Sihlabelelo 94

₁Yebo, Simakadze,

nguwe Nkulunkulu wemphindziselo!

Wena unguNkulunkulu wekuphindzisela.

Phumela ebaleni ukhanye.

₂Phakama, Mehluleli wemhlaba,

uphindzisele kubemhlaba labatidlako.

₃Awu, Simakadze!

Kuyawuze kube ngunini

lababi batikhukhumeta?

Kuyawuze kube ngunini

lababi bachoshile?

₄Kuyawuze kube ngunini

lababi batidla

bakhuluma kabi bahlambalata?

₅Simakadze, sive sakho bayasipitjita,

balinyatsela phansi lifa lakho.

₆Babulala bafelokati, netihambi,

basontse netintsandzane,

ngobe tite boyise.

₇Batsi: “Simakadze akaboni,

Nkulunkulu waJakobe akanaki.”

₈Caphelani nine leninenhloko lelukhuni,

emkhatsini wesive.

Nine tilima, niyawuhlakanipha nini?

₉Nguye lowadala indlebe,

pho, angehluleka yini kuva?

Nguye lowadala liso,

pho, angehluleka yini kubona?

₁₀Nguye longumcondzisi wetive,

pho, angeke ehlulele yini?

Nguye lofundzisa lwati

kubo bonkhe bantfu,

pho, angabate kanjani lwati?

₁₁Simakadze uyayati imicabango yebantfu,

kutsi ifana nemoya lotsi shwi wendlule.

₁₂Yebo, Simakadze!

Ubusisiwe umuntfu loyalwa nguwe,

afundziswe nguwe emtsetfweni wakho,

₁₃umuphe kuthula ngesikhatsi sebumatima,

kusambiwa umgodzi wekuchilitela lababi.

₁₄Ngobe Simakadze angeke asilahle sive sakhe,

angeke alishiye lifa lakhe.

₁₅Kulunga kuyawuphindze

kubuyele ekwehlulelweni,

bonkhe labacotfo ngenhlitiyo

bayawukulandzela.

₁₆Ngubani longangisita kulababi?

Ngubani longangiphendvula

kulabaphambene nami?

₁₇Kube Simakadze abengesilo lusito lwami,

ngabe ngasheshe ngafa.

₁₈Ngatsi nangifuna kutsi:

“Naku sengiwa,”

Simakadze wangisekela ngemusa wakhe,

ngabuye ngema futsi.

₁₉Ngesikhatsi inhlitiyo yami

iphitsiteliswa ngimicabango,

kudvudvuta kwakho

kuyawutfokotisa umphefumulo wami.

₂₀Babusi lababi bangaba

nenhlanganyelo yini nawe,

labo labenta bubi

kube shangatsi ngumtsetfo?

₂₁Bakha lisu lekuhlasela labalungile,

balahla bantfu labangenacala.

₂₂Kodvwa Simakadze uyinqaba yami,

Nkulunkulu wami ulidvwala

lelisiphephelo sami.

₂₃Uyawukwehlisela tono tabo etikwabo,

ababhubhise ngenca yebubi babo;

Simakadze, Nkulunkulu wetfu,

uyawubabhubhisa.