Taga 9

₁Kuhlakanipha kwakhe indlu yako, kwayisimisa ngetinsika letisikhombisa. ₂Kuhlabile, kwadidiyela liwayini lako, kwadeka litafula lako. ₃Kutfumele tincekukati tako kutsi tiphume tiye kuyawumemeta eticongweni telidolobha, ₄titsi: “Nine labate lwati, wotani lapha! Nine labate ingcondvo, ₅wotani nitewudla kudla kwami, ninatse neliwayini lengilihlanganisile. ₆Shiyani bulima benu, khona nitewuphila nihambe ngendlela yekucondza.”

₇Naweluleka sedzeleli, utilandzela inhlamba; nawucondzisa umuntfu lomubi, utawusuke akulimate.

₈Ungaseluleki sedzeleli, ngobe sitakutondza; yeluleka lohlakaniphile, yena utakutsandza. ₉Nawuyala umuntfu lohlakaniphile, utawusuka ahlakaniphe kakhulu; nawufundzisa umuntfu lolungile, yena usuka engete kulokufundza kwakhe.

₁₀Kwesaba Simakadze kusicalo sekuhlakanipha, nekumati Longcwele kuba nekucondza sibili. ₁₁Mine kuhlakanipha, ngitakwandzisa emalanga akho neminyaka yekuphila kwakho. ₁₂Nawuhlakaniphile, kusitakala wena; kodvwa nangabe usedzeleli, kutawuhlupheka wena.

₁₃Bulima bufanana nemfati lonemsindvo, longalati lihlazo nalongati lutfo, ₁₄lohlala emnyango wendlu yakhe embonisweni yelidolobha, ₁₅amemete emadvodza lendlulako atihambela ngemisebenti yawo, atsi: ₁₆“Wotani lapha, nine tilima.” Ukhuluma kubo bonkhe labate lwati atsi: ₁₇“Emanti ekwebiwa amnandzi, nekudla lokudlelwa emasitseleni kwehla esiphundvu.”

₁₈Lendvodza lasayitfumbile ayati kutsi akuyi lolubuyako lapho, nekutsi labangena kuye basemajukujukwini elithuna.