Sihlabelelo 58

₁Kambe ngabe nine baholi

nehlulela ngalokulungile yini?

Bantfu nibehlulela ngekulunga yini?

Anehluleli ngekukhetsa yini?

₂Ingani etinhlitiyweni tenu

niphehla imisebenti lemibi,

tandla tenu ticaphele

kwenta budlova emhlabeni.

₃Bantfu lababi batsi batalwa nje,

babe bangenela indlela lembi,

bacale emanga.

₄Sihlungu sabo

sinjengesihlungu senyoka,

banjengaphemphetfwane

lovale tindlebe takhe,

₅entela kungaliva

liphimbo lalabenta imilingo,

nome-ke sebalumba emalumbo

ngekuhlakanipha.

₆Hhawu, Nkulunkulu,

hhohlota ematinyo lasemilonyeni yabo,

wephule imihlatsi yelibhubesi, Simakadze.

₇Abashabalale njengemanti lageletako,

abuye ashone phansi esihlabatsini;

imicibisholo yabo ayibe tidlindzi

nabajijimeta ngayo.

₈Bente bancibilike baphele

njengemnenkhe lohamba unafutela;

babe njengemntfwana lotalwe asafile,

longazange alibone nelilanga.

₉Ngekutumeka lokukhulu

Nkulunkulu uyawubaphephula

bonkhe lababi, ababhubhise,

njengelibhodo lelitsi

lisandza kubekwa nje etiko,

lisengakawuva nalowo mlilo,

kufike umoya lomkhulu

uphephule letinkhuni,

nome tomile nome timanti.

₁₀Labalungile bayawujabula

nababona kuphindziselwa kwalababi,

bayawuklabhuta ngetinyawo tabo

engatini yalababi.

₁₁Bantfu batabe sebatsi:

“Ngempela lolungile uyavuzwa,

ngempela ukhona Nkulunkulu

lowehlulela emhlabeni.”