Sihlabelelo 31

₁Simakadze wena usiphephelo sami,

ungacali ungijabhise,

ngephule ngekulunga kwakho.

₂Sondzeta indlebe yakho,

ungephule ngekushesha,

bani lidvwala lesiphephelo sami

nenqaba yekungisindzisa.

₃Wena ulidvwala lami nenqaba yami,

ngihole ungicondzise

ngenca yelibito lakho.

₄Ngengcise elugibeni

labangiciphe ngalo,

ngobe wena usiphephelo sami.

₅Nginikela umoya wami esandleni sakho,

ungihlengile wena Simakadze;

unguNkulunkulu lowetsembekile.

₆Ngiyabatondza labakhonta tithico,

mine ngetsembele kuSimakadze.

₇Ngiyakwetsaba ngijabule ngemusa wakho,

ngobe wena ukubonile kuhlupheka kwami,

watati tinsizi temphefumulo wami.

₈Awunginikelanga esandleni sesitsa,

tinyawo tami utimise endzaweni lebanti.

₉Bani nemusa kimi, Simakadze,

ngobe ngisenhluphekweni,

emehlo ami asaphandlwe kuhlupheka,

kantsi umphefumulo wami nemtimba wami

kukhatsele tinhlupheko.

₁₀Kuphila kwami kuphelela elusizini,

neminyaka yami iphelela ekubibitsekeni;

emandla ami aphelile

ngenca yekona kwami,

nematsambo ami acindzetelekile.

₁₁Sengaba yinhlamba

ngenca yalabamelene nami,

ikakhulu kubomakhelwane bami;

labangatiko sebayangesaba,

nangihlangana nabo endleleni

bayangibalekela.

₁₂Angisakhunjulwa ngumuntfu,

ngifana nalofile;

senginjengembita lefile yalahlwa etaleni.

₁₃Yebo, ngiva labanyenti bayangihleba,

ngihlala ngetfuka tanya.

Bangakhela emacebo,

bahlose kungibulala.

₁₄Kodvwa mine ngetsembele kuwe, Simakadze,

ngitsi: “Wena unguNkulunkulu wami.”

₁₅Emalanga ekuphila kwami asesandleni sakho,

ngephule esandleni setitsa tami

nakubo labangitingelako.

₁₆Inceku yakho ayibuve bukhona bakho,

ngisindzise ngemusa wakho longapheli.

₁₇Simakadze, ungangidvumati nangikubita,

lababi abadliswe ngemahloni.

Abavalwe imilomo baye ekufeni.

₁₈Shangatsi imilomo lecala emanga

ingabindziswa,

ngobe ihlambalata lolungile,

ikhulume ngekutigcabha nangekwedzelela.

₁₉Maye, kuyaphuphuma kulunga kwakho,

lokulunga lokugcinele labo labakwesabako,

ukwente kulabo labakhosele kuwe,

ukubonakalise embikwebantfu.

₂₀Ubafihla ekusitsekeni kwebukhona bakho,

baphephe kulabo lababakhela lugibe;

ubabhacisa endlini yakho,

baphephe etinkhulumeni tembango.

₂₁Akadvunyiswe Simakadze,

ngobe umusa wakhe lomangalisako

uwentile kimi

ngesikhatsi bangivimbetela edolobheni.

₂₂Ngetfuka ngadzimate ngakhuluma ngatsi:

“Sengisusiwe ngacoshwa ebusweni bakho.”

Kodvwa wena wakuva kuncusa kwami,

nangicela lusito kuwe.

₂₃Tsandzani Simakadze,

nine nonkhe labangcwele bakhe.

Simakadze uyabagcina labetsembele kuye,

kodvwa uphindzisela kamatima kulabatatisako.

₂₄Cinani, tinhlitiyo tenu tibe nesibindzi,

nonkhe nine lenilindzele Simakadze.