Ta magandzelo ya Solomoni; ku khongela ka yena.
1Solomoni n'wana Davhida a titiyisa eku fumeni ka yena, kutani Yehovha, Xikwembu xa yena, a va na yena, a n'wi kurisa ngopfu.
2Solomoni a vulavula ni Vaisraele hinkwavo ni tindhuna ta khume ra madzana, ni ta dzana, ni vaavanyisi, ni tihosana ta va Israele hinkwavo, ti ri tihosana ta tindlu ta vatatana; 3kutani Solomoni ni nhlengeletano hinkwayo, va ya exitsungeni lexi ngi xi ri eGibiyoni, hikuva Tabernakela ya nhlengeletano ya Xikwembu leyi Muxe, nandza wa Yehovha, a yi endleke emananga, a yi ri kona. 4Kambe Davhida a a tekile areka ya Xikwembu eKiriyata-Yeyarimi, ku yi yisa endhawini leyi a yi lunghiseleke, hikuva a a yi yimisele ntsonga eYerusalema. 5Loko yi ri alitari ya koporo leyi endliweke hi Besalele, n'wana Uri, n'wana Huru, a yi ri kona emahlweni ka yindlu ya Yehovha; kutani Solomoni ni nhlengeletano hinkwayo va lava Yehovha kona. 6Solomoni a humesa kona emahlweni ka Yehovha, tiholokosta ta khume ra madzana ealitarini ya koporo leyi ngi yi ri emahlweni ka Tabernakela ya nhlengeletano.
7Hi vusiku byebyo, Xikwembu xi humelela eka Solomoni, xi ku eka yena: “Kombela lexi u rhandzaka leswaku ndzi ku nyika xona!” 8Solomoni a ku eka Xikwembu: “U kombisile tintswalo letikulu eka tatana Davhida, kutani u ndzi vekile hosi ematshan'weni ya yena. 9Oho! Yehovha Xikwembu, sweswi, rito ra wena eka Davhida, tata wanga, a ri tiyisiwe, hikuva u ndzi vekile hosi ya tiko leri teleke kukotisa ntshuri wa misava. 10Sweswi, ndzi nyike vutlhari ni ku twisisa leswaku ndzi tiva ku huma ni ku nghena emahlweni ka tiko leri; hikuva i mani la nga tivaka ku avanyisa tiko leri teleke swonghasi, leri nga ra wena xana?”
11Xikwembu xi ku eka Solomoni: “Leswi u nga ni miehleketo leyi embilwini ya wena, u nga kombelanga rifuwo ni xuma, ni ku twala, ni rifu ra valala va wena, ni leswi u nga kombelangiki masiku yo tala, kambe u tikombelele vutlhari ni ku twisisa ku avanyisa tiko ranga leri ndzi ku vekeke hosi ya rona, 12u nyikiwile vutlhari ni ku twisisa; ndzi ta engeta ndzi ku nyika rifuwo ni xuma, ni ku twala, hilaha tihosi leti ngi ti ri emahlweni ka wena ti nga riki na swona, ni laha lava nga ta ku landza va nga ka va nga vi na swona.”
13Solomoni a suka emahlweni ka Tabernakela ya nhlengeletano leyi nga exitsungeni xa Gibiyoni, kutani a tlhelela eYerusalema. Kutani a fuma ehenhla ka Vaisraele.
14Solomoni a hlengeleta tigolonyi ni vakhandziyi va tihanci, kutani a va ni tigolonyi ta 1 400, ni vakhandziyi va tihanci va 12 000; a va veka emitini ya tigolonyi ni kusuhi ni hosi eYerusalema. 15Hosi yi endla leswaku silivhere ni nsuku swi ringanisiwa kukotisa maribye, ni mirhi ya kedari yi tala kukotisa mikuwa leyi milaka erivaleni.
16Solomoni a a lava tihanci ta yena eEgipta; a ti tisiwa hi mitlhambi: vaxavi va hosi a va ya xava ntlhambi hi mali leyi ringanisiweke. 17Va humesa golonyi eEgipta ni ku ri tlhandlukisa, hi tixikele ta 600, ni hanci hi tixikele ta 150; a va swi tisela ni tihosi hinkwato ta Vahiti, ni tihosi ta Siriya.
