Sihlabelelo 5

₁Awu, Simakadze, lalela emavi ami,

ubeke indlebe yakho kuwo,

ungivele nangibubula kuwe.

₂Vani livi lekukhala kwami,

ungisite, Nkhosi yami naNkulunkulu wami,

ngobe ngithandaza kuwe, Simakadze.

₃Simakadze, nakudzabuka kusa,

uyaliva livi lami;

nakudzabuka kusa,

ngihlela ticelo tami kuwe,

bese ngiyema ngilindzela wena.

₄Ngobe wena, Simakadze,

unguNkulunkulu longakutsandzi lokubi,

lomubi angeke akhone kuhlala nawe.

₅Labatigabatisako bashayeka phansi

nawubhekisa buso bakho ngakubo.

Uyabatondza bonkhe labenta lokubi.

₆Uyababhubhisa labacala emanga.

Simakadze uyamenyanya umbulali,

futsi uyamenyanya lonemacebo.

₇Kepha mine ngiyawungena endlini yakho

ngekwengcebo yemusa wakho,

ngikukhonte ngenhlonipho yekwesaba

ethempelini lakho lelingcwele.

₈Simakadze, ngihole ngekulunga kwakho,

ngobe nginetitsa,

condzisa indlela yakho embikwami.

₉Kute liciniso emlonyeni wato,

etinhlitiyweni tato kunekubulala,

umphimbo wato ulithuna lelivulekile,

lulwimi lwato lunebucili.

₁₀Tilahle ngelicala lato, Nkulunkulu,

tente tibanjwe nguleto tingibe tato,

tidzingise ngenca yetono tato letinyenti,

ngobe phela setikuhlubukile.

₁₁Kepha abajabule bonkhe lababalekele kuwe,

abahlabele ngenjabulo

kuze kube phakadze.

Babiyele labo labakutsandzako,

kuze badvumise libito lakho.

₁₂Simakadze, nguwe lobusisa lolungile.

Umfukamela ngemusa wakho,

kube shangatsi kungelihawu.