Iinkcukacha ezongezelelweyo

Sihlabelelo 67

Sihlabelelo lesiyingoma lesetfulwe kumhlabelisi kutsi sihlatjelwe ngetingubhu letinetintsambo.

₁Shangatsi Nkulunkulu

angaba nemusa kitsi, asibusise,

akhanyise buso bakhe etikwetfu. Cabanga.

₂Indlela yakho ayatiwe emhlabeni wonkhe,

kwatiwe nensindziso yakho etiveni tonkhe.

₃Tive atidvumise wena, Nkulunkulu,

tonkhe tive atidvumise wena.

₄Tive atihlabele ngenjabulo,

ngobe wehlulela tive ngebucotfo,

uhole tonkhe tive temhlaba. Cabanga.

₅Tive atidvumise wena, Nkulunkulu,

tonkhe tive atidvumise wena.

₆Umhlaba waba nesivuno lesihle senala,

Nkulunkulu,

longuNkulunkulu wetfu,

usibusisile.

₇Nkulunkulu usibusisile,

yonkhe imikhawulo yemhlaba ayesabe yena.