Taga 5

₁Ndvodzana yami, lalelisisa kuhlakanipha kwami, ubeke indlebe ekucondzeni kwami. ₂Khona-ke uyawukwati kukhetsa lokufanele, netindzebe temlomo wakho tilulondvolote lwati. ₃Tindzebe temfati loyingwadla tivuta luju, inkhulumo yakhe ishelela kwengca emafutsa; ₄kodvwa ekugcineni ubaba njengenyongo, akhaliphe njengenkemba lekhalipha nhlangotsi totimbili. ₅Tinyawo takhe tehlela ekufeni, tinyatselo takhe tihamba ngendlela leya ethuneni. ₆Akahambi ngendlela yekuphila, tindlela takhe tiyazula, akati nekutsi kwentekani.

₇Ndvodzana yami, ngilalele, ungesuki emavini emlomo wami. ₈Mkhweshele ube khashane naye, ungasondzeli ngisho nasemnyango wendlu yakhe, ₉funa ludvumo lwakho lutsatfwe ngulabanye bantfu, nekuphila kwakho kuphelele etandleni talabangenasihe. ₁₀Nebachamuki futsi bangahle batesutsise ngemcebo wakho netitfukutfuku takho tiye endlini yewetive. ₁₁Ekupheleni kwemphilo yakho uyawububula ecansini, sekudleka tinyama nemtimba wakho. ₁₂Uyawudzimate ukhale utsi: “Empeleni nje, mine ngangikutondzelani kuyalwa nekufundziswa? Ingabe ngangikutondzelani kutsetsiswa? ₁₃Angizange ngibalalele bafundzisi bami lababengifundzisa; nome-ke kube mane ngalalela bacondzisi bami. ₁₄Ngatsi ngetfuka ngabe sengisekhatsi elubishini lwelihlazo ebandleni nakubantfu.”

₁₅Natsa emanti esicobho sakho, emanti lageleta aphuma esiyalwini sakho. ₁₆Kufanele yini imitfombo yakho isakateke igcwale yonkhe indzawo, lemifudlana yemanti imoseke ngekusakateka kuto tonkhe tindlela? ₁₇Emanti esicobho sakho akabe ngewakho wedvwa, angabi ngemanti etengcamgwaco. ₁₈Shangatsi ungabusiseka umtfombo wakho, ube nenjabulo ngemfati webusha bakho. ₁₉Muhle, uyabukeka njengenhlangu, utsandzeka njengemphala; shangatsi emabele akhe angakwenelisa ngaso sonkhe sikhatsi, shangatsi nelutsandvo lwakhe lungakuhaca. ₂₀Ndvodzana yami, ungavumi kutfunjwa lutsandvo lwemfati loyingwadla. Utsandzelani kugaca libilo lakho kumfati walenye indvodza? ₂₁Tindlela temuntfu tisemehlweni aSimakadze, tonkhe tindlela umuntfu lahamba ngato uyatigadzisisa. ₂₂Imisebenti yemuntfu lomubi ilugibe, ubanjwa elugibeni lwesono sakhe. ₂₃Uyakufa ngenca yekungatibambi kwakhe; bulima bakhe lobukhulu buyamedukisa.