1 TIKRONIKA 10

₁Vafilista va huma nyimpi ku ya lwa ni Vaisraele, kutani vanhu va Israele va tsutsuma emahlweni ka Vafilista, va wa, va tlhaviwile entshaveni ya Gilibowa, va fa kona. ₂Vafilista va chivirika ku landza Sawulo ni vana va yena, kutani Vafilista va tlhava Yonatani na Abinadaba, na Maliki-Xuwaka, vana va Sawulo. ₃Ku lwa a ku tikela Sawulo, kwalaho vacopi va n'wi kuma, va n'wi tlhava. ₄Kutani Sawulo a ku eka mutameri wa matlhari ya yena: “Hlomula banga ra wena u ndzi tlhava leswaku lava nga yimbangiki va nga tshuki va ndzi onha.” Mutameri wa matlhari ya yena a ala, hikuva a a chava ngopfu; kwalaho Sawulo a teka banga ra yena a titlhoma ha rona. ₅Mutameri wa matlhari, kakuloko a vona leswaku Sawulo a file, a titlhoma na yena ebangeni ra yena, a fa. ₆Sawulo a fisa sweswo ni vana va yena vanharhu, ni yindlu ya yena hinkwayo; va file swin'we. ₇Vavanuna hinkwavo va Israele, lava akeke ebanyini, kuteloko va vonile leswaku Vaisraele va tsutsumile, ni leswaku Sawulo ni vana va yena va file, va tshika miti ya vona, va baleka. Kutani Vafilista va ta aka kona.

₈Siku leri tlhandlamaka, Vafilista va ta ku hluvula vafi, kutani va kuma Sawulo ni vana va yena, lava weke entshaveni ya Gilibowa. ₉Kuteloko va n'wi hluvurile va teka nhloko ya yena ni matlhari ya yena; kutani va rhuma vanhu etikweni hinkwaro ra Vafilista ku tivisa timhaka leti eka swifaniso swa vona ni ka vanhu va tiko. ₁₀Kutani va veka matlhari ya yena endlwini ya xikwembu xa vona, va bela pala ra yena endlwini ya Dagona.

₁₁Hinkwavo va Yabexe wa Giliyadi va twa hinkwaswo leswi Vafilista va swi endleleke Sawulo, ₁₂kutani vavanuna hinkwavo lava tiyeke va pfuka va ya teka ntsumbu wa Sawulo ni mitsumbu ya vana va yena, va yi tisa eYabexe. Va lahla marhambu ya vona ehansi ka nkanyi wa Yabexe; kutani va titsona swakudya hi masiku ya ntlhanu na mambirhi.

₁₃Sawulo a fa hikwalaho ka xidyoho lexi a dyoheleke Yehovha ha xona, hikwalaho ka rito ra Yehovha leri a nga ri hlayisangiki, na swona hikuva a vutisile lava vitanaka vafi ku byeriwa timhaka hi vona. ₁₄A nga vutisanga Yehovha, kutani Yehovha a n'wi dlaya, a nyika Davhida, n'wana Yese, vuhosi.