Ta Uziya, hosi ya Yuda.
1Kavaloko tiko hinkwaro ra Yuda ri teka Uziya, la ngi a ri wa malembe ya 16, ri n'wi veka hosi ematshan'weni ya tata wa yena, Amasiya. 2Hi yena la pfuxeke Eloto, a wu tlherisela eku fumeni ka Yuda, loko hosi yi etlele ni vatata wa yona.
3Uziya a a ri wa malembe ya 16 loko a sungula ku fuma, kutani a fuma malembe ya 52 eYerusalema; vito ra mana wa yena a a ri Yekoliya, wa Yerusalema. 4A endla leswi lulameke emahlweni ka Yehovha hinkwaswo hilaha Amasiya, tata wa yena, a endleke hakona. 5A chivirika ku lava Xikwembu eku hanyeni ka Zakariya, munhu la nga twisisa swivono swa Xikwembu; emasikwini hinkwawo lawa a laveke Yehovha ha wona, Xikwembu xi n'wi katekisa. 6A huma nyimpi ku ya lwa ni Vafilista, a mbundzuxa rirhangu ra Gati, ni rirhangu ra Yabine, ni rirhangu ra Axidodo; kutani a aka miti etikweni ra Axidodo ni ra Vafilista. 7Xikwembu xi n'wi pfuna ku hlula Vafilista ni Maarabu, lava akeke eGuri-Baali ni Vamehuni. 8Vaamoni a va humesela Uziya ndzuvo, kutani ku twala ka yena ku ya fika etlhelo ra Egipta, hikuva a a kuma matimba lamakulu.
9Uziya a aka makhokholo eYerusalema, enyangweni ya yinhla, ni le nyangweni ya nkova ni le yinhleni, kutani a ma tiyisa. 10A aka makhokholo ni le mananga, a cela kona swihlovo leswo tala; hikuva a a ri ni mitlhambi leyo tala enkoveni ni le rivaleni, ni varimi, ni varimi va tivhinya etintshaveni ta Karmele, hikuva a a rhandza mitirho ya masimu.
11Uziya a a ri ni nyimpi leyi tshamaka yi huma eku lweni; a va huma hi mitlawa leyi hlayiweke, hilaha va tsariweke hakona hi Yeyiele, mutsari, na Maaseya, mulanguteri; yi fambisiwa hi Hananiya, yin'wana ya tindhuna ta hosi. 12Ntsengo hinkwawo wa tihosana ta tindlu ta vatatana ni wa tinhenha, a va ri 2 600. 13Ehansi ka vona a ku ri ni nyimpi ya vavanuna va 307 500 lava lwaka hi matimba lamakulu ku pfuna hosi loko yi lwa ni valala va yona. 14Uziya a lavela vanhu va nyimpi hinkwayo leyi, switlhangu, ni matlhari, ni swihuku, ni swisirhelelo swa swifuva, ni mavurha, ni maribye ya swipelupelu. 15A endla eYerusalema swilo leswi nga swipelupelu leswi lunghisiweke hi tintlhari, swi vekiwa emakhokholweni, ni le tinhleni, ku hoxa miseve ni maribye lamakulu. Ku twala ka yena ku fika ekule, hikuva a a pfuniwa hi mukhuva lowu hlamarisaka, a ko a kuma matimba.
16Kuteloko a kumile matimba, mbilu ya yena yi tikukumuxa yi ko yi n'wi lovisa; a dyohela Yehovha, Xikwembu xa yena, hi ku nghena etempeleni ya Yehovha ku hisa mirhi ealitarini ya mirhi ya risuna. 17Kavaloko Azariya, muprista, a nghena endzhaku ka yena, a ri ni vaprista va Yehovha va 80, ti ri tinhenha; 18kutani va arisa hosi Uziya, va ku eka yena: “A hi ntirho wa wena, Uziya, ku hisela Yehovha mirhi ya risuna! I ntirho wa vaprista, vana va Aroni, lava hlawuriweke ku hisa mirhi ya risuna. Huma evukwetsimelweni, hikuva u dyohile! Kutani ku nga ka ku nga vi ku dzuniseni ka wena emahlweni ka Yehovha Xikwembu.” 19Kavaloko Uziya a kariha, evokweni ra yena a a tamele ximbitana ku hisa mirhi; kutani kakuloko a karihela vaprista, nhlokonho wu humelela emombyeni wa yena, emahlweni ka vaprista, endlwini ya Yehovha, ekusuhi ni alitari ya mirhi ya risuna. 20Azariya, muprista lonkulu ni vaprista hinkwavo va n'wi languta, kutani maswivo, nhlokonho a wu ri emombyeni wa yena; va n'wi humesa hi ku hatlisa, na yena a angwetla a huma, hikuva Yehovha a a n'wi bile. 21Hosi Uziya a va wa nhlokonho ku fikela siku ra ku fa ka yena, a tshama endlwini ya vavabyi hi leswi ngi a ri wa nhlokonho, hikuva a siveriwile ku nghena endlwini ya Yehovha; kutani Yotamu, n'wana wa yena, a lerisa timhaka ta yindlu ya hosi, a ri karhi a avanyisa vanhu va tiko.
22Leswi seleke swa timhaka ta Uziya, leto sungula ni leta ku hetelela, swi tsariwile hi muprofeta Esaya, n'wana Amotsi. 23Uziya a etlela ni vatata wa yena, kutani va n'wi lahla ni vatata wa yena ensin'wini ya masirha ya tihosi, hikuva a va ku: “I wa nhlokonho.” Kutani Yotamu, n'wana wa yena, a fuma ematshan'weni ya yena.
