Zefaniya 2

₁Buyani ndzawonye,

nihlangane ndzawonye,

nine sive lesilihlazo,

₂sikhatsi lesibekiwe sisengakefiki

nisengakapheshulwa njengemakhoba,

lusengakehleli etikwenu lulaka

lwaSimakadze lolwesabekako,

lisengakefiki lilanga lelulaka lwaSimakadze etikwenu.

₃Funani Simakadze,

nonkhe nine lenitfobekile belive,

nine lenenta loko latsi kwenteni.

Funani kulunga, nifune kutfobeka,

mhlawumbe ningahle nivikeleke

ngelilanga lentfukutselo yaSimakadze.

₄IGaza iyawushiywa yodvwa,

ne-Ashkeloni iyawusala itindzala.

Emini i-Ashdodi iyawucitfwa,

kutsi i-Ekroni isishulwe.

₅Nako kini lenihlala ngaselwandle,

nine sive semaKherethi.

Livi laSimakadze limelene nani,

awu Khenani, live lemaFilisti.

“Ngiyawunibhubhisa nonkhe,

kute namunye loyawusala.”

₆Live lelingaselwandle,

lapho kuhlala khona emaKherethi,

liyawuba yindzawo yebelusi netibaya tetimvu.

₇Liyawuba lemisalela yendlu yakaJuda,

ngulapho-ke lapho bayawutfola khona emadlelo.

Kusihlwa bayawulala phansi

etindlini tase-Ashkeloni.

Simakadze Nkulunkulu wabo uyawubanakekela;

uyawubuyisela kubo tinhlanhla tabo.

₈“Ngitivile tinhlamba tebakaMowabi

netibhinco tema-Amoni,

labetfuka ngato sive sami basongela nelive laso.

₉Ngako-ke, kuphila kwami,” kusho Simakadze Somandla,

longuNkulunkulu wema-Israyeli,

“impela Mowabi uyawuba njengeSodoma,

nema-Amoni abe njengeGomora,

indzawo yelukhula nemigodzi yeluswayi,

live lelilihlane phakadze naphakadze.

Insali yesive sami iyawubaphanga;

besive sami labayawusala bayawulidla live labo.”

₁₀Nguloku bakaMowabi nema-Amoni labayawukutfola

kube ngumvuzo wekutigcabha kwabo,

ngenca yekwetfuka nekuphukuta kwabo sive saSimakadze

longuSomandla.

₁₁Simakadze uyakwesabeka kubo,

nase abhubhisa bonkhe bonkulunkulu balelo live.

Tive letikulo lonkhe lusentse lwelwandle tiyakumkhonta,

nguleso naleso sive eveni laso.

₁₂“Nani futsi, maKushe,

niyawubulawa ngenkemba yami.”

₁₃Simakadze uyakwelula sandla sakhe amelane nenyakatfo,

abhubhise i-Asiriya,

iNineve ayishiye ilihlane,

yome njengelugwadvule.

₁₄Imihlambi yetimvu neyetimbuti

kanye nemihlambi yetinkhomo

iyawulala phansi khona lapho,

tilwane netidalwa talo lonkhe luhlobo.

Sikhova selihlane nesikhova lesiklabalazako

kuyawuhlala etihlokweni tetinsika tayo ebusuku.

Kukhala kwato kuyakwenta

kutsi umsindvo wekuhokoma uphume ngemafasitelo,

imfuhlululu iyawubaseminyango,

tinsika temsedari tiyawubekeka ebaleni.

₁₅Leli lidolobha lelinganaki lutfo,

lelaliphila liphephile.

Latikhulumela lona, latsi:

“Ngimi ngimi, kute futsi lelinye ngaphandle kwami.”

Maye, imbhubhiso lese lingiyo,

seliyindzawo yekubutsanela tilwane tesiganga!

Bonkhe labendlula ngakulo bayalishalatelela,

balihheletele ngetandla tabo.