1 TIHOSI 3

₁Solomoni a endla xinakulobye na Faro, hosi ya Egipta, a teka n'wana Faro a va nsati wa yena; a n'wi tisa emutini wa Davhida, a ko a heta ku aka yindlu ya yena, ni yindlu ya Yehovha, ni rirhangu ra Yerusalema ematlhelweni hinkwawo. ₂Ntsena tiko a ri gandzela eswitsungeni, hikuva a ku nga si akeriwa vito ra Yehovha yindlu ku fika masiku lawa.

₃Solomoni a a rhandza Yehovha, a famba emilawini ya Davhida, tata wa yena; ntsena a a gandzela ni ku hisa mirhi ya risuna eswitsungeni. ₄Hosi yi ya eGibiyoni ku ya gandzela kona, hikuva a xi ri xitsunga lexikulu. Solomoni a humesa kona tiholokosta ta khume ra madzana.

₅Yehovha a humelela eka Solomoni eGibiyoni, eku lorheni nivusiku; kutani Xikwembu xi ku eka yena: “Kombela lexi u rhandzaka ku nyikiwa xona.” ₆Solomoni a ku: “U kombisile tintswalo letikulu eka nandza wa wena Davhida, tata wa mina, hilaha a nga famba emahlweni ka wena entiyisweni, ni le ku lulameni, ni le vuneneni bya mbilu; u n'wi hlayisele tintswalo letikulu leti, kutani u n'wi nyikile n'wana la tshamisaka exitshan'weni xa vuhosi xa yena hilaha swi nga swona namuntlha. ₇Sweswi Yehovha, Xikwembu xa mina, u fumisile nandza wa wena ematshan'weni ya Davhida, tata wa mina: kambe ndzi wandzisanyana ntsena a ndzi tivi ku huma ni ku nghena. ₈Kutani nandza wa wena u le xikarhi ka tiko ra wena, leri u ri hlawuleke, tiko leri teleke hi vanhu, leri va nga tiviki ku ri hlaya ni ku ri pima hikwalaho ka vunyingi bya rona: ₉loko swi ri tano, nyika nandza wa wena mbilu ya ku tiva ku avanyisa tiko ra wena ni ku hlawula leswo saseka eka leswo biha! Hikuva i mani la nga tivaka ku avanyisa tiko leri teleke leronghasi, leri nga ra wena?”

₁₀Rito leri, ri tsakisa Hosi, hikuva Solomoni a a komberile swona. ₁₁Kutani Xikwembu xi ku eka yena: “Leswi u kombeleke swona, u nga tikombelelanga masiku layo tala, hambi rifuwo, hambi vutomi bya valala va wena, kambe u tikombelele ku twisisa ku yingisisa leswo lulama; ₁₂waswivo, ndzi endlile hi laha u nga vula hakona: ndzi ku nyikile mbilu leyi tlhariheke leyi nga ni ku twisisa leswaku, emahlweni ka wena a ku nga si va ni munhu kukotisa wena, ni ndzhaku ka wena a ku nga humi munhu la kotisaka wena. ₁₃Ehenhla ka swona, ndzi ta ku nyika ni leswi u nga swi kombelangiki, ri nga rifuwo ni ku twala, leswaku ku nga ka ku nga vi na munhu la kotisaka wena exikarhi ka tihosi eku hanyeni hinkwako ka wena. ₁₄Kutakuloko u famba etindleleni ta mina u ri karhi u hlayisa ku lerisa ka mina ni milawu ya mina, hilaha Davhida, tata wa wena, a fambeke hakona, ndzi ta lehisa masiku ya wena.”

₁₅Solomoni a sisimuka evurhongweni, kutani maswivo, a ku ri ku lorha. Kuteloko a fikile eYerusalema, a yima emahlweni ka areka ya ntwanano wa Yehovha, a humesa tiholokosta ni magandzelo ya ku khensa. Kutani a endlela malandza hinkwawo ya yena nkhuvo.

₁₆Kutani vavasati vambirhi va tinghwavava va ta eka hosi, va yima emahlweni ka yona. ₁₇Un'wanyana wa vona a ku: “Yo! Hosi yanga! Mina ni nsati loyi, a hi tshama endlwini yin'we, kutani ndzi veleka n'wana endlwini leyi, ekaya ka yena. ₁₈Kute siku ra vunharhu loko ndzi velekile, nsati loyi a veleka na yena. A hi ri swin'we: a ku vanga na munhu un'wanyana na hina endlwini; a hi ri hina vambirhi ntsena endlwini! ₁₉Kavaloko n'wana wa nsati loyi, a fa nivusiku, hikuva a etlele henhla ka yena. ₂₀Kutani a pfuka exikarhi ka vusiku, a teka n'wananga etsheveni ra mina, loko nandza wa wena a ha etlele, a n'wi lata exifuveni xa yena; kambe n'wana wa yena, la feke, a n'wi lata exifuveni xa mina. ₂₁Kute nimixo, loko ndzi pfuka ku an'wisa n'wana wa mina, waswivo, a file, ndzi n'wi langutisisa nimixo, kutani waswivo, a a nga ri n'wana wa mina loyi ndzi n'wi velekeke.” ₂₂Nsati lowun'wanyana a ku: “A hi swona, hikuva i n'wananga la hanyaka, kambe n'wana wa wena hi loyi a feka!” Loyi a ku: “E-e, kambe n'wana wa wena hi loyi a feke, kutani n'wana wa mina hi la hanyaka!” A va tengisana sweswo emahlweni ka hosi.

₂₃Kavaloko hosi yi ku: “Un'wana u ri: ‘N'wana wa mina hi loyi a hanyaka, kutani n'wana wa wena hi loyi a feke,’ kasi lowun'wana u ri: ‘E-e, hikuva n'wana wa wena hi loyi a feke kambe n'wananga hi la hanyaka!’ ” ₂₄Kutani hosi yi ku: “Ndzi tiseleni ripanga.” Va tisa ripanga emahlweni ka hosi. ₂₅Kavaloko hosi yi ku: “Pandzani hi le xikarhi n'wana la hanyaka, mi avela hafu eka un'wana ni hafu eka un'wana.” ₂₆Kutani wansati loyi n'wana wa yena a hanyaka, a tshuka embilwini ya yena, a ku eka hosi: “Yo! Hosi yanga! N'wi nyikeni n'wana la hanyaka, va nga tshuki va n'wi dlaya!” Kambe lowun'wanyana a a ku: “A nga ka a nga vi wa mina, hambi wa wena: a a pandziwe hi le xikarhi.” ₂₇Kutani hosi yi hlamula, yi ku: “Nyikani lowo rhanga n'wana la hanyaka, mi nga ka mi nga n'wi dlayi; hikuva hi yena mana wa yena.”

₂₈Kutani Vaisraele hinkwavo va yingisa mhaka ya ku avanyisa loku vuriweke hi hosi, kutani va chava hosi, hikuva va vona leswaku vutlhari bya Xikwembu a byi ri ka yona ku tiva ku avanyisa.