Ta Yehovha loko a tikombisa eka Solomoni.
1Kuteloko Solomoni a hetile ku khongela, ndzilo wu xika hi le tilweni, wu hisa holokosta ni magandzelo, kutani ku kwetsima ka Yehovha ku tata yindlu. 2Vaprista va tsandzeka ku nghena endlwini ya Yehovha, hikuva ku kwetsima ka Yehovha a ku tatile yindlu ya Yehovha. 3Kutani vana va Israele hinkwavo va vona ndzilo ni ku kwetsima ka Yehovha loko swi xika endlwini, kutani va korhama ehansi emaribyeni, va khinsama va dzunisa Yehovha, va ku: “Hikuva i wa vunene, hikuva tintswalo ta yena hi leti nga heriki.”
4Kutani hosi ni tiko hinkwaro va humesa magandzelo emahlweni ka Yehovha. 5Hosi Solomoni a humesa magandzelo ya tihomu ta 22 000, ni ya tinyimpfu ta 120 000. Hi mukhuva wolowo hosi ni tiko hinkwaro va khangula yindlu ya Xikwembu. 6Vaprista va yimile va tirha mitirho ya vona swin'we ni Valevhi, va ri ni timbila leti hlawuleriweke Yehovha, leti hosi Davhida a ti endleke ku dzunisa Yehovha, va ku: “Hikuva tintswalo ta yena hi leti nga heriki”; loko Davhida a dzunisa Yehovha ha tona; vaprista a va yimba tinanga va langutene na vona, kutani Vaisraele hinkwavo a va yimile.
7Solomoni a hlawula ndhawu exikarhi ka xivava lexi nga emahlweni ka yindlu ya Yehovha; hikuva a humesa kona tiholokosta ni mafurha ya magandzelo ya ku khensa, hikuva alitari ya koporo leyi Solomoni a yi endleke a yi ringananga tiholokosta, ni mihlengo, ni mafurha.
8Enkarhini wolowo Solomoni a endla nkhuvo hi masiku ya ntlhanu na mambirhi, a ri ni Vaisraele hinkwavo; vunyingi lebyikulu ngopfu byi hlengeletanile ku suka enyangweni ya Hamata, ku fika exinambyaneni xa Egipta. 9Hi siku ra ntlhanu na manharhu, va endla nhlengeletano leyi hlawuriweke; hikuva va khangurile alitari hi masiku ya ntlhanu na mambirhi, kutani va va ni nkhuvo hi masiku ya ntlhanu na mambirhi. 10Hi siku ra makume mambirhi na manharhu ra n'hweti ya