Sihlabelelo 78

₁Hhawu, sive sami!

Lalelani imfundziso yami,

nibeke indlebe emavini ami.

₂Ngitawufundzisa ngemifanekiso,

ngikhulume imfihlakalo yasemandvulo.

₃Tindzaba lesake sativa satati,

ngekutekelwa bokhokho betfu,

₄natsi siyawutitekela batukulu betfu,

sitjele titukulwane letitako,

sitifundzise imisebenti yebukhosi,

kanye nemandla aSimakadze,

kanye netimangaliso latentile.

₅Wamisa bufakazi kubakaJakobe,

washaya umtsetfo esiveni saka-Israyeli;

wayala ngawo bokhokho betfu

kutsi bawufundzise bantfwababo,

₆kuze nesitukulwane lesilandzelako siwati,

nebatukulu babo labasetawutalwa,

nabo bakhule batjela bantfwababo.

₇Litsemba labo batawulibeka kuNkulunkulu,

kuze bangayikhohlwa

imisebenti yaNkulunkulu,

kepha bagcine imiyalo yakhe;

₈bangenti njengobe kwenta bokhokho

lekwakusitukulwane lesinenkhani

nalesihlubukako,

situkulwane lesite inhlitiyo lenebucotfo,

nalesasinemoya longaketsembeki kuSomandla.

₉Baka-Efrayimu lababehlome butjoki

babaleka, mhlazana ibambene ngetihlutfu.

₁₀Abasigcinanga sivumelwane saNkulunkulu,

bala kuhamba ngemtsetfo wakhe.

₁₁Bakhohlwa ngimisebenti layentile

netimangaliso takhe labakhombisa tona.

₁₂Wenta timangaliso embikwabokhokho babo,

endzaweni yaseSowani eveni laseGibhithe.

₁₃Wehlukanisa lwandle, wabeweta kulo,

wemisa emanti,

kwaba shangatsi tindvonga.

₁₄Emini abebahola ngelifu,

kutsi ebusuku abahole ngemlilo.

₁₅Wacheketa emadvwala ehlane,

wabanatsisa badzimate bakholwa.

₁₆Wamilisa imifula edvwaleni,

wageletisa emanti shangatsi ngimifula.

₁₇Noko, bachubeka nekumona,

bamhlubuka ehlane Losetikwako Konkhe.

₁₈Nkulunkulu bamlinga etinhlitiyweni tabo

ngekumfuna kudla lababekufisa.

₁₉Bakhuluma kabi ngaNkulunkulu batsi:

“Nkulunkulu angasondla yini lapha ehlane?

₂₀Washaya lidvwala kwageleta emanti,

imifula yagcwala, yaphuphuma.

Pho, angasipha yini kudla

alungiselele sive sakhe inyama?”

₂₁Ngako-ke watsi Simakadze

nakuva loko watfukutsela,

kwavutsa umlilo wadla bakaJakobe,

intfukutselo yakhe yabavutsela bakaJakobe,

₂₂ngobe babengakholwa kuNkulunkulu,

bangete bawetsemba

emandla akhe lasindzisako.

₂₃Wabe sewuyala tibhakabhaka etulu,

lizulu lavula iminyango,

₂₄wanisa imana kutsi bantfu badle,

wabapha emabele asezulwini.

₂₅Bantfu badla sinkhwa setingilosi,

wabanika kudla lokwenele.

₂₆Wenta umoya wemphumalanga

kutsi uphephetse emazulwini,

emandla akhe abuyisa umoya waseningizimu.

₂₇Wanisa inyama yaba ngangelutfuli,

tinyoni taba ngangetihlabatsi tetilwandle.

₂₈Lenyama wayinisa

emkhatsini wemathende abo,

nasemaceleni kwemathende abo.

₂₉Badla bashaya sentfwala,

ngobe abebaphe loko babekuhalela.

₃₀Kodvwa kwatsi basengakeneliseki

ebudlini babo,

kudla kusagcwele imilomo yabo,

₃₁Nkulunkulu wabavukela ngelulaka,

wabulala bonkhe lababenemandla babo,

wagicita phansi emajaha aka-Israyeli.

₃₂Etikwako konkhe loku

bajinge bachubeka nekona kwabo,

abazange bakholwe netimangaliso takhe.

₃₃Ngako wenta kutsi emalanga abo

endlule ashabalale njengemoya,

neminyaka yabo yacedvwa tehlakalo.

₃₄Ngesikhatsi ababhubhisa babetiletsa kuye,

baphendvuke bafunisise Nkulunkulu.

₃₅Bakhumbula kutsi Nkulunkulu ulidvwala labo,

Nkulunkulu Losetikwako Konkhe

ungumhlengi wabo.

₃₆Kodvwa babencempheta ngemilomo yabo,

bacala emanga kuye ngetilwimi tabo,

₃₇inhlitiyo yabo yayingakemi kuye,

bangaketsembeki evini lesivumelwane naye.

