Sihlabelelo 72

₁Awu, Nkulunkulu! Nika inkhosi

likhono lakho lekwehlulela

nekubusa ngebucotfo

unike lomntfwanenkhosi kulunga kwakho.

₂Shangatsi ingehlulela sive sakho ngekulunga,

nalabamphofu ibaphatse ngebucotfo.

₃Tintsaba tiyawuletsa kuthula kubantfu,

kanjalo nemagcuma kuchuma kwekulunga.

₄Shangatsi ingabavikela

bantfu labatimphofana,

ikhulule labeswele,

ipitjite bacindzeteli!

₅Shangatsi bangesaba wena,

bakwesabe emini kukhanya lilanga,

bakwesabe nome sekukhanya inyanga,

titukulwane ngetitukulwane.

₆Shangatsi inkhosi ungayenta ibe

njengemvula nayehlela emadlelweni,

nanjengemvula nayinisela umhlabatsi.

₇Shangatsi ngemalanga ayo

kungandza kulunga,

kwandze nekuthula siphelane.

₈Shangatsi bukhosi bayo

bungagcwala umhlaba,

busuke elwandle buye

bufike elwandle lolunye;

busuke eMfuleni,

buze bufike ekugcineni kwemhlaba.

₉Shangatsi tive letihlala ehlane

tingakhotsama embikwayo,

netitsa tayo tiyikhotsamele.

₁₀Shangatsi emakhosi aseThashishi

nasetichingini,

angetfula tipho kuyo.

Shangatsi emakhosi aseSheba newaseSeba

angetfula kuyo imitselo yawo.

₁₁Shangatsi onkhe emakhosi

angakhotsama kuyo,

netive tonkhe tiyikhonte.

₁₂Iyamkhulula loyibitako,

naloweswele, nalomphofu, nalote umsiti.

₁₃Inesihe kulababutsakatsaka nalabeswele,

isindzise kuphila kwalabeswele.

₁₄Ikhulula kuphila kwalabo

labasekubandzetelweni nasebudloveni,

ingati yabo iligugu emehlweni ayo.

₁₅Shangatsi ingakhula idzimate ikhokhobe,

iphiwe negolide yaseSheba.

Shangatsi ingathandazelwa njalonjalo,

icelelwe tibusiso taNkulunkulu

ngato tonkhe tikhatsi.

₁₆Shangatsi kungaba nenala emasimini,

lenala isibekele ticongo tetintsaba,

kube tiphihli,

sincane setihlahla taseLebanoni.

Shangatsi lamadolobha angagcwala bantfu,

babe ngangetjani.

₁₇Shangatsi libito layo

lingahlala ingunaphakadze,

lichubeke latiwe njengelilanga.

Tive tonkhe atibusiswe ngayo;

tiyawumbita ngekutsi

yinkhosi lebusisekile.

₁₈Akabongwe Simakadze, Nkulunkulu,

nguye longuNkulunkulu wema-Israyeli,

nguye yedvwa lowenta timangaliso.

₁₉Alibongwe libito lakhe lenkhatimulo,

libongwe kuze kube phakadze,

shangatsi umhlaba wonkhe

ungagcwala inkhatimulo yakhe.

Amen! Yebo, Amen!

₂₀Siphetfo semithandazo yaDavide,

umsa waJese.