1 TIMOTIYA 3

₁Rito leri ri tiyile, leri nge: Munhu loko a tinavelela vurisi, u navela ntirho lowo saseka. ₂Kambe swi fanele leswaku murisi a pfumala xisandzu, a va nuna wa nsati un'we, a va ni ku hiteka, ni ku tlhariha, ni mafundza, a rhandza ku amukela vaendzi, a tiva ku dyondzisa, ₃a nga vi munhu la tinyiketaka vhinyo ni la lwaka, kambe a a ve munhu wa musa, la nga rhandziki timholovo, la nga naveriki mali, ₄la fumaka yindlu ya yena swinene, la hlayisaka vana va yena eku yingiseni hi xichavo hinkwaxo, ₅hikuva loko munhu a nga tivi ku fuma yindlu ya yena, a nga risisa ku yini Kereke ya Xikwembu? ₆Kambe a nga tshuki a va mupfumeri lontshwa, a nga ti tshuka a tikurisa, kutani a wela eku avanyiseni ka Diyavulosi. ₇Swi fanele na kona leswaku a va ni vumbhoni lebyinene, lebyi humaka eka lava nga ehandle, leswaku a nga weli eku rhukiweni ni le ntlhan'wini wa Diyavulosi.

₈Na vona vadiyakoni, va ve vanhu lava fundzhekaka, va nga tshuki va va ni tindzimi timbirhi, va nga tinyiketi evhinyweni hi ku tlurisa, va nga tshuki va bindzula hi ku kanganyisa; ₉va hlayisa xihundla xa ku pfumela hi ripfalo leri tengeke. ₁₀Na vona va fanele ku kamberiwa eku sunguleni, kutani va ta vekiwa vadiyakoni, loko va nga ri na xisandzu. ₁₁Na vona vasati va vona va ve lava fundzhekaka, va nga vi valumbeti, kambe va va ni ku hiteka, ni ku tshembeka eka hinkwaswo. ₁₂Kambe vadiyakoni a va ve ni nsati un'we, va va lava fumaka vana va vona ni tindlu ta vona swinene. ₁₃Hikuva lava tirheleke Kereke swinene va kuma vutshamo lebyinene, ni ku tiya lokukulu eku pfumeleni loku nga eka Yesu Kriste.

₁₄Ndzi ku tsalele timhaka leti, hambi ndzi tshembile leswaku ndzi ta hatlisa ndzi ta eka wena; ₁₅hambi ndzi nga hlwela, u ta tiva hilaha swi faneleke ku endliwa hakona endlwini ya Xikwembu lexi hanyaka, yi nga mhandze, ni masungulo ya ntiyiso. ₁₆Kunene xihundla xa vukhongeri hi lexikulu: Xikwembu xi tivonakisile enyameni, xi kumiwe xi lulamile eMoyeni, xi voniwile hi tintsumi, xi vuriwile ematikweni, xi pfumeriwile emisaveni, xi tlakusiwile eku kwetsimeni.