Ingoma Yetingoma 2

₁Ngiyimbali yaseSharoni,

umnduze wetigodzi.

₂Njengemnduze emkhatsini wemanyeva,

unjalo lotsandzekako wami emkhatsini wetintfombi.

₃Njengesihlahla semahhabhula

emkhatsini wetihlahla telihlatsi,

unjalo lotsandzekako wami emkhatsini wemajaha.

Ngiyakujabulela kuhlala emtfuntini wakhe,

nesitselo sakhe siyanongotela, nangisinambitsa.

₄Ungitsetse wangiyisa endlini yelidzili,

luphawu lwakhe kimi bekulutsandvo.

₅Ngiciniseni ngemagelebisi lomisiwe,

ningihlumelelise ngemahhabhula,

ngobe ngiyafa lutsandvo.

₆Umkhono wakhe wangesancele

ungumcamelo wenhloko yami,

nemkhono wakhe wangesekudla uyangigona.

₇Ngiyaniyala, madvodzakati aseJerusalema,

ngetimphala nangetinyamatane letinsikati tesiganga,

ngitsi: Ningaluvusi lutsandvo,

futsi ningalunyakatisi,

luze lutivukele lona.

₈Lalela, nasi sitsandvwa sami!

Bukela, nanguya eta angcabisha

engca etintsabeni,

agiya etikwemagcuma.

₉Longitsandzako unjengemphala nanjengelitfole lemgankla.

Bukela! Nango phela aseme emvakwelubondza lwakitsi,

uhlola ngemafasitelo, alungute ngetikhala telutsango.

₁₀Longitsandzako wakhuluma kimi, watsi:

“Sukuma, sitsandvwa sami,

lotsandzekako wami, wota sambe.

₁₁Buka la, busika sebendlulile,

timvula setendlulile, atisekho.

₁₂Timbali setiyamila emhlabeni,

sekufike sikhatsi sekuhlabela,

nekububula kwematuba sekuvakele kulelive letfu.

₁₃Sihlahla semkhiwa sesitsela titselo taso tekucala,

nemivini lebhahelako itsela liphunga layo lelimnandzi.

Sukuma sambe, sitsandvwa sami,

sitsandvwa sami lesihle,

asambe nawe.”

₁₄Tuba lami lelisemifantfwini yemadvwala,

etindzaweni tekubhaca emaceleni etintsaba,

ngikhombise buso bakho,

ungivise neliphimbo lakho;

ngobe liphimbo lakho liyanongotela,

nebuso bakho buyatsandzeka.

₁₅Sibambeleni timphungutja, timphungutja letincane,

ngobe ngito letibhubhisa tivini,

yebo, tivini tetfu letibhahelako.

₁₆Longitsandzako wami ngedvwa;

nami ngiwakhe yedvwa,

udlisa umhlambi wakhe emkhatsini weminduze.

₁₇Kuze kudzabuke kusa,

kubaleke titfunti,

buya, wena longitsandzako,

bani njengemphala nanjengemgankla losemncane

nawusemagcumeni langemahhelekehle.