Taga 29

₁Umuntfu lotsi nakelulekwa acinise inhloko, uyakufohlotwa masinyane.

₂Nakungena bantfu labalungile ebuholini, bantfu bayajabula; kodvwa nakubusa bantfu lababi, bantfu bayakhonona.

₃Umuntfu lotsandza kuhlakanipha ujabulisa uyise; kodvwa longumngani wetingwadla uhlaphata lifa lakhe.

₄Inkhosi lebusa ngekulunga, live layo liba nesizotsa; kodvwa lebeka imali embili ibhubhisa live layo.

₅Umuntfu lolutsa makhelwane wakhe ambonge ngelite, utetsiya yena.

₆Kunelugibe etentweni letimbi temuntfu, kodvwa lolungile uhamba ajabula.

₇Umuntfu lolungile unakekela emalungelo alabamphofu; kodvwa lomubi akanandzaba naloko.

₈Tedzeleli letingenandzaba nebantfu, tingesusa lutfutfuva kuwo onkhe emadolobha; kodvwa bantfu labahlakaniphile baletsa kuthula nelucolo.

₉Nangabe umuntfu lohlakaniphile amangalela silima, lesilima sisuke sihleke setfuke ngenhlamba.

₁₀Babulali bayamtondza umuntfu lowetsembekile; kodvwa labalungile betama kuphephisa kuphila kwakhe.

₁₁Silima siyabonakalisa nase sitfukutsele; kodvwa lohlakaniphile uyatibamba angatibonakalisi.

₁₂Nangabe umbusi anaka labakhuluma emanga, tonkhe tindvuna takhe tiba nemanga.

₁₃Umcindzeteli nalocindzetelwe bafanana ngantfo yinye, kutsi: Bobabili Nkulunkulu wabapha emehlo ekubona.

₁₄Nangabe inkhosi iwavikela ngekungakhetsi emalungelo ebantfu labamphofu, iyawubusa sikhatsi lesidze.

₁₅Luswati nekuyalwa kunika inhlakanipho; kodvwa umntfwana longashaywa nalongayalwa uhlazisa unina.

₁₆Nangabe bantfu lababi basetikhundleni, bubi buyandza; kodvwa labalungile bayakubona kuwa kwalabo lababi.

₁₇Condzisa indvodzana yakho, khona itakunika kuthula kwemphefumulo. Ingeke ikuhlazise.

₁₈Lapho kute khona kwembulelwa nguNkulunkulu, bantfu bayeduka; kodvwa ubusisiwe umuntfu logcina umtsetfo waNkulunkulu.

₁₉Sisebenti ungeke usicondzise nawutawulibala kukhuluma ngemlomo; ngobe nome singeva, singeke sente.

₂₀Uyamati nje umuntfu lophike kukhuluma angakacabangi? Sincono silima kunaye.

₂₁Nangabe wetayeta sisebenti ngekusinika konkhe lesikufunako, nase sikhulile sitakwemuka konkhe lokukwakho.

₂₂Umuntfu losheshe atfuketsele ususa lutfutfuva; yebo, umuntfu lonenhlitiyo lencane ubanga tono letinyenti.

₂₃Kutigcabha kwemuntfu kumletsela kuwa; kodvwa lotfobekile utfola kuhlonipheka.

₂₄Umngani welisela usitsa sakhe cobo lwakhe. Umehluleli uyakumjezisa nakakhuluma liciniso, kantsi Nkulunkulu uyakumcalekisa nakangalikhulumi.

₂₅Kwesaba bantfu kulugibe; kodvwa lowo lowetsembekile kuSimakadze ulondvolotekile.

₂₆Bantfu labanyenti bafunana nekutsandvwa ngumbusi; kodvwa imphatfo lengakhetsi muntfu itfolakala kuSimakadze kuphela.

₂₇Labalungile bayabatondza lababi; nalababi bayabatondza labalungile.