Sihlabelelo 10

₁Simakadze, umeleni khashane?

Utifihleleni ngesikhatsi sisekuhluphekeni?

₂Ngekuchosha kwalomubi,

lomphofu uyahlupheka.

Lomubi akabanjwe

elugibeni lalwetsiyile.

₃Lomubi utigabatisa

ngetinkhanuko takhe;

uyamtusa lohlazisako,

yebo, lomubi wedzelela Nkulunkulu.

₄Lomubi uyatigabatisa, akanaki lutfo,

emicabangweni yakhe yonkhe, utsi:

“Kute Nkulunkulu.”

₅Lomubi uyaphumelela

etindleleni takhe tonkhe

ngaso sonkhe sikhatsi.

Tehlulelo taNkulunkulu

tiphakamele khashane kulomubi,

yebo, lomubi uchoshela titsa takhe.

₆Enhlitiyweni yakhe ucabanga utsi:

“Ngingeke nginyakatiswe,

ngingeke ngibe nenhlanhla lembi

titukulwane ngetitukulwane.”

₇Emlonyeni wakhe kugcwele

ticalekiso, nemacebo, nencindzetelo;

ngaphansi kwelulwimi lwakhe

kucambalale kuganga nebubi.

₈Lomubi uyacatsama abhace

etindzaweni letinematfunti emadolobheni,

ababulalele ematfuntini

labo labate licala,

emehlo akhe atse ndlo

kulabo langabehlula ngemandla.

₉Uyalala abhace njengelibhubesi,

nalibhacela kubamba inyamatane;

ubamba labo labehlulako,

ahudvule losihlupheki ngelinetha lakhe.

₁₀Lesihlupheki siyaphihlitwa

siwele phansi emhlabatsini;

ngako lesihlupheki sitikhandza

sesisesandleni sakhe lomubi.

₁₁Lomubi ucabanga enhlitiyweni yakhe utsi:

“Nkulunkulu akanendzaba, akanaki,

angeke abuke ngakimi

kuze kube phakadze naphakadze.”

₁₂Sukuma, Simakadze! Awu, Nkulunkulu!

Phakamisa sandla sakho!

Ungamkhohlwa losekuhluphekeni.

₁₃Kwentiwa yini kutsi

lomubi edzelele wena, Nkulunkulu?

Ucabangelani enhlitiyweni yakhe kutsi

wena ungeke umjezise?

₁₄Kantsi wena uyabona,

ngobe tinhlupheko netinsizi uyakunaka,

kuze ukufumbatse ngetandla takho.

Lohluphekile utinikela kuwe,

ngobe wena ungumsiti wetintsandzane.

₁₅Juba sandla salomubi losikhohlakali,

jezisa bubi bakhe,

kuze kubete lokusalako.

₁₆Simakadze uyiNkhosi,

phakadze naphakadze,

impela emahedeni ayakunyamalala

eveni lakhe.

₁₇Yebo, Simakadze!

Uyativa tifiso talabacotfo,

ucinise nenhlitiyo yabo.

Indlebe yakho iyabalalela,

₁₈kuze tintsandzane nalabacindzetelwe

babonelelwe ngekulunga.

Kute umuntfu walomhlaba

loyawuphindze abe yingoti.