1 TIHOSI 21

₁Endzhaku ka timhaka leti, waswivo, Naboto wa Yizriele a a ri ni nsimu ya vhinya eYizriele, kusuhi ni yindlu ya vuhosi ya Akabu, hosi ya Samariya. ₂Kavaloko Akabu a vulavula na Naboto, a ku: “Ndzi nyike vhinya ya wena ndzi ta endla ha yona entanga, hikuva yi kusuhi ni yindlu ya mina, kutani ndzi ta ku nyika ematshan'weni ya yona, nsimu ya vhinya leyi tlulaka yona; kumbe, loko u swi rhandza, ndzi ta ku nyika mali ya yona.” ₃Naboto a ku eka Akabu: “Hi vito ra Yehovha, ndzi nga ka ndzi nga ku nyiki ndzhaka ya vatata wa mina!” ₄Kutani Akabu a muka endlwini ya yena a ri ni gome, a hlundzuka hikwalaho ka rito ra Naboto, wa Yizriele, loko a te: “Ndzi nga ka ndzi nga ku nyiki ndzhaka ya vatata wa mina.” A ya etlela esangwini ra yena, a fularha mombo wa yena, a nga dyanga nchumu.

₅Yezabele, nsati wa yena, a ta eka yena, a ku: “Xana u tsuvela yini, leswi u nga dyiki xinkwa xana?” ₆Yena a ku: “Hi leswi ndzi vulavuleke na Naboto wa Yizriele, ndzi ku eka yena: ‘Ndzi xavisele vhinya ya wena, kumbe loko u swi rhandza, ndzi ta ku nyika nsimu ya vhinya ematshan'weni ya yona.’ Kambe u te: ‘Ndzi nga ka ndzi nga ku nyiki nsimu ya mina.’ ” ₇Kutani Yezabele, nsati wa yena, a ku: “Xana kunene hi wena la fumaka sweswi etikweni ra Israele xana? Pfuka u dya swakudya, u tsaka; mina ndzi ta ku nyika nsimu ya vhinya ya Naboto wa Yizriele.”

₈Kavaloko a tsala mapapila hi vito ra Akabu, a ma nameka hi mfungho wa yena; kutani a rhuma mapapila lawa eka vakulukumba ni ka tindhuna leti akeke na Naboto emutini wa yena. ₉A a tsarile emapapileni, a ku: “Lerisani nkhuvo wa ku titsona swakudya, mi veka Naboto emahlweni ka tiko, ₁₀mi veka ni vanhu vambirhi lavo biha emahlweni ka yena, leswaku va vula vumbhoni ehenhla ka yena, va ku: ‘U rhukanile Xikwembu ni hosi.’ Kutani mi n'wi humesela ehandle, mi n'wi khandla hi maribye, a fa.”

₁₁Vavanuna va muti wa yena, vakulukumba ni tindhuna, lava akeke emutini wa yena, va endla hilaha Yezabele a va leriseke hakona, hilaha ku tsariweke hakona emapapileni lawa a va rhumeleke wona. ₁₂Va lerisa nkhuvo wa ku titsona swakudya, va veka Naboto emahlweni ka tiko, ₁₃kutani vanhu vambirhi lavo biha va ta tshamisa emahlweni ka yena; vanhu vo biha lava, va vula vumbhoni ehenhla ka Naboto, emahlweni ka tiko, va ku: “Naboto u rhukanile Xikwembu ni hosi.” Kutani va n'wi humesela ehandle ka muti, va n'wi khandla hi maribye, a fa.

₁₄Kavaloko va tivisa Yezabele, va ku: “Naboto u khandliwe hi maribye a ko a fa.” ₁₅Yezabele, kuteloko a twile leswaku Naboto u khandliwe hi maribye, u file, a ku eka Akabu: “Pfuka, u ya teka nsimu ya vhinya ya Naboto wa Yizriele la aleke ku ku nyika yona hi mali, hikuva Naboto a nga ha ri kona, u file.” ₁₆Loko Akabu a twa leswaku Naboto u file, a pfuka, a ngirimela ensin'wini ya Naboto, wa Yizriele, ku ya yi teka.

₁₇Kavaloko rito ra Yehovha ri ya eka Eliya wa Tixibe, ri ku: ₁₈“Pfuka u ngirimela ku ya hlangana na Akabu hosi ya Israele, leyi fumaka eSamariya, hi loyi ensin'wini ya Naboto, laha a ngirimeleke kona ku yi teka. ₁₉U ta ku eka yena: ‘Yehovha u vurisa sweswo, a ku: “A hi wena mudlayi ni muyivi xana?” ’ Kutani u ta ku eka yena: ‘Yehovha u ri: “Laha timbyana ti nantsweke ngati ya Naboto, hi kona timbyana ti nga ta nantswa ngati ya wena kunene!” ’ ” ₂₀Akabu a ku eka Eliya: “Xana u ndzi kumile, nala wanga?” Eliya a ku: “Ndzi ku kumile hikuva u tixavisile ku endla leswo biha emahlweni ka Yehovha! ₂₁Waswivo, ndzi ta tisa khombo ehenhla ka wena, ndzi ta ku kukula, ndzi heta mani na mani la nga wa Akabu, hambi la bohiweke, hambi la tshunxekeke eIsraeleni; ₂₂Ndzi ta fanisa yindlu ya wena ni yindlu ya Yerobuwamu, n'wana Nebati, ni yindlu ya Baaxa, n'wana Ahiya, hikuva u ndzi hlundzukisile, u dyohisile Israele. ₂₃Yehovha a vulavula ni le henhla ka Yezabele, a ku: ‘Timbyana ti ta dya Yezabele ekusuhi ni rirhangu ra Yizriele.’ ₂₄Munhu wa Akabu la nga ta fa emutini, timbyana ti ta n'wi dya, ni la nga ta fa enhoveni tinyanyana ta tilo ti ta n'wi dya.”

₂₅Kunene a ku vanga na hosi kukotisa Akabu la tixaviseke ku endla leswo biha emahlweni ka Yehovha, hikuva Yezabele, nsati wa yena a a n'wi kucetela. ₂₆U endlile leswo biha ku tlurisa hi ku landza swifaniso swa swikwembu, ni ku endla hinkwaswo leswi endliweke hi Vaamori, lava Yehovha a va hlongoleke emahlweni ka vana va Israele.

₂₇Akabu, kuteloko a yingisile marito lawa, a handzula tinguvu ta yena, a ambala nguvu yo khwaxa a titsona swakudya; a tilata a ri ni nguvu yo khwaxa, a famba khwatsi. ₂₈Kavaloko rito ra Yehovha ri ya eka Eliya wa Tixibe, ri ku: ₂₉“Xana u swi vonile hilaha Akabu a titsongahateke hakona emahlweni ka mina xana? Leswi a titsongahateke emahlweni ka mina, ndzi nga ka ndzi nga tisi khombo eku hanyeni ka yena; ndzi ta tisela yindlu ya yena khombo hi masiku ya n'wana wa yena.”