Sihlabelelo 81

₁Hlabelani kuNkulunkulu longemandla etfu,

jabulani nidvumise Nkulunkulu waJakobe.

₂Calani ingoma, nishaye tingubhu,

netingitali kanye nemahabhu.

₃Vutselani impalampala

ekwetfwaseni kwenyanga,

nangesikhatsi seyidvulungile

ngelilanga lemkhosi wetfu.

₄Ngobe loku kusimiso saka-Israyeli,

nemtsetfo waNkulunkulu waJakobe.

₅Wakwenta kwaba ngumtsetfo kuJosefa,

mhlazana ayawukulwa nemaGibhithe.

Ngeva livi lengangingalati litsi:

₆“Mine ngesusa umtfwalo emahlombe enu,

nganiphumuta ekwetfwaleni kwenu titini.

₇Nangibita nisebunzimeni nganephula,

nganiphendvula ngingale kwemafu lahlomile,

nganivivinya emitfonjeni yaseMeribha. Cabanga.

₈“Lalelani, sive sami, nginiyale:

Awu, ma-Israyeli!

Shangatsi ngabe niyangilalela.

₉Ningamkhonti lomunye nkulunkulu,

ningakhuleki kubonkulunkulu betive.

₁₀Ngimi Simakadze longuNkulunkulu wenu,

lowanikhuphula eveni laseGibhithe.

Khamisisani imilomo yenu,

mine-ke ngitanifunta nginesutsise.

₁₁“Kepha sive sami asililalelanga livi lami.

Israyeli akazange anginake.

₁₂Ngako-ke ngabayekelela

enkhanini yetinhlitiyo tabo,

kuze batihambele ngekutsandza kwabo.

₁₃Maye, kube sive sami siyangilalela

na-Israyeli ahambe etindleleni tami!

₁₄Titsa tabo bengitatehlula ngekushesha,

ngesandla sami bengitawumelana netitsa tabo.

₁₅Labangitondzako bebetawuta embikwami,

bete bashosha phansi ngemadvolo,

kujeziswa kwabo kuhlale ingunaphakadze.

₁₆Bengiyawunipha kolo lomnandzi kakhulu,

yebo, bengiyawunesutsisa

ngeluju lwetinyosi temadvwala.”