Ta tiko ra Israele loko ri nga twanani ni ra Yuda. Rhobuwamu, hosi ya Yuda.
1Rhobuwamu a ya eXikeme, hikuva Vaisraele hinkwavo a va tile eXikeme ku n'wi veka hosi.
2Yerobuwamu, n'wana Nebati, a swi twa a ha ri eEgipta, laha a balekeleke kona emahlweni ka hosi Solomoni, hikuva a a akile eEgipta, kutani va rhuma ku ya n'wi vita; 3kavaloko Yerobuwamu ni nhlengeletano hinkwayo ya Israele, va ta, va vulavula na Rhobuwamu, va ku: 4“Tata wa wena u tikisile mpingu wa hina, wena sweswi, u nga vevukisa ntirho lowo nonon'hwa wa tata wa wena, ni mpingu lowo tika lowu a hi vekeleke ehenhla, hi kona hi nga ta ku tirhela.” 5Yena a ku eka vona: “Tlhelani, mi ya xwa masiku manharhu, mi ta tlhela mi vuya eka mina,” kutani tiko ri muka.
6Hosi Rhobuwamu a vitana vakulukumba lava tshameke na Solomoni, tata wa yena loko a ha hanya, a va vutisa, a ku: 7“Ndzi ta hlamula yini eka tiko leri xana?” Kutani va vulavula na yena, va ku: “Namuntlha, loko u rhandza ku pfuna tiko leri, loko u va hlamula u va byela marito ya tintswalo, va ta ku tirhela hi masiku.” 8Kambe Rhobuwamu a tshika marito ya vakulukumba, a vitana majaha lama nga tintangha ta yena, lama yimeke emahlweni ka yena. 9A ku eka vona: “Ndzi ta hlamula yini eka tiko leri xana leri vulavuleke na mina, ri ku: ‘Vevukisa mpingu lowu tata wa wena a wu vekeke ehenhla ka hina.’?” 10Majaha lama kuleke na yena, ma n'wi hlamula, ma ku: “U ta vurisa sweswo eka tiko leri vulavuleke na wena, ri ku: ‘Tata wa wena u tikisile mpingu wa hina kambe wena, wu vevukise ehenhla ka hina.’ U ta va byela, u ku: ‘Xintihwana xa mina xi tlula xifungha xa tatana. 11Sweswi, tatana u mi rhwexile mpingu lowo tika, kambe mina ndzi ta wu tikisa; tata wa mina u mi layile hi mikharisa, kambe mina ndzi ta mi laya hi swipame.’ ”
12Kavaloko Yerobuwamu ni tiko hinkwaro va ta eka Rhobuwamu siku ra vunharhu hilaha hosi yi va byeleke hakona, loko yi te: “Tlhelani, mi vuya eka mina hi siku ra vunharhu.” 13Kutani hosi yi hlamula marito ya ku nonon'hwa eka tiko, yi tshika marito ya vakulukumba, 14yi va byela hilaha majaha ma vuleke hakona, yi ku: “Tata wa mina u tikisile mpingu wa n'wina, kambe mina ndzi ta wu tikisa ku tlurisa; tata wa mina u mi layile hi mikharisa, kambe mina ndzi ta mi laya hi swipame.”
15Sweswo hosi a yi yingisanga tiko; hikuva mhaka leyi, yi lunghisiwe hi Yehovha, leswaku ku endliwa hilaha Yehovha a nga vula hakona hi Ahiya wa Xilo eka Yerobuwamu, n'wana Nebati.
16Vaisraele hinkwavo, kuteloko va vonile leswaku hosi a yi va yingisanga, tiko ri hlamula hosi, ri ku: “Hi ni ku averiwa kwihi na Davhida xana? A hi na ndzhaka ni n'wana wa Yese! Vaisraele, mukani emitsongeni ya n'wina! Wena, Davhida, tilangutele yindlu ya wena!” Kavaloko va Israele va tlhela emitsongeni ya vona. 17Loko va ri vana va Israele lava akeke emitini ya Yuda, va fumiwa hi Rhobuwamu.
18Kutani hosi Rhobuwamu yi rhuma Adorama, ndhuna ya mitirho, kambe Vaisraele va n'wi khandla hi maribye, a fa. Kavaloko hosi Rhobuwamu a hatlisa a khandziya ekalichini a tsutsumela eYerusalema. 19Hi sweswo Vaisraele va nga hambana ni yindlu ya Davhida ku fika namuntlha.
Yerobuwamu, hosi ya Israele.
20Vaisraele hinkwavo, kuteloko va twile leswaku Yerobuwamu u vuyile, va rhuma, va n'wi vita enhlengeletanweni, kutani va n'wi veka hosi ehenhla ka va Israele hinkwavo. Nyimba ya Yuda ntsena yi landza yindlu ya Davhida.
21Rhobuwamu, kuteloko a fikile eYerusalema, a hlengeleta yindlu hinkwayo ya Yuda, ni nyimba ya Benjamini, va ri vavanuna lava hlomaka va 180 000 ku ya lwa ni yindlu ya Israele va ta vuyisela Rhobuwamu, n'wana Solomoni, ku fuma. 22Kambe rito ra Xikwembu ri ta eka Xemaya, munhu wa Xikwembu, ri ku: 23“Byela Rhobuwamu, n'wana Solomoni hosi ya Yuda, ni yindlu hinkwayo ya Yuda ni ya Benjamini, ni vanhu lava seleke va tiko, u ku eka vona: 24‘Yehovha u vurisa sweswo, a ku: “Mi nga tshuki mi khandziya ku ya lwa ni vamakwenu, vana va Israele. Tlhelani, un'wana ni un'wana endlwini ya yena, hikuva mhaka leyi, yi huma eka mina.” ’ ” Kutani va yingisa rito ra Yehovha, va tlhela va muka hilaha Yehovha a nga vula hakona.
Ta Yerobuwamu loko a endla marhole mambirhi ya nsuku.
25Yerobuwamu a aka Xikeme, entshaveni ya Efrayimi, a tshama kona; a tlhela a huma kona a ya aka Penuwele.
26Kavaloko Yerobuwamu a vulavula embilwini ya yena, a ku: “Sweswi, ku fuma ku nga tlhelela endlwini ya Davhida. 27Kungakuloko tiko leri, ri tlhandluka ku ya humesa magandzelo endlwini ya Yehovha eYerusalema, timbilu ta vanhu ti ta tlhelela eka Rhobuwamu, hosi ya Yuda, kutani va ta ndzi dlaya, va ta tlhelela eka Rhobuwamu, hosi ya Yuda.” 28Hosi yi endla makungu, kutani yi chulula marhole mambirhi ya nsuku, yi ku eka tiko ra yona: “Mi tlhandlukile eYerusalema hi nkarhi lowu ringanaka: O Israele! Hi xona xikwembu lexi ku humeseke etikweni ra Egipta!” 29A veka rin'wana eBetele; rin'wana a ri veka eDani; 30kambe mhaka leyi, a yi bihile, tiko a ri famba ri ya emahlweni ka rhole rin'wana ku fika eDani.
Ta alitari ya Betele.
31Kutani a aka yindlu exivandleni lexi tlakukeke, a veka vaprista lava humaka ematlhelweni hinkwawo ya tiko, lava nga riki va yindlu ya Levhi. 32Hi n'hweti ya ntlhanu na tinharhu, hi siku ra khume na ntlhanu ra n'hweti, Yerobuwamu a endla nkhuvo lowu fanaka ni nkhuvo lowu endliwaka etikweni ra Yuda, a humesa magandzelo ealitarini. A endlisa sweswo eBetele, a humesela marhole lawa a ma endleke magandzelo, kutani a veka eBetele vaprista va tindlu ta swivandla leswi tlakukeke leti a ti akeke. 33Kutani a khandziya ealitarini leyi a yi akeke eBetele, hi siku ra khume na ntlhanu ra n'hweti ya ntlhanu na tinharhu, leyi a yi hlawuleke hi ku rhandza ka yena; a endlela vana va Israele nkhuvo, a khandziya ealitarini ku hisa mirhi ya risuna.
