KubaseRoma 13

₁Wonkhe umuntfu kufanele atitfobele ngenhlonipho tiphatsimandla tembuso, ngobe kute emandla embuso langaveli kuNkulunkulu, naleto tiphatsimandla letikhona tibekwe nguNkulunkulu. ₂Ngako-ke lowo lomelana nemandla embuso umelana nalokumiswe nguNkulunkulu, nalabo labenta loko batibangela kwehlulelwa. ₃Ngobe babusi abesabeki kulabo labenta lokuhle, kodvwa besabeka kulabo labenta lokubi. Ungatsandza yini kutsi ungamesabi losiphatsimandla sakho? Ngako yenta lokuhle, utakudvumisa. ₄Ngobe usisebenti saNkulunkulu lesikwentela lokuhle. Kodvwa nawenta lokubi, mesabe, ngobe unawo emandla ekukujezisa. Usisebenti saNkulunkulu, lesingumphindziseli lowehlisela lulaka lwaNkulunkulu kulowo lowenta lokubi. ₅Ngako-ke umuntfu akatitfobe ngenhlonipho, hhayi ngobe abalekela lulaka lwaNkulunkulu kuphela, kodvwa nangebucotfo banembeza.

₆Kungaso lesizatfu nitsela nje; letiphatsimandla letitisebenti taNkulunkulu ngetaloko, njengobe titinikela emsebentini wato. ₇Bonkhe banikeni lokubafanele: umtselo kulofanelwe ngumtselo, inkhokhelo kulofanele kukhokhelwa; mesabeni lofanele kwesatjwa, nihloniphe lofanele kuhlonishwa.

₈Ningakweledi muntfu nome seyini ngaphandle kwekutsi nitsandzane, ngobe lowo lotsandza makhelwane wakhe sewuwugcwalisile umtsetfo. ₉Lemiyalo letsi: “Ungaphingi, ungabulali, ungebi, ungafisi,” nome sengumuphi-ke lomunye umyalo, yonkhe imiyalo ihlanganiswe kulomusho munye lotsi: “Tsandza makhelwane wakho, njengobe utitsandza wena.” ₁₀Lutsandvo alukwenti lokubi kumakhelwane; ngako-ke lutsandvo lukugcwaliseka kwemtsetfo.

₁₁Yentani loko nati kutsi sikhatsi sesifikile, ngiso lesikhatsi sekutsi nivuke ebutfongweni. Ngobe nyalo insindziso yetfu seyisedvute kunangalesa sikhatsi lesakholwa ngaso. ₁₂Busuku sebuyaphela, imini seyisondzele. Ngako-ke asilahle yonkhe imisebenti yebumnyama, sihlome tikhali tekukhanya. ₁₃Asitiphatse ngalokufanele njengalabahamba emini, hhayi ngekumita nangekudzakwa, hhayi ngekuphinga nangekugwadla, hhayi ngekucabana nangemona, ₁₄kodvwa yembatsani iNkhosi Jesu Khristu ninganakekeli kutsi lesimo senu semtimba lesonakele ningasenelisa kanjani ngetinkhanuko taso.