Sembulo 20

₁Ngase ngibona ingilosi yehla ezulwini, esandleni sayo yayiphetse sikhiya semgodzi longenamkhawulo neluketane lolukhulu. ₂Yabamba nyokangwenya, inyoka lendzala, lekutsiwa nguMhlebi nome nguSathane; yambopha ngeluketane iminyaka leyinkhulungwane. ₃Yamjika emgodzini longenamkhawulo, yamvalela yase ibeka luphawu etikwakhe, kutsi angasaphindzi edukise tive, kuze kuphele leminyaka leyinkhulungwane. Emvakwaloko kufanele akhululwe sikhashane.

₄Ngase ngibona tihlalo tebukhosi, labo bebahleti kuto banikwa emandla ekwehlulela. Ngabona nemiphefumulo yalabo bebancunywe tinhloko ngenca yekufakaza kwabo ngaJesu, nangenca yekushumayela kwabo livi laNkulunkulu. Abazange bavume kusikhonta lesilo nome umfanekiso waso, abazange balwemukela neluphawu lwaso emabuntini abo nasetandleni tabo. Bavuka ekufeni, babusa naKhristu iminyaka leyinkhulungwane. ₅Laba labanye lababefile abazange bavuke ekufeni, kwadzimate kwaphela iminyaka leyinkhulungwane. Loku kuvuka ekufeni kwekucala. ₆Babusisiwe futsi bangcwele labo labahlanganyela ekuvukeni kwekucala. Kufa kwesibili kute emandla etikwabo, kodvwa bayawuba baphristi baNkulunkulu naKhristu, bayawubusa naye iminyaka leyinkhulungwane.

₇Kuyawutsi kube kuphele iminyaka leyinkhulungwane, Sathane uyawukhululwa ekuboshweni kwakhe. ₈Uyawutsi nasaphumile ahambe ayewudukisa boGogi naMagogi, tive letisemagunjini omane emhlaba, kutsi atihlanganisele imphi. Letinye tingangesihlabatsi saselwandle. ₉Tenyuka tahlakateka nemhlaba wonkhe, tafike tatungeleta inkambu yebantfu baNkulunkulu nemuti lotsandzekako. Kwehla umlilo uphuma ezulwini, watidla tonkhe. ₁₀Sathane labedukise leto tive wabanjwa, wajikwa echibini lemlilo lonesibabule, lapho bekukhona khona silo kanye nemphrofethi wemanga. Bayawuhlushwa batfoseke imini nebusuku phakadze naphakadze.

₁₁Ngase ngibona lesikhulu sihlalo sebukhosi lesimhlophe, nalohleti kuso. Lizulu nemhlaba kwambalekela kwanyamalala ebusweni bakhe, akuzange kuphindze kutfolakale ndzawo. ₁₂Ngabona labafile, labakhulu nalabancane, beme embikwaso lesihlalo sebukhosi. Tincwadzi tavulwa. Nalenye incwadzi yavulwa, incwadzi yekuphila. Labafile behlulelwa ngekwemisebenti yabo, ngaloko lokwakubhalwe etincwadzini. ₁₃Lwandle lwakhipha labafile lababekulo, kufa nendzawo yalabafile kwaniketa labafile lababekuko; bonkhe bantfu behlulelwa ngekwemisebenti yabo. ₁₄Kufa nendzawo yalabafile kwajikwa echibini lemlilo. Loku kufa kwesibili, lichibi lelivutsa umlilo. ₁₅Lowo libito lakhe lelalingakabhalwa encwadzini yekuphila, wajikwa echibini lelivutsa umlilo.