1 TIKRONIKA 27

₁Hi vona vana va Israele hi ntsengo wa vona, tihosana ta tinyimba ni tindhuna ta dzana ni ta khume ra madzana, ni malandza ya vona lama tirhelaka hosi etimhakeni hinkwato ta mitlawa, yi ri leyi nghenaka entirhweni ni leyi humaka kona, en'hwetini yin'wana ni yin'wana, hi tin'hweti hinkwato ta lembe; ntlawa wun'wana ni wun'wana a wu ri wa vavanuna va 24 000.

₂Entlaweni lowo rhanga, wa n'hweti yo sungula, ku vekiwile Yaxobuwama, n'wana Zabadiele, ndhuna, ntlawa wa yena a wu ri wa vavanuna va 24 000. ₃A a ri ntukulu wa Perese; a a ri ehenhla ka tindhuna hinkwato ta nyimpi ya n'hweti yo sungula.

₄Entlaweni wa n'hweti ya vumbirhi, ku vekiwile Dodayi, wa Ahohi ndhuna. Entlaweni wa yena, Mikiloto a yi ri ndhuna; ntlawa wa yena a wu ri wa vavanuna va 24 000.

₅Ndhuna ya ntlawa wa vunharhu, wa n'hweti ya vunharhu, a a ri Benaya, n'wana Yehoyada, muprista; ntlawa wa yena a wu ri wa vavanuna va 24 000. ₆Benaya loyi, a a ri nhenha exikarhi ka lava makume manharhu, ni le henhla ka vona, ntlawa wa yena a wu fambisiwa hi Amizabada, n'wana wa yena.

₇Wa vumune, wa n'hweti ya vumune, a a ri Asahele, makwa Yowabu, ni le hansi ka yena, Zebadiya, n'wanakwe; entlaweni wa yena a a ri ni vavanuna va 24 000.

₈Wa vuntlhanu, wa n'hweti ya vuntlhanu, ndhuna, a a ri Xamihuti wa Yiziraha; entlaweni wa yena a a ri ni vavanuna va 24 000.

₉Wa ntlhanu na un'we, wa n'hweti ya ntlhanu na yin'we, a a ri Ira, n'wana Ikexe, wa Tekowa; entlaweni wa yena a a ri ni vavanuna va 24 000.

₁₀Wa ntlhanu na vambirhi, wa n'hweti ya ntlhanu na timbirhi, a a ri Helese, wa Peloni, wa vatukulu va Efrayimi; entlaweni wa yena a a ri ni vavanuna va 24 000.

₁₁Wa ntlhanu na vanharhu, wa n'hweti ya ntlhanu na tinharhu, a a ri Sibekayi, wa Huxa, wa rixaka ra va Zera; entlaweni wa yena a ri ni vavanuna va 24 000.

₁₂Wa ntlhanu na mune, wa n'hweti ya ntlhanu na mune, a a ri Abiezere, wa Anatoto, wa nyimba ya Benjamini; entlaweni wa yena a a ri ni vavanuna va 24 000.

₁₃Wa vukhume, wa n'hweti ya vukhume, a a ri Maharayi wa Netofa, wa rixaka ra va Zera; entlaweni wa yena a a ri ni vavanuna va 24 000.

₁₄Wa khume na un'we, wa n'hweti ya khume na yin'we, a a ri Benaya, wa Piratoni, wa nyimba ya Efrayimi; entlaweni wa yena a a ri ni vavanuna, va 24 000.

₁₅Wa khume na vambirhi, wa n'hweti ya khume na timbirhi, a a ri Helidayi, wa Netofa, wa rixaka ra Otiniele; entlaweni wa yena a a ri ni vavanuna va 24 000.

₁₆Hi tona tihosana ta tinyimba ta Israele: Hosana ya ka Rhuveni: Eliezere, n'wana Zikri, ya ka Simiyoni: Xefatiya n'wana Maaka; ₁₇ya ka Levhi: Haxabiya, n'wana Kemuwele: ya ka Aroni, Sadoki; ₁₈ya ka Yuda: Elihu, un'wana wa vamakwavo va Davhida; ya ka Isakara: Omri, n'wana Mikaele; ₁₉ya ka Zebuloni: Iximaya, n'wana Obadiya ya ka Neftali: Yerimoto, n'wana Aziriele; ₂₀ya vana va ka Efrayimi: Hoxeya, n'wana Azaziya; ya hafu ya nyimba ya ka Manase: Yuwele, n'wana Pedaya; ₂₁ya hafu ya nyimba ya ka Manase, etikweni ra Giliyadi, Ido, n'wana Zakariya; ya ka Benjamini: Yaasiele, n'wana Abinere; ₂₂ya ka Dani: Asarele, n'wana Yerohama: Hi tona tihosana ta tinyimba ta Israele.

₂₃Davhida a nga talangi va malembe ya makume mambirhi ni le hansi ka wona, hikuva Yehovha a a vurisile leswaku a ta andzisa va Israele kukotisa tinyeleti ta tilo. ₂₄Yowabu, n'wana Seruya, a sungurile ku va hlaya kambe a nga hetanga, hikuva Yehovha a karihela va Israele hikwalaho ka mhaka leyi; kutani ku tala loku a ku hlayiwanga exikarhi ka ku hlaya ka Tikronika ta hosi Davhida.

₂₅Azimavhete, n'wana Adiele, a a ri mulanguteri wa vuhlayiselo bya hosi; Yonatani, n'wana Uziya, a a ri mulanguteri wa tindlu ta xuma leti ngi ti ri emasin'wini, ni le mitini, ni le swimitaneni, ni le makhokholweni; ₂₆Ezri, n'wana Kelubi, a a ri mulanguteri wa lava tirhaka emasin'wini ku rima masimu; ₂₇Ximeyi, wa Rhama, a langutela tivhinya; na Zabidi, wa Xifimi, a langutela vhinyo leyi ngi yi ri tivhinyeni; ₂₈Baala-Hanana, wa Gedere, a langutela mitlhwari ni mirhi ya makuwa leyi ngi yi ri erivaleni; Yowasi a hlayisa tindlu ta mafurha; ₂₉Xitrayi, wa Xaroni, a langutela tihomu leti dyaka Xaroni; na Xafati, n'wana Adilayi, a langutela tihomu leti ngi ti ri emikoveni; ₃₀Obili, wa Iximaele, a langutela tikamela, na Yehedeya, wa Meronoti timbhongolo; ₃₁na Yazizi, wa ka Hagara, a langutela tinyimpfu. Hinkwavo lava a va ri valanguteri va swifuwo leswi ngi swi ri swa hosi Davhida.

₃₂Yonatani, makwa tata wa Davhida a yi ri ndhuna ya huvo, a a ri munhu wa ku twisisa ni wa vutivi; Yeyiele, n'wana Hakimoni, a a hlayisa vana va hosi. ₃₃Ahitofele, a a ri wa huvo ya hosi; Huxayi, Muariki, a a ri nakulobye wa hosi. ₃₄Endzhaku ka Ahitofele, Yehoyada, n'wana Benaya, na Abiyatara, va nghena ematshan'weni ya yena. Ndhuna ya nyimpi ya hosi a a ri Yowabu.