₃₈Kodvwa yena waba nesihawu,

watisibekela tono tabo,

akazange ababhubhise abacedze.

Kanyenti watibamba ekutfukutseleni kwakhe,

akaluvusanga lonkhe lulaka lwakhe.

₃₉Wakhumbula kutsi

batidalwa letabunjwa ngenyama,

banjengemoya lotsi hasha,

uhambe siphelane.

₄₀Kukanyenti kangakanani bamhlubuka ehlane,

bamdzabukisa ehlane kalashameshame.

₄₁Balinga Nkulunkulu njalonjalo,

bacansula Longcwele waka-Israyeli.

₄₂Babengayikhumbuli imisebenti yemandla akhe,

nelilanga mhlazana abahlenga esitseni,

₄₃ngesikhatsi enta tibonakaliso takhe eGibhithe,

enta netimangaliso takhe eveni laseSowani.

₄₄Imifula yabo wayigucula yaba yingati,

ngako behluleka kunatsa kuyo lemifula.

₄₅Wabatfumelela emabulo etibawu, tabaluma,

kanye neticoco letaba yimbhubhiso leluhlupho.

₄₆Watfumela tintsetse,

tacedza tilimo tabo,

sikhonyane sadla titfukutfuku tabo.

₄₇Wavitsita imivini yabo ngesangcotfo,

washaya nemikhiwane yabo ngesitfwatfwa.

₄₈Wanikela tinkhomo tabo ngesangcotfo,

netimvu tabo ngemibane.

₄₉Watfukulula intfukutselo yakhe levutsako,

lulaka, nentfukutselo, neluhlupho,

nesishoshomane setitfunywa temashwa.

₅₀Wadedela lulaka lwakhe,

wangete walubamba,

wangete wawuphephisa

umphefumulo wabo ekufeni,

kodvwa timphilo tabo

watinikela ngetifo letibulalanako.

₅₁Wabulala onkhe ematubulo aseGibhithe,

lekwakungumgogodla wemphi

emathendeni aHhamu.

₅₂Kepha wakhipha sive sakhe njengetimvu,

wasihola ehlane njengemhlambi wakhe.

₅₃Wabahola baphepha bangesabi lutfo,

kepha lwandle lwatimbonya titsa tabo.

₅₄Wabayisa eveni lakhe lelingcwele, letintsaba,

lalitfola ngesandla sakhe sekudla.

₅₅Wacosha tive embikwabo,

lelive walenta laba lifa labo,

lapho imindeni yaka-Israyeli

yayingamisa khona emathende ayo.

₅₆Noko bamlinga bamhlubuka

Nkulunkulu Losetikwako Konkhe,

bangete bayigcina imiyalo yakhe.

₅₇Benta bucili, bahlubuka,

njengabokhokho babo,

bajikajika njengesigwegwe sebutjoki.

₅₈Bamtfukutselisa ngetindzawo tabo temalati,

lapho bakhonta khona tithico tabo letibatiwe,

loko kwamenta waba nesikhwele.

₅₉Watsi nakuva loko Nkulunkulu, watfukutsela,

wabalahla baka-Israyeli.

₆₀Wayidzikila indlu yakhe lengcwele leseShilo,

lithende labehlala kulo emkhatsini webantfu,

₆₁wayekelela titsa,

tatfumba libhokisi lesivumelwane

lelisiboniso semandla nenkhatimulo yakhe.

₆₂Sive sakhe wasinikela enkembeni,

walitfukutselela lifa lakhe.

₆₃Emajaha abo acotfulwa ngumlilo,

tintfombi tabo tandzindza lababengatiteka.

₆₄Baphristi babo baba kudla kwenkemba,

bafelokati babo abazange babalilele.

₆₅Simakadze, Nkulunkulu,

wavuka, njengalophaphama ebutfongweni,

nanjengesichwaga lebesesehlulwe tjwala.

₆₆Watehlula watihlehlisela nyova titsa takhe,

watitsela ngelihlazo laphakadze.

₆₇Wawufulatsela umndeni wakaJosefa,

wangete wasikhetsa sive saka-Efrayimu.

₆₈Kepha wakhetsa sive sakaJuda,

iNtsaba iSiyoni,

labeyitsandza kakhulu.

₆₉Wayakha indlu yakhe lengcwele,

leyayiphakeme kakhulu

njengemhlaba lawusekela,

kuze kube phakadze naphakadze.

₇₀Wakhetsa Davide, inceku yakhe,

wamlandza ekweluseni timvu,

₇₁nasekunakekeleni timvukati nemazinyane ato,

kutsi atekwelusa bakaJakobe,

sive sakhe,

yebo, baka-Israyeli labalifa lakhe.

₇₂Wabelusa ngebucotfo benhlitiyo,

wabahola ngenhlakanipho

nangebungcweti besandla sakhe.