Sihlabelelo 40

₁Lusito lwaNkulunkulu

ngalulindzela ngesineke,

wavula indlebe yakhe,

wakuva kuncusa kwami.

₂Wangikhipha emgodzini wekufa,

wangikhipha eludzakeni lolubishako,

wasimisa tinyawo tami etikwelidvwala,

wacinisa kuhamba kwami.

₃Wafaka ingoma lensha emlonyeni wami,

ingoma yekudvumisa Nkulunkulu wetfu.

Labanyenti bayawubona bamesabe,

babeke litsemba labo kuSimakadze.

₄Ubusisiwe umuntfu

lobeke litsemba lakhe kuNkulunkulu,

longagucukeli kulabatigabatisako,

nakulabo labedukela etithicweni.

₅Yebo, Simakadze, Nkulunkulu wami,

timangaliso losentele tona tinyenti,

tingeke tibalwe,

wasikhumbula tikhatsi letinyenti.

Kute nome munye nje lofana nawe!

Kube bengingatilandzisa tonkhe

betingeke tibaleke tonkhe.

₆ Awujatjuliswa ngumhlatjelo nemnikelo,

kodvwa ujatjuliswa kusebentisa

tindlebe longiphe tona.

Awuzange sewusho

kutsi ufuna umhlatjelo loshiswa samuku,

nome umnikelo wekuhlawulela sono.

₇Ngase ngiphendvula ngitsi:

“Naku ngilapha!

Emculwini wencwadzi kubhalwe ngami.

₈Yebo, Nkulunkulu wami,

kujabula kwami

kusekwenteni intsandvo yakho,

imiyalo yakho isenhlitiyweni yami.”

₉Kulunga kwakho

ngakushumayela kulabanyenti.

Angikatibambi tindzebe tami,

naloko nguwe lokwatiko, Simakadze.

₁₀Kulunga kwakho

angikakufihli enhlitiyweni yami.

Ngashumayela ngekwetsembeka kwakho

nangensindziso yakho.

Umusa wakho neliciniso lakho

angilifihlanga emikhambatsini.

₁₁Hhawu, Simakadze,

ungangigodleli sihawu sakho;

shangatsi umusa wakho,

neliciniso lakho,

nekwetsembeka kwakho

kungangigcina njalonjalo.

₁₂Ngitungeletwe tinhlupheko letinyenti,

licala lekona lingigabhe

kangangekutsi angisaboni nekubona.

Letinhlupheko tinyenti

tendlula tinwele tenhloko yami,

sengilahlekelwe litsemba.

₁₃Akube kuhle kuwe, Simakadze!

Ase ungikhulule, Simakadze!

Phutfuma ungisite.

₁₄Bonkhe bantfu labafuna kungibulala

abahlazeke basangane.

Bantfu labangifisela lokubi

abancandzekiswe bahlazekile.

₁₅Abashaywe luvalo ngenca yelihlazo labo,

bonkhe labo labasho kimi batsi:

“Yehhehhe!”

₁₆Abatfokote bajabule kuwe,

bonkhe labakufunako,

labatsandza insindziso yakho

basho njalo batsi:

“Akudvunyiswe Simakadze!”

₁₇Nome ngihlupheka ngimphofu,

kepha iNkhosi iyanginakekela.

Wena ungumsiti wami nemkhululi wami;

Nkulunkulu wami, ungalibali.