Taga 18

₁Umuntfu longakhoni kutihlanganisa nalabanye utatisa yena; uyatfukutsela nakayalwa.

₂Umuntfu losilima akanandzaba nome intfo uyayiva nome akayiva, lakufunako kutsi atibonakalise yena kutsi uhlakaniphe kanganani.

₃Sono nekwedzelela kuyahambisana; nawulahlekelwa kutihlonipha, utfola lihlazo esikhundleni sako.

₄Emavi lakhulunywa bantfu afanana nemtfombo wekuhlakanipha, ashona njengelwandle, ahlumelelise njengemfula logeletako.

₅Kubi kungamlahli ngelicala umuntfu lowonile, nekugodla emalungelo alongenacala kubi.

₆Emavi esilima abanga kucabana, naloko lakushoko kumbangela kutsi bantfu bamshaye.

₇Sicitfo sesilima ngumlomo waso; emavi emlomo waso atingibe kuso.

₈Emavi enhlebo afanana nemtsamo wekudla lokumnandzi; ehla kamnandzi afinyelele ngekhatsi etibilinini temuntfu.

₉Umuntfu lolidlabha emsebentini wakhe ufanana nemuntfu lobhubhisako.

₁₀Libito laSimakadze liyinqaba lecinile, lapho kungabalekela khona bantfu labalungile basindze.

₁₁Ingcebo yemuntfu lonjingile siphephelo sakhe. Uyaye acabange kutsi nguyona nqaba yakhe lengamvikela.

₁₂Umuntfu lotigcabhako uyawubhujiswa, umuntfu lotitfobako uyadvunyiswa.

₁₃Kubulima nelihlazo kuphendvula umbuzo ungakeva kutsi utsini.

₁₄Umoya wemuntfu umenta akubeketelele kugula; kodvwa umoya lodzabukile ngubani longawubeketelela?

₁₅Umuntfu lonengcondvo leyehlukanisako uyaluzuza lwati, nendlebe yalohlakaniphile ifunana nelwati.

₁₆Sipho sakhe umuntfu simphendlela indlela, simholele kulabakhulu.

₁₇Sikhulumi sekucala ecaleni sibonakala shangatsi sicinisile, kuze kufike lomunye asibute.

₁₈Inkatho icedza umbango, ilamule tichwaga letilwako.

₁₉Sita umnakenu, uyawukusita akuvikele abe njengelubondza lwelidolobha; kodvwa nawucabana naye, uyawukuvalela umnyango.

₂₀Umuntfu weneliswa nguloko lakukhulumako; angeneliswa tento temlomo wakhe.

₂₁Lulwimi lunemandla ekuphila newekufa; labo labatsandza kulusebentisa bayakudla titselo talo.

₂₂Lowo lotfola umfati utfole intfo lenhle, uzuze umusa kuSimakadze.

₂₃Umuntfu lomphofu ukhuluma ngekutincengela acela umusa; kodvwa injinga ikhuluma ngebudlabha.

₂₄Labanye bangani bayakuhlamuka; kodvwa labanye bangani basondzela kakhulu kwengca banakenu bengati.