Sihlabelelo 61

₁Lalela kukhala kwami, Nkulunkulu,

uve umthandazo wami.

₂Ngikhala kuwe ngikhashane,

emajukujukwini emhlaba,

ngesikhatsi inhlitiyo yami idzangele.

Ngiholele edvwaleni

leliphakeme kakhulu kunami.

₃Ngobe wena usiphephelo sami,

uyinqaba lengumbhoshongo locinile

wekungivikela esitseni sami.

₄Ngiyawukhosela endlini yakho

kuze kube phakadze!

Ngiyawukhosela ngaphansi kwemaphiko akho. Cabanga.

₅Wena, Nkulunkulu,

utivile tetsembiso tami,

ngobe nguwe lobanika lifa,

labo labalesabako libito lakho.

₆Yenta inkhosi ikhule ize ikhokhobe,

yengeta emalanga ekuphileni kwenkhosi,

ime titukulwane ngetitukulwane.

₇Ebukhoneni bakho, Nkulunkulu,

inkhosi ayihlale esihlalweni sebukhosi,

ibuse kuze kube phakadze;

uyilondvolote ngemusa wakho

nangekwetsembeka kwakho.

₈Ngako libito lakho ngiyawulidvumisa

kuze kube phakadze,

kuze ngigcwalise tetsembiso tami

imihla ngemihla.