Sihlabelelo 38

₁Awu, Simakadze,

ungangikhahli ngentfukutselo yakho,

ungangijezisi ngelulaka lwakho.

₂Imicibisholo yakho ingihlabe yangena,

nesandla sakho sehlele etikwami.

₃Sekute imphilo emtimbeni wami,

ngenca yelulaka lwakho;

kute ngisho nekuthula ematsanjeni ami,

ngenca yesono sami.

₄Tono tami tingigabhile,

ngisesiswa ngumtfwalo wato losindzako.

₅Tilondza tami tinuka luvundze,

tincinca bovu, ngenca yebulima bami,

₆ngikhonkhobele,

ngatfotjiswa kakhulu,

ngihamba ngikhala lilanga lonkhe.

₇Lukhalo lwami lucacamba kakhulu,

sekute imphilo emtimbeni wami.

₈Ngibutsakatsaka, ngidvubuteke kabi,

ngiyabubula ngenca yekutfutfumela

enhlitiyweni yami.

₉Nkhosi, kufisa kwami konkhe uyakwati,

kububula kwami akukafihleki kuwe.

₁₀Inhlitiyo yami iyagcuma,

ngiphelelwa ngemandla,

emehlo ami asacundzekile, akasaboni.

₁₁Bangani bami nebazalwane bami

sebangikhweshele,

ngenca yemanceba ami;

ngisho nebaketfu imbala

sebeme lapha khashane.

₁₂Bantfu labacondze kungibulala

bangetsiye ngetingibe,

labacondze kungilimata

bakhuluma ngekungicitsa bangibulale,

sonkhe sikhatsi bakha emacebo ebubi ngami.

₁₃Kodvwa mine, nginjengesihhulu, angiva;

nginjengesimungulu, angikhulumi.

₁₄Nginjengendvodza lengeva etindlebeni,

nalengakwati kutikhulumela.

₁₅Mine-ke, Simakadze,

ngime ngetsembele kuwe,

nguwe, Nkhosi, Nkulunkulu wami

lotawuphendvula.

₁₆Ngobe enhlitiyweni yami ngitsite:

“Bangahle bajabule ngami

ekusheleleni kwelunyawo lwami.

Shangatsi bangete bacolosha ngami.”

₁₇Ngobe sengisezingeni lekuwa,

nebuhlungu bami abusuki kimi.

₁₈Ngiyalivuma licala lekona kwami,

ngidzabukile ngenca yesono sami.

₁₉Titsa tami tiphila kahle tinemandla,

banyenti nalabangitondza ngaphandle kwesici.

₂₀Labo labangiphindzisela lokubi ngalokuhle,

batitsa tami,

ngobe ngilandzela lokulungile.

₂₁Hhawu, Simakadze! Ungangilahli!

Nkulunkulu wami, ungakhweshi kimi!

₂₂Phutfuma ungisite,

Nkhosi, nsindziso yami!