Sihlabelelo 7

₁Yebo, Simakadze, Nkulunkulu wami,

sengiphephele kuwe,

ngisindzise ungiphephise

kubo bonkhe labangitingelako,

₂kuze umphefumulo wami

bangawudzabudzabuli

njengelibhubesi lelidzabudzabula

kubete nalolamulako.

₃Simakadze, Nkulunkulu wami,

nangabe kukhona lokubi etandleni tami,

₄nangiphindzisele ngalokubi kumnganami,

nome ngaphanga sitsa sami

ngaphandle kwesono,

₅nakunjalo-ke:

Sitsa sami asingitingele size singibambe,

siyigcobagcobe emhlabatsini imphilo yami,

ludvumo lwami luphelele elutfulini. Cabanga.

₆Simakadze!

Sukuma ngentfukutselo yakho.

Vuka ungimele elulakeni lwetitsa tami.

Nkulunkulu wami, vuka ungisite.

Nguwe wedvwa lonesehlulelo lesimsulwa.

₇Inhlangano yetive ayisondzele ikuhace,

bese uyayibusa

usesihlalweni sakho sebukhosi.

₈Simakadze akehlulele tive.

Simakadze, ngehlulele ngekulunga kwami,

uhlole nebucotfo bami.

₉Ncandza bubi balababi,

wakha lolungile,

ngobe nguwe Nkulunkulu wekulunga

lohlola tingcondvo netinhlitiyo.

₁₀Nkulunkulu usihlangu sami,

yena usindzisa labacotfo ngenhlitiyo.

₁₁Nkulunkulu ungumehluleli lolungile,

yena unguNkulunkulu lophambana nebubi

onkhe emalanga.

₁₂Nangabe umuntfu angaphendvuki,

Nkulunkulu ulola inkemba yakhe,

antsalele kunemba ngebutjoki bakhe,

₁₃ulungisa tikhali takhe letinebutsi,

ente imicibisholo yakhe ivutse umlilo.

₁₄Asubuke nje kutsi lomubi unemhelo webubi,

wemitsa kuganga, atale emanga.

₁₅Umba umgodzi wekuhholokoshisela labanye,

bese kuhholokoshela yena

kulomgodzi lawumbile.

₁₆Kuganga kwakhe kubuyela enhloko yakhe,

buhlophoyi bakhe behlele ebuntini lakhe.

₁₇Simakadze ngiyawumbonga

ngekulunga kwakhe,

ngihlabelele ngekudvumisa libito

laSimakadze Losetikwako Konkhe.