Makho 6

₁Jesu wesuka lapho wabuyela endzaweni yakubo, bafundzi bakhe bamlandzela. ₂Kwatsi ngeliSabatha wacala wafundzisa esinagogeni. Labanyenti labamuva bamangala, batsi: “Lomuntfu wakutsatsaphi konkhe loku? Nhlakanipho lenjani lena layiphiwe? Letimangaliso letingaka utenta kanjani? ₃Akusiye yini umbati, indvodzana yaMariya, umnakaboJakobe, naJose, naJudasi, naSimoni? Angitsi bodzadzewabo balapha emkhatsini wetfu?” Base bayamcansukela.

₄Jesu watsi kubo: “Umphrofethi uyahlonipheka kuyo yonkhe indzawo ngaphandle kwaseveni lakubo nakubantfu bakubo, ngisho nakubemndeni wakubo imbala.”

₅Akakhonanga kwenta imisebenti yemandla kuleyo ndzawo ngaphandle kwekutsi nje wabeka tandla kulabambalwa lababegula, wabaphilisa. ₆Wamangaliswa kungakholwa kwabo.

Jesu abehamba angenela imiti ngemiti yangakubo afundzisa bantfu. ₇Wabita bafundzi labali-12 watsi abete kuye. Wabatfuma ngababili, wabanika emandla ekukhipha imimoya lemibi kubantfu.

₈Wabayala kutsi bangaphatsi lutfo lwendlela ngaphandle kweludvondvolo; watsi bangasiphatsi ngisho nesinkhwa, nome sikhwama sekucela, nome imali etipatjini tabo. ₉Kodvwa watsi bafake tincabule, bangatihlindzekeli ngeliyembe lesibili. ₁₀Watsi kubo: “Nabaningenisa endlini, nibohlala kuleyondlu, nize nihambe kuleyo ndzawo. ₁₁Nakukhona lapho banganemukeli khona bangavumi nekunilalela, nibobashiya nihambe, nitsintsitse lutfuli etinyaweni tenu, kuze kube bufakazi bekunala kwabo.”

₁₂Bahamba-ke baphostoli bashumayela bantfu kutsi baphendvuke. ₁₃Bakhipha emadimoni lamanyenti kubantfu, nalabanyenti lababegula babagcobisa ngemafutsa babaphilisa.

₁₄Inkhosi Herodi yakuva loko, ngobe ligama laJesu lase lidvume kakhulu. Labanye babetsi: “Johane uMbhabhatisi sewuvukile kulabafile. Ngiko nje enta letimangaliso letingaka.”

₁₅Kodvwa labanye babetsi: “Ngu-Elija.” Labanye batsi: “Ngumphrofethi njengalabanye baphrofethi bakadzeni.”

₁₆Kodvwa Herodi, nakeva ngesimo setintfo, watsi: “Johane, lengamjuba inhloko, sewuvusiwe, uyaphila.”

₁₇Herodi phela abesandza kutfumela kutsi kubanjwe Johane afakwe ejele. Abekwente loko, ngobe abesatsetse Herodiyasi, wamenta umkakhe. LoHerodiyasi abengumkaFiliphu, umnakaboHerodi. ₁₈Phela Johane abekhute Herodi watsi: “Umtsetfo awukuvumeli kutsi utsatse umfati wemnakenu, umente wakho.”

₁₉Nguko-ke Herodiyasi waba nemagcubu naJohane, afisa kutsi abulawe, kodvwa abete indlela. ₂₀Herodi bekamesaba Johane amati kahle kutsi ungumuntfu lolungile nalongcwele, ngako-ke abemvikela. Abetsi, nakamuva akhuluma, adzidzeke, noko ajabulele kumlalela.

₂₁Kodvwa litfuba lavuleka ngesikhatsi Herodi agubha lusuku lwakhe lwekutalwa. Wenta sibhimbi, wabita bonkhe bantfu besigodlo sakhe, netindvuna takhe temphi, kanye netiphakanyiswa taseGalile. ₂₂Indvodzakati yaHerodiyasi yeta yabagidzela kahle kakhulu. Herodi wajabula kanye netivakashi takhe, wadzimate watsi kulentfombatana: “Cela kimi nome ngabe yini lokufunako, ngitakupha kona.” ₂₃Wafunga watsi kuyo: “Nome yini lotayicela kimi, ngitakupha yona, nome ngabe yihhafu yembuso wami.”

₂₄Yaphumela ngephandle intfombatana yaya kuyawubuta kunina yatsi: “Ngingacelani?” Unina watsi: “Cela inhloko yaJohane uMbhabhatisi.”

₂₅Masinyane intfombatana yabuya igijima, yafika enkhosini yacela yatsi: “Ngifuna ungiphe nyalo nje inhloko yaJohane uMbhabhatisi, ibekwe emgcwembeni.”

₂₆Inkhosi yadzabuka kakhulu; kodvwa ngenca yesifungo, lebeseyisentile embikwetivakashi tayo, ayitsandzanga kusephula. ₂₇Masinyane inkhosi yatfumela lisotja kutsi aliletse inhloko yaJohane. Lahamba layawujuba inhloko yaJohane ejele. ₂₈Yaletfwa-ke inhloko yaJohane isemgcwembeni, yaniketwa intfombatana, intfombatana yayinika unina. ₂₉Batsi kube bakuve loko bafundzi baJohane, bahamba bayawutsatsa sidvumbu sakhe bayawusingcwaba.

₃₀Baphostoli babuya kuJesu bafike bambikela ngako konkhe lababekwentile nalababekufundzisile. ₃₁Watsi kubo: “Ase sibonane sodvwa, siphumule kancane.” Ngobe bekuphitsitela bantfu behla benyuka, loko kwenta kutsi Jesu nebafundzi bakhe babete nalesincane nje sikhatsi ngisho nesekudla imbala. ₃₂Ngako bahamba ngemkhumbi baya endzaweni lete bantfu, baba bodvwana.

₃₃Noko bantfu labanyenti bababona nase bahamba, babalandzela ngematubane, batsi phitsilili bavela kuwo onkhe emadolobha, baze befika kucala nakuleyo ndzawo abeya kuyo Jesu nebafundzi bakhe. ₃₄Watsi uyehla nje Jesu esikebheni wabona lesikhulu sicumbi sebantfu, wabahawukela ngobe bebanjengetimvu letite umelusi. Wabafundzisa ngetintfo letinyenti. ₃₅Kwatsi nase liyawushona, bafundzi bakhe beta kuye batsi: “Lendzawo ilihlane, kantsi futsi nelilanga seliya kunina. ₃₆Bahambise labantfu baye emitini nasemadolobhaneni lasedvute bayetitsengela kudla.”

₃₇Kepha Jesu wabaphendvula watsi: “Banikeni nine labangahle bakudle.”

Batsi bona: “Singaya yini kuyawutsenga tinkhwa ngabodenariyo labangema-200 sibanikete badle?”

₃₈Watsi kubo: “Ase niyewuhlola kutsi ninetinkhwa letingaki.”

Batsi nase bahlolile, babuya batsi: “Sinetinkhwa letisihlanu netinhlanti letimbili.”

₃₉Wabayala bafundzi bakhe watsi abahlalise labantfu ngetigaba tabo etjanini lobuluhlata. ₄₀Ngako bahlala phansi ngeticheme tabo: ngemakhulu nangema-50. ₄₁Watsatsa letinkhwa letisihlanu naletinhlanti letimbili wabuka etulu ezulwini, watibusisa. Wahlephula letinkhwa watiniketa bafundzi bakhe kutsi batabele labantfu; wacetuna naletinhlanti letimbili wabanika bonkhe. ₄₂Badla bonkhe besutsa. ₄₃Bafundzi babutsa timvutfuluka tetinkhwa netetinhlanti, bagcwalisa emabhasikidi lali-12. ₄₄Emadvodza ladla kuleto tinkhwa abe ti-5 000.

₄₅Masinyane Jesu wangenisa bafundzi bakhe esikebheni, wabahambisa ngembili kwakhe, wabewetela ngesheya eBhethsayida, yena wasala ahambisa lesicuku sebantfu. ₄₆Watsi nasabahambisile, wenyukela entsabeni wayawukhuleka. ₄₇Kwatsi nakuhwalalako, sikebhe sabe sisekhatsi nelwandle, yena waba yedvwa elusentseni.

₄₈Wababona kutsi basigwedla kamatima sikebhe, ngobe umoya bewuphambene nabo. Kwatsi ekuseni kungakasi, emkhatsini weli-awa lesitsatfu nelesitfupha, Jesu weta kubo ahamba etikwemanti. Wacondza embili, washaya kungatsi uyendlula. ₄₉Bona-ke bambona ahamba etikwemanti bakhala bamemeta batsi: “Sipoko!” ₅₀Ngobe bambona bonkhe betfuka, besaba kakhulu.

Masinyane wakhuluma nabo, watsi: “Manini sibindzi, ningesabi, ngimi.” ₅₁Wangena esikebheni sabo, umoya wathula, ngako bamangala kakhulu. ₅₂Bebangacondzisisi kahle kutsi tinkhwa betichazani, imicondvo yabo yayivalekile.

₅₃Batsi nase bewelile, bakhunga sikebhe elusentseni lwelwandle, behlela eGenesaretha. ₅₄Batsi nabehla esikebheni, bantfu bambona masinyane Jesu. ₅₅Bagijima bonkhe bachamuka kuto tonkhe tigodzi letatimadvutane, baletsa labagulako ngetinhlaka, babaletsa lapho beve kutsi ungakhona Jesu. ₅₆Yonkhe indzawo lapho abeya khona Jesu emitini, nasemadolobheni, nasemaphandleni, babeletsa kuye tigulane etimakethe. Tamncenga kutsi sale avuma kutsi titsintse umphetfo wengubo yakhe. Nembala tonkhe letawutsintsa taphila.