Makho 11

₁Batsi kube basondzele eJerusalema sebasedvute naseBhethifage neBhetani, ngaseNtsabeni Yemincumo, Jesu watfumela bafundzi bakhe lababili, ₂watsi kubo: “Hambani nize ningene edolobhaneni lelimacondzana nani; nitawukhandza kukhungwe litfole lembongolo, lelingazange seligitjelwe. Nifike nilikhumule, nililetse la. ₃Nakukhona lonibutako atsi: ‘Nikwentelani loko?’ nibotsi: ‘INkhosi iyalidzinga, italibuyisa masinyane.’ ”

₄Bahamba-ke labo lababili balikhandza lelitfole likhungwe ngasesangweni, ngephandle kwemuti, ngasemgwacweni, balitfukulula. ₅Labo lababeme lapho bababuta batsi: “Nentani? Nilikhumulelani lelitfole?”

₆Babatjela loko labebakutjelwe nguJesu; nembala bantfu babayekela bahamba. ₇Baliletsa kuJesu lelitfole. Bagaca tingubo tabo etikwalo, Jesu waligibela. ₈Labanyenti bendlala tingubo tabo emgwacweni, labanye bendlala emagala etihlahla labebawagawule esigangeni. ₉Labo labebahamba embili nalabebahamba ngemuva babememeta batsi:

₁₁Jesu wangena-ke eJerusalema, wacondza ngekhatsi ethempelini. Watsi kube acedze kubuka konkhe, wase uyengca uya eBhetani ngobe kwase kuhlwile, abehamba kanye nebafundzi bakhe lababeli-12.

₁₂Ngakusasa nase babuya eBhetani, Jesu wativa asalambile. ₁₃Wabona bucalu sihlahla semkhiwa sinemacembe, waya kuso ayewufuna emakhiwa. Watsi uyefika wakhandza kute, kungemacembe odvwa, ngobe bekungesiso sikhatsi semakhiwa. ₁₄Watsi kulesihlahla: “Sale kubate muntfu loyakudla emakhiwa la kuwe nanini.”

Bafundzi bakhe bamuva nakasho njalo.

₁₅Befika eJerusalema. Jesu wangena ethempelini wakhipha bonkhe lababetsenga nalababetsengisa. Wagumbucela ematafula alababentjintja timali kanye netihlalo talabebatsengisa ngematuba. ₁₆Abengavumeli muntfu kutsi ahambe adzabule emabaleni elithempeli atfwele. ₁₇Wabafundzisa watsi: “Akashongo yini Nkulunkulu emBhalweni wakhe watsi: ‘Indlu yami iyawubitwa ngekutsi yindlu lapho kuthandaza khona tonkhe tive’? Kodvwa nine seniyigucule yaba ngumhume wabosidlani!”

₁₈Baphristi labakhulu kanye netati temtsetfo batsi kube bakuve loko, bafuna indlela lababengabulala ngayo Jesu, ngobe phela babemesaba, kwatise kutsi tonkhe ticuku tatitsatsekile ngalemfundziso yakhe, timangele.

₁₉Kwatsi nakuhwalala Jesu nebafundzi bakhe baphuma edolobheni laseJerusalema.

₂₀Ekuseni nase babuyela emuva, basibona lesihlahla semkhiwa sesome ngisho netimphandze taso. ₂₁Phetro wayikhumbula indzaba yangayitolo, wase utsi: “Mfundzisi, buka lesa sihlahla losicalekise itolo, sesomile.”

₂₂Jesu wakhuluma kubo watsi: “Kholwani kuNkulunkulu. ₂₃Ngicinisile, ngitsi kini: Nome ngubani loyawutsi kulentsaba: ‘Cukuleka uyewuphonseka le elwandle,’ angangabati enhlitiyweni yakhe, kodvwa akholwa kutsi loko lasakushito kutakwenteka, uyakwentelwa kona. ₂₄Ngako-ke ngitsi kini: Konkhe leniyawukucela ngemkhuleko, kholwani kutsi seninako, niyawube seniyaphiwa-ke. ₂₅Ngaso sonkhe sikhatsi nanithandazako, nibobacolela leniphambene nabo, kuze kutsi neYihlo losezulwini anitsetselele tono tenu. [ ₂₆Kodvwa naningatsetselelani, neYihlo losezulwini angeke anitsetselele emacala enu.]”

₂₇Babuyela-ke eJerusalema; watsi asaya ethempelini, baphristi labakhulu netati temtsetfo netibondza beta kuye, ₂₈bambuta batsi: “Ulitsatsaphi ligunya lekwenta letintfo, kona ngubani lokunike leligunya lekutenta?”

₂₉Jesu watsi: “Nami ngitanibuta livi libe linye; naninginika imphendvulo, ngitanitjela kutsi leligunya lengenta ngalo letintfo, ngilitsatsaphi. ₃₀Ase ningitjele kutsi umbhabhatiso waJohane bewuphuma kuNkulunkulu yini nome bewuphuma kubantfu?”

₃₁Bacale bakhulumisana bodvwana batsi: “Nasitsi: ‘KuNkulunkulu,’ utawutsi: ‘Animkholwanga ngani kepha?’ ₃₂Kodvwa nasingatsi: ‘Kubantfu,’ ngeke silunge.” Phela babesaba bantfu, ngobe bonkhe bebabambelele ekutseni Johane abengumphrofethi cobo. ₃₃Ngako base baphendvula Jesu batsi: “Awu, asati.”

Jesu-ke yena watsi: “Nami-ke ngeke nginitjele kutsi letintfo ngitenta ngaliphi ligunya.”