? Unina akusiye yini lona lekutsiwa nguMariya, bomnakabo akusibo yini boJakobe, naJosefa, naSimoni, naJudasi? ₅₆Bodzadzewabo bona akusibo yini laba labahlala natsi?

“Kepha lona ukutsatsaphi konkhe loku?” ₅₇Bakhubeka ngaye.

Kepha Jesu watsi: “Umprofethi uhlonishwa nome kukuphi, ngaphandle kwasendzaweni yakubo, nakubantfu bakubo.” ₅₈Akazange ayente imisebenti yemandla leminyenti lapho ngenca yekungakholwa kwabo.