Numeri 36

₁Baholi bemindeni yelusendvo lwakaGileyadi, umsa waMakhire, umsa waManase, lababebetinsendvo tebatukulwane taJosefa, beta bakhuluma embikwaMosi nebaholi, lababetinhloko temindeni yema-Israyeli. ₂Batsi: “Ngesikhatsi Simakadze ayala inkhosi yami kutsi lelive ulabele ngenkatho kuma-Israyeli kutsi kube lifa lawo, wayala kutsi lifa lemnaketfu Selofehadi linikwe emadvodzakati akhe. ₃Ake sitsi bashada nemadvodza aletinye tive taka-Israyeli, loko kutawusho kutsi lelo lifa labo litawutsatfwa lingabe lisaba ngilo lifa labokhokho betfu, bese liba lalawo madvodza labashade nawo. Ngaloko-ke kusho kutsi incenye yalelo lifa lelabelwe tsine itawube seyiyatsatfwa. ₄Nakufika umnyaka wekubuyiselwa ka-Israyeli, lifa labo litakwengetelwa kuleso sive lashade kuso, nalelo lifa labo litawutsatfwa lingabe lisaba lifa labokhokho betfu.”

₅Mosi watsi kube ayalwe nguSimakadze, wabe sewetfula nankhu umlayeto kuma-Israyeli, watsi: “Loko lokushiwo sive setitukulwane taJosefa kungiko ngempela. ₆Naku-ke lokungumyalo waSimakadze macondzana nemadvodzakati aSelofehadi: Angashada nome ngangubani lamtsandzako yingci nakungewelusendvo lwesive seyise. ₇Kute lifa lelingumhlaba lekuyawuphiwana ngalo ka-Israyeli lisuke kulesinye sive liye kulesinye sive, ngobe wonkhe um-Israyeli uyawuligcina lelo live lalitfola kubokhokho bakhe. ₈Indvodzakati lenelifa lelilive kuso sonkhe sive sema-Israyeli kufanele ishade nemuntfu welusendvo lwesive seyise, kuze kutsi wonkhe um-Israyeli atewuba nelifa laboyise. ₉Kute lifa lelilive leliyakwendluliswa lisuswe kulesinye sive liye kulesinye sive, ngobe nguleso naleso sive siyawutigcinela lifa laso.”

₁₀Ngako emadvodzakati aSelofehadi enta loko Simakadze layala Mosi kutsi kwentiwe. ₁₁Emadvodzakati aSelofehadi, boMahala, naThisa, naHogila, naMilkha, naNowa, ashada nabomzala bawo lababetihlobo teyise. ₁₂Ashada etinsendvweni tetitukulwane taManase, umsa waJosefa, kwase kutsi lifa labo lajinge ladliwa belusendvo lwesive sabo.

₁₃Ngiyo lena-ke imiyalo nemitsetfo yaSimakadze layinika ema-Israyeli ngesandla saMosi ngesikhatsi asemise ematsafeni akaMowabi ngaseJordane ngesheya kwemfula iJordane malungana neJerikho.