Sihlabelelo 146

₁Mphefumulo wami,

dvumisa Simakadze.

₂Simakadze ngiyawumdvumisa ngisaphila,

ngihlabele kuNkulunkulu wami

yonkhe imphilo yami.

₃Ningetsembeli etikhulwini nakubantfu,

kute kubantfu lusito.

₄Nakuphuma umphefumulo,

umuntfu ubuyela emhlabatsini,

tinhloso netifiso takhe

tiphele ngalelo langa.

₅Ubusisiwe umuntfu

lomsiti wakhe kunguNkulunkulu waJakobe,

lolitsemba lakhe likuSimakadze,

Nkulunkulu wakhe.

₆Yena unguMdali wako konkhe:

Wadala lizulu, nemhlaba, nelwandle,

nako konkhe lokukuko.

Ugcina setsembiso sakhe

kuze kube phakadze.

₇Labacindzetelwe yena uyabemelela,

abaphe kudla labalambile.

Simakadze ukhulula tiboshwa,

₈Simakadze uvula emehlo etimphumphutse,

Simakadze uyabaphakamisa labatfotjisiwe,

Simakadze uyabatsandza labalungile.

₉Simakadze uyabalondvolota bafokati,

uyabaphasa bafelokati netintsandzane,

kodvwa indlela yalababi uyayibhubhisa.

₁₀Simakadze uyawubusa

kuze kube phakadze.

Nkulunkulu wakho, Siyoni,

ubusa kuto tonkhe titukulwane.

Haleluya, dvumisani Simakadze.