1 TIKRONIKA 11

₁Vaisraele hinkwavo va hlengeletana eka Davhida, eHebroni, va ku eka yena: “Waswivo hina hi marhambu ya wena ni nyama ya wena. ₂Hambi ku ri khale, loko Sawulo a ha ri hosi, hi wena loyi a wu humesa tiko ra Israele, ni ku ri tlherisa; Yehovha, Xikwembu xa wena, xi ku byerile, xi ku: ‘Hi wena loyi u nga ta risa tiko ra mina ra Israele, hi wena loyi u nga ta va mufambisi wa tiko ra mina ra Israele.’ ” ₃Kavaloko vakulukumba hinkwavo va Israele va ta eka hosi eHebroni, Davhida a endla xinakulobye na vona emahlweni ka Yehovha eHebroni, kutani va chela Davhida hi mafurha leswaku a va hosi ya Israele, hilaha Yehovha a nga lerisa hakona hi nomu wa Samiele.

₄Davhida a famba ni Vaisraele hinkwavo a kongoma eYerusalema, (i Yebusi); Vayebusi, lava akeke etikweni, a va ri kona. ₅Vaaki Vayebusi va ku eka Davhida: “U nga ka u nga ngheni halenu!” Kavaloko Davhida a teka khokholo ra Siyoni, a nghena: i muti wa Davhida. ₆Kambe Davhida a ku: “Mani na mani la nga ta rhanga a hlula Vayebusi u ta va hosana ni ndhuna.” Kutani Yowabu, n'wana Seruya, a rhanga a tlhandluka, kutani a vekiwa hosana. ₇Davhida a aka ekhokholweni, hikwalaho va ri thyile muti wa Davhida. ₈A tiyisa rirhangu ra muti ku suka eMilo, ematlhelweni hinkwawo, kutani Yowabu a pfuxa leswi seleke swa muti. ₉Davhida a a ri karhi a ya emahlweni, a kula hi matimba, kutani Yehovha wa mavandla a a ri na yena.

₁₀Hi tona tindhuna ta tinhenha ta Davhida leti n'wi tiyiseke evuhosini bya yena, kun'we ni Vaisraele hinkwavo, ku n'wi veka hosi, hilaha Yehovha a nga vula hakona ehenhla ka Israele. ₁₁Hi wona ntsengo wa tinhenha ta Davhida:

Yaxobeyama, n'wana Hakimoni ndhuna yin'wana leyikulu a tlakusa tlhari ra yena ehenhla eka vavanuna va madzana manharhu lava a va dlayeke kan'we.

₁₂Endzhaku ka yena, Eliyazara, n'wana Dodo, wa Ahohi; a yi ri yin'wana ya tinhenha tinharhu. ₁₃A a ri na Davhida ePasa-Damini, loko Vafilista va hlengeletanile kona ku lwa; nsimu ya barley a yi ri kona, kutani tiko a ri ri karhi ri tsutsuma emahlweni ka Vafilista. ₁₄Va yima exikarhi ka nsimu, va yi lwela, va hlula Vafilista; kutani Yehovha a va ponisa hi matimba.

₁₅Tindhuna tinharhu ta leta makume manharhu, ti xikela eribyeni eka Davhida, ebakweni ra Adulama; Vafilista a va govile enkoveni wa Varefayimi. ₁₆Enkarhini wolowo Davhida a a ri ekhokholweni, kutani a ku ri ni ntlawa wa valanguteri va Vafilista, eBetlehema. ₁₇Davhida a sungula ku navela, a ku: “I mani la nga ta ndzi nwisa mati ya xihlovo lexi nga enyangweni ya Betlehema?” ₁₈Kavaloko tinhenha letinharhu ti suka, ti hundza exikarhi ka mixaxa ya Vafilista, ti ya ka mati exihlobyeni lexi nga enyangweni ya Betlehema; va ma tisa, va nyika Davhida; kambe Davhida a ala ku ma nwa, kutani a ma halatela emahlweni ka Yehovha, ₁₉a ku: “Kule na mina! Xikwembu a xi ndzi sivele ku endlisa sweswo! Xana ndzi ta nwa ngati ya vanhu lava nga hlayisangiki vutomi bya vona xana?” Hikuva va tisile mati lawa hi ku tshika vutomi bya vona, kutani a ala ku nwa. Hi swona leswi endliweke hi tinhenha letinharhu.

₂₀Abixayi, makwa Yowabu, a a ri hosi ya tindhuna, a tlakusa tlhari ra yena ehenhla ka vanhu va madzana manharhu, a va dlaya A dzunisiwa exikarhi ka lavanharhu. ₂₁Exikarhi ka lavanharhu, a tlula van'wana hi ku dzunisiwa, a va hosi ya vona, kambe a nga kotisanga lavanharhu vo sungula.

₂₂Benaya, n'wana Yehoyada, n'wana Kabisele, nhenha leyikulu hi mitirho ya yena, hi yena la tlhaveke tinghala timbirhi ta xikwembu ta Mowabu, Hi yena kambe la ngirimeleke exihlobyeni, a tlhava nghala kona hi siku ra gamboko. ₂₃Hi yena kambe la tlhaveke Muegipta, wanuna lonkulu wa swisungunhu swa ntlhanu exiyin'weni xa yena. Muegipta a a tamele evokweni ra yena tlhari leri fanaka ni mhandze ya muluki; Benaya a ngirimela eka yena a tamele nhonga kutani a hlomula tlhari evokweni ra Muegipta, a n'wi dlaya hi tlhari ra yena. ₂₄Hi swona leswi endliweke hi Benaya, n'wana Yehoyada; a dzunisiwa exikarhi ka tinhenha letinharhu. ₂₅A tlula lava makume manharhu hi ku dzunisiwa kambe a nga kotisanga lavanharhu vo sungula. Davhida a n'wi nghenisa ehubyeni ya yena ya le xihundleni.

₂₆Tinhenha ta nyimpi a a ri: Asahele, makwa Yowabu; Elihanani, n'wana Dodo, wa Betlehema; ₂₇Xama wa Haroda; Helese, wa Peloni; ₂₈Ira n'wana Ikexe, wa Tekowa; Abiezere, wa Anatoto; ₂₉Sibekayi, wa Huxa; Ilayi, wa Ahohi; ₃₀Maharayi, wa Netofa; Helede, n'wana Baana, wa Netofa; ₃₁Itayi, n'wana Ribayi, wa Gibeya wa vana va Benjamini, Benaya, wa Piratoni; ₃₂Hurayi, wa Nakale-Gaaxi; Abiele, wa Araba; ₃₃Azimavhete, wa Baharumi; Eliyahaba, wa Xaaliboni; ₃₄Bene-Haxeme, wa Gizoni; Yonatani, n'wana Xage, wa Harari; ₃₅Ayihama, n'wana Sakara, wa Harari; Elifala n'wana Uri; ₃₆Hefere, wa Mekera; Ahiya, wa Peloni; ₃₇Hesiro, wa Karmele; Naarayi, n'wana Ezibayi; ₃₈Yuwele, makwa Natani; Mibihara, n'wana Hageri; ₃₉Seleke, wa ka Amoni; Naharayi, wa Beroto, mutameri wa matlhari ya Yowabu, n'wana Seruya; ₄₀Ira wa Yitira; Garebe, wa Yitira; ₄₁Uriya, wa ka Hiti; Zabada n'wana Ahilayi; ₄₂Adina, n'wana Xiza, wa Rhuveni, ndhuna ya va Rhuveni, vavanuna va makume manharhu a va ri na yena; ₄₃Hanana, n'wana Maaka; na Yoxafati, wa Mitina; ₄₄Uziya, wa Axitaroto, Xama na Yehiele, vana va Hotamu, wa Arowere. ₄₅Yediele, n'wana Ximri; na Yoha, makwavo wa Tisi; ₄₆Eliele, wa Mahavha, Yeribayi, na Yoxavhiya, vana va Elnaama; Yitima, wa Mowabu; ₄₇Eliele, na Obede, na Yaasiele wa Metsobaya.