Taga 7

₁Ndvodzana yami, ubokhumbula emavi ami, ugcine imiyalo yami engcondvweni yakho. ₂Yenta letintfo lengikutjela tona, khona uyawuphila, netimfundziso tami tente tibe ligugu njengemehlo akho, ₃utembatse njengendandatho eminweni yakho, uticophe engcondvweni yakho. ₄Khuluma ekuhlakanipheni, utsi: “Wena ungudzadzewetfu,” nasekucondzeni ukhulume utsi: “Sihlobo sami.” ₅Ngaloko uyawuphepha kumfati losiphingi, umfati walenye indvodza nalonemavi latobotanako.

₆Ngalelinye lilanga ngime ngasefasitelweni lendlu yami, ngabuka phansi emgwacweni. ₇Ngabona sicunjana setinsizwa letatingenako kuhlakanipha, emkhatsini wato ngabona lenye leyayingenalwati. ₈Yayihamba esitaladini eceleni kwelikona, icondzene nendlu yalomfati yaze yayawungena khona. ₉Kwase kucundzeka emehlo entsambama, sekuhwalala, kusihlwa. ₁₀Masinyane lomfati wahlangabeta lensizwa, embatsise kwengwadla, agcwele bucili. ₁₁Ungulalunyawana kantsi uyatatisa, futsi akuvumi kutsi ake atihlalele ekhaya; ₁₂ngalelinye lilanga usesitaladini, mhlawumbe abesemakethe, ukhanga acotsele kuwo onkhe emakona. ₁₃Wayibamba lensizwa wayanga, wase ukhuluma nayo utsi: ₁₄“Nginekudla lebekungekwemnikelo wekubonga wekufeza nekugcwalisa tifungo tami. ₁₅Ngiko nje ngite lapha kutekuhlangabeta, ngitele kutewufuna wena, manje-ke sengikutfolile. ₁₆Umbhedze wami ngiwuhlobise ngendvwangu lenhle lenemibalabala, yekwakhiwa eGibhithe. ₁₇Ngiwufake emakha emure, nenhlaba, nesinamoni. ₁₈Ake sitijabulise bonkhe lobusuku, sitenelise ngekulalana; ₁₉ngobe phela indvodza yami ayikho ekhaya, itsetse luhambo loludze yaya khashane. ₂₀Ihambe nemali lenyenti, kutawuphela cishe emaviki lamabili ingekho.” ₂₁Ngako wavele wayimelela kutsi iphambukele kuye, wayihuha ngemavi akhe. ₂₂Wavele wayikha etulu, yamlandzela njengenkhabi itawuhlatjwa nanjengenyamatane ingena esihibeni, ₂₃nanjengenyoni icotfota iya esifini. Yayingati kutsi loko itakukhokhela ngemphilo yayo.

₂₄Ngako-ke madvodzana ami, ngilaleleni, nilalelisise loku lesengikushito. ₂₅Ningacali niphambukele kulomfati, ningayi lapho aya ngakhona, ₂₆ngobe sewubulele emadvodza lamanyenti; ungeke uwabale emadvodza lasawacedzile. ₂₇Indlela leya endzaweni yalabafile icala endlini yakhe, yewuke yehlele etindlini tekufa.