Sihlabelelo 37

₁Ungatihluphi ngalababi,

ungahawukeli kulabenta lokubi.

₂Ngobe phela lababi

bayawusheshe bashate njengetjani,

babune njengembuya.

₃Tsemba kuSimakadze, wente lokuhle,

uhlale eveni, uve bumnandzi bekudla

emadlelweni laluhlata.

₄Yenta Simakadze abe yinjabulo yakho,

yena-ke utakupha lokufiswa yinhlitiyo yakho.

₅Nikela indlela yakho kuSimakadze,

umetsembe,

yena-ke uyawukutsatsela tinyatselo.

₆Kulunga kwakho uyawukwenta

kugcame njengekukhanya,

nebucotfo bakho bukhanye njengemini.

₇Thula embikwaSimakadze,

umlindzele ngesineke.

Ungahawukeli kumuntfu

lonotsa ngebucili bakhe.

₈Tibambe ungatfukutseli,

uluyekele lulaka, ungacansuki,

ngobe loko kubanga kona.

₉Benti balokubi batawushabalaliswa;

kodvwa labalindzela Simakadze

bayakudla lifa lemhlaba.

₁₀Emvakwesikhashana

benti balokubi bayawunyamalala,

uyakutsi uyabafuna bangabe basatfolakala.

₁₁Kodvwa labamnene bayawulidla lifa lemhlaba,

bahlale kahle,

batijabulise ngekuthula lokukhulu.

₁₂Lomubi usongela lolungile,

amsinekele ematinyo.

₁₃Kodvwa Simakadze uyamhleka lona lomubi,

ngobe uyabona kutsi sekuyamphelela.

₁₄Lababi bahosha inkemba,

bantsale imicibisholo ebutjokini,

bafuna kucedza labamphofu nalabeswele

babulale labo labahamba ngebucotfo.

₁₅Kodvwa inkemba yabo

iyawugwaza tinhlitiyo tabo,

imicibisholo yabo iyakwephuka.

₁₆Lokuhle lokuncane lanako lolungile,

kuncono kunemcebo wonkhe walababi.

₁₇Emandla alababi ayawukwephulwa,

kodvwa Simakadze uyabaphasa labalungile.

₁₈Simakadze uyawati emalanga alabacotfo,

nelifa labo liyawuhlala

lilabo phakadze naphakadze.

₁₉Bangeke bajabhiswe ngetikhatsi letimatima,

bayawuba nenala ngetikhatsi tendlala.

₂₀Kodvwa lababi bayawubhubha,

netitsa taSimakadze tishabalale

njengeluhlata lwemadlelo,

bayawunyamalala

baphele njengentfutfu.

₂₁Lomubi uyeboleka angabuyiseli,

kodvwa lolungile unesihawu, ephane.

₂₂Lababusiswe nguSimakadze

bayawulidla lifa lemhlaba;

kodvwa labacalekiswe nguye

bayawushabalaliswa.

₂₃Tinyatselo temuntfu

ticondziswa nguSimakadze.

Simakadze uyaticinisa

tinyatselo temuntfu lomjabulisako.

₂₄Nome awa, angeke ahlale angavuki,

ngobe Simakadze ubamba sandla sakhe.

₂₅Bengingumntfwana,

manje sengimdzala,

angizange sengimbone lolungile alahliwe,

ngisho nebantfwabakhe

abahambi bacela kudla.

₂₆Unesihawu lonkhe lilanga, ebolekise,

nebantfwana bakhe basibusiso.

₂₇Khwesha ebubini, wente lokuhle;

uhlale uphila njalonjalo.

₂₈Ngobe Simakadze uyakutsandza

kwenta tintfo ngendlela lefanele,

angeke abayekelele labangcwele bakhe.

Labalungile bayawulondvoloteka

phakadze naphakadze;

kodvwa bantfwana balomubi

bayawushabalaliswa.

₂₉Labalungile bayawudla lifa lemhlaba,

bahlale kulo kuze kube phakadze.

₃₀Tindzebe talolungile tikhuluma inhlakanipho,

lulwimi lwakhe lukhuluma loko lokufanele.

₃₁Umtsetfo waNkulunkulu

uhlala usenhlitiyweni yakhe njalo,

nekuhamba kwakhe akuphambuki.

₃₂Lomubi utingela lolungile,

ucondze kutsi ambulale.

₃₃Simakadze angeke amyekelele

esandleni salomubi,

futsi lowo lolungile

angeke alahlwe ngelicala,

nakehlulelwa.

₃₄Tsemba Simakadze,

ugcine indlela yakhe,

yena uyawukuphakamisa

udle lifa lemhlaba

ubone kushabalaliswa kwalababi.

₃₅Ngake ngabona lomubi asidlova,

watenweba njengesihlahla

semsedari waseLebanoni.

₃₆Wafa, kwaba kunyamalala kwakhe;

ngabatse ngiyamfuna

wangete watfolakala.

₃₇Ubombekisa lolungile,

umcaphelisise locotfo,

ngobe umuntfu wekuthula

unelikusasa lelihle;

₃₈kodvwa lababi bayawubhujiswa nya,

nebantfwababo bate likusasa.

₃₉Insindziso yalabalungile

iphuma kuSimakadze,

usiphephelo sabo

ngesikhatsi sekuhlupheka.

₄₀Simakadze uyabasita abakhulule,

ubephula abasindzise kulababi,

ngobe babalekela kuye,

abe siphephelo sabo.