Sihlabelelo 140

₁Simakadze,

ngisindzise kubantfu lababi,

ngephule kubantfu labatidlova,

₂bantfu labahlose lokubi

etinhlitiyweni tabo.

Onkhe emalanga

bacubungula emasu etimphi.

₃Balola tilimi tabo

tibe njengetetinyoka.

Sihlungu sato sisemilonyeni yabo. Cabanga.

₄Simakadze, ngeluse ungivikele

emandleni alababi;

ngephule kubantfu labatidlova,

labahlose kungigila ngiwe.

₅Bantfu labatigabatisako

bangibekele lugibe,

bangicuphe ngetintsambo telugibe,

bangibophele emafindvo endleleni yami. Cabanga.

₆Ngatsi kuwe, Simakadze:

“Wena unguNkulunkulu wami.”

Nkhosi, ngive nangikhalela lusito kuwe.

₇Awu, Simakadze, Nkulunkulu wami,

Msindzisi wami lonemandla,

wena uvikela inhloko yami

ngesikhatsi semphi.

₈Simakadze,

tifiso talababi ungatiphumelelisi,

ungawaphumelelisi emasu abo lamabi,

funa batigabatise. Cabanga.

₉Labo labangitungeletile

labatigcabhako

bubi labasongela kubenta kimi

abehlele kubo.

₁₀Shangatsi emalahle labovu lavutsako

angatfululelwa etikwabo,

bajikijelwe emgodzini loshonako,

bangaphindzi baphume.

₁₁Shangatsi labo labacambela labanye emanga,

bangete baphumelela.

Shangatsi bubi bungahlasela tidlova.

₁₂Ngiyati kutsi Simakadze

uyayimelela indzaba yalohluphekile,

awamelele nemalungelo alomphofu.

₁₃Impela labalungile

bayawubonga libito lakho,

labacotfo bayawuhlala ebukhoneni bakho.