1 TIHOSI 18

₁Masiku yo tala loko ma hundzile, rito ra Yehovha ri ta eka Eliya hi lembe ra vunharhu, ri ku: “Famba u tikombisa eka Akabu, kutani ndzi ta nisa mpfula emisaveni.” ₂Kavaloko Eliya a suka a famba ku ya tikombisa eka Akabu.

₃Ndlala a yi ri leyikulu eSamariya. Kavaloko Akabu a vitana Obadiya, mulanguteri wa yindlu ya yena. Obadiya a a ri munhu la chavaka ngopfu Yehovha; ₄kakuloko Yezabele a herisa vaprofeta va Yehovha, Obadiya a teka vaprofeta va dzana, a va fihla ha ntlhanu wa makume ebakweni, a va phamela vuswa ni mati. ₅Akabu a ku eka Obadiya: “Rhendzelekela tiko, u ya eswihlobyeni hinkwaswo ni le swinambyaneni hinkwaswo: kumbe u ta kuma byanyi kutani hi ta hanyisa tihanci ni timulwa, hi nga ti tshuka hi feriwa hi swifuwo.” ₆Va avelana tiko ku ri kamba; Akabu a famba a ri swakwe hi ndlela yin'wana, na Obadiya a famba a ri swakwe hi ndlela yin'wana.

₇Kakuloko Obadiya a ha ri endleleni, Eliya a ta hlangana na yena. Obadiya a n'wi tiva, kutani a wa hi mombo wa yena, a ku: “Xana hi wena kunene, hosi yanga Eliya?” Yena a ku: “Hi mina. ₈Famba u ya byela hosi ya wena, u ku: ‘Eliya hi loyi.’ ” ₉Kutani Obadiya a ku: “Ndzi dyohe yini leswi u nyiketaka nandza wa wena emavokweni ya Akabu, leswaku a ndzi dlaya! ₁₀Yehovha, Xikwembu xa wena, wa hanya! Ku hava tiko ni ku fuma lomu hosi ya mina yi nga rhumangiki kona ku ku lava; kutani loko va te: ‘A nga kona,’ hosi yi hlambanyise tiko leswaku a va ku kumanga. ₁₁Kutani sweswi u ku: ‘Famba u ya byela hosi ya wena, u ku: “Eliya hi loyi.” ’ ₁₂Kutakuloko ndzi sukile eka wena, moya wa Yehovha wu ta ku tlakula, wu ku yisa laha ndzi nga ku tiviki; kutani ndzi ta ya tivisa Akabu, kasi loko a nga ku kumi, u ta ndzi dlaya. Hambiswiritano, nandza wa wena a chava Yehovha, ku suka evutsongwaneni bya yena. ₁₃Xana hosi ya nga a yi byeriwanga leswi ndzi swi endleke loko Yezabele a dlayile vaprofeta va Yehovha xana? Ndzi fihlile dzana ra vaprofeta va Yehovha ha ntlhanu wa makume ebakweni, ndzi va phamela vuswa ni mati. ₁₄Kambe sweswi u ri: ‘Famba, u ya byela hosi ya wena, u ku: “Eliya hi loyi.” ’ U ta ndzi dlaya!” ₁₅Eliya a ku: “Yehovha wa mavandla, loyi ndzi yimaka emahlweni ka yena, wa hanya! Namuntlha ndzi ta tikombisa eka yena.”

₁₆Obadiya a ya kuma Akabu, a n'wi tivisa timhaka teto. Kavaloko Akabu a ya a hlangana na Eliya. ₁₇Kuteloko Akabu a vonile Eliya, a ku eka yena: “Xana a hi wena, la pfilunganyisaka Israele?” ₁₈Yena a ku: “A ndzi pfilunganyisi Israele, kambe hi wena ni yindlu ya tata wa wena, hikuva mi tshikile milawu ya Yehovha, mi landza va Baali. ₁₉Sweswi rhuma vanhu va ya ndzi hlengeletela Vaisraele hinkwavo entshaveni ya Karmele ni vaprofeta va Baali va 450, ni vaprofeta va Axera va 400 lava dyaka etafuleni ra Yezabele.”

₂₀Kavaloko Akabu a rhuma vanhu eka vana va Israele hinkwavo, a hlengeleta vaprofeta entshaveni ya Karmele. ₂₁Eliya a tshinelela tiko hinkwaro, a ku: “Mi ta khwita hi milenge mimbirhi ku yisa kwihi xana? Loko Yehovha xi ri Xikwembu, n'wi landzeni; kambe loko Baali xi ri Xikwembu, n'wi landzeni!” Tiko ri miyela, ri ku ntsee.

₂₂Eliya a engeta a ku eka tiko: “Muprofeta wa Yehovha la seleke, hi mina ntsena, kasi vaprofeta va Baali va kona va 450. ₂₃Hi nyikeni tinkunzi timbirhi; va ta hlawula yin'wana, va yi yevula, va yi veka ehenhla ka tihunyi, kambe va nga tshiveri ndzilo; na mina ndzi ta humesa nkunzi yin'wana, ndzi ta yi veka etihunyini, kambe a ndzi nga tshiveri ndzilo. ₂₄Kutani mi ta khongela xikwembu xa n'wina, na mina ndzi ta khongela Yehovha; kutani xikwembu lexi nga ta hlamula hi ndzilo hi xona Xikwembu.” Tiko hinkwaro ri hlamula, ri ku: “Hi swona.”

₂₅Kutani Eliya a ku eka vaprofeta va Baali: “Rhangani mi tilangela nkunzi, mi yi lunghisa, hikuva hi n'wina mi teleke; mi ta khongela xikwembu xa n'wina, kambe mi nga tshiveri ndzilo.” ₂₆Kutani va teka nkunzi leyi va yi nyikiweke va yi lunghisa; kutani va khongela Baali ku suka nimixo ku yisa nhlekanhi, va ku: “O Baali, hi hlamule!” Kambe va nga twi rito ra ku hlamula. Kutani va cina hi matimba, va rhendzela alitari leyi va yi endleke. ₂₇Ninhlekanhi, Eliya a sungula ku va vungunya a ku: “Huwelelani hi matimba, leswi xi nga xikwembu! Kumbe u anakanya swin'wana, kumbe u tirha swa yena, kumbe u endzile, kumbe u etlele, loko swi ri tano u ta pfuka!” ₂₈Kutani va huwelela hi rito lerikulu va tixeka hi mikwana, ni mafumu ngati yi ko yi huma ehenhla ka vona. ₂₉Kuteloko nhlekanhi wu hundzile va bvumbha ku fika enkarhini wa ku humesa gandzelo; kambe va nga twi rito ni ku hlamula, va nga voni nchumu.

₃₀Kavaloko Eliya a ku eka tiko hinkwaro: “Ndzi tshineleleni!” Kutani tiko hinkwaro ri n'wi tshinelela; va lunghisa alitari ya Yehovha leyi mbundzuxiweke. ₃₁Kutani Eliya a teka maribye ya khume na mambirhi hi ntsengo wa tinyimba ta vana va Yakobo loyi Yehovha a n'wi byeleke, a ku: “Vito ra wena ri ta va Israele.” ₃₂Hi maribye lawa a akela vito ra Yehovha alitari; a cela khele hi matlhelo hinkwawo ya alitari, ri ringana mipimo mimbirhi ya timbewu. ₃₃A lunghisa tihunyi, a yevula nkunzi, a yi veka ehenhla ka tihunyi. ₃₄Kutani a ku: “Tatani mune wa makhuwana hi mati, mi chela henhla ka holokosta ni le tihunyini.” A tlhela a ku: “Endlani ra vumbirhi.” Va chela ra vumbirhi. A engeta a ku: “Endlani ra vunharhu.” Va chela ra vunharhu. ₃₅Kutani mati ma xiririka ematlhelweni hinkwawo ya alitari, khele ri ko ri tala.

₃₆Kutani hi nkarhi wa ku humesa magandzelo, muprofeta Eliya a tshinela, a ku: “Yehovha, Xikwembu xa Abrahama, na Isaka, na Israele, a ku tiviwe namuntlha leswaku hi wena Xikwembu xa Israele, ni leswaku ndzi nandza wa wena, ni leswaku ndzi endlile swilo hinkwaswo leswi, hi ku lerisa ka wena! ₃₇Ndzi hlamule, Yehovha ndzi hlamule! Tiko leri ri ta tiva leswaku wena Yehovha u Xikwembu la tlherisaka timbilu ta vona.”

₃₈Kavaloko ndzilo wa Yehovha wu wa, wu heta holokosta, ni tihunyi, ni maribye, ni misava; wu phyisa ni mati ya khele. ₃₉Tiko hinkwaro ri swi vona, va khinsama hi mimombo ya vona, va ku: “Xikwembu i Yehovha! Xikwembu i Yehovha!”

₄₀Kutani Eliya a ku eka vona: “Khomani vaprofeta va Baali, ku nga baleki na un'we.” Va va khoma. Kutani Eliya a va ngirimerisa exinambyaneni xa Kixoni, a va dlaya kona.

₄₁Eliya a ku eka Akabu: “Tlhandluka, u ya dya, u nwa, hikuva ku twala mpfula.” ₄₂Akabu a tlhandluka ku ya dya ni ku nwa; kambe Eliya a khandziya enhlohlorhini ya Karmele a khinsama hansi a veka mombo wa yena exikarhi ka matsolo ya yena. ₄₃A ku eka nandza wa yena: “Wa nga tlhandluka, u languta tlhelo ra lwandle.” A tlhandluka, a languta, kutani a ku: “A ku na nchumu.” Eliya a ku: “Famba u ya kantlhanu na kambirhi.” ₄₄Kuteloko a yile kantlhanu na kambirhi, a vuya, a ku: “Ku ni papanyana leri fanaka ni xandla xa munhu, ri hume elwandle.” Kutani Eliya a ku: “Famba u ya ka Akabu, u ku eka yena: ‘Pana kalichi ya wena u ngirimela, u nga ti sivela hi mpfula.’ ” ₄₅Kutani, hi nkarhi lowu, tilo ri hlanganisiwa hi mapapa, moya wu va kona mpfula yi na hi matimba.

₄₆Kutani Akabu a khandziya ekalichini ya yena, a muka eYizriele. Kambe voko ra Yehovha ri va henhla ka Eliya a tiboha xisuti a tsutsuma emahlweni ka Akabu, ku fika enyangweni ya Yizriele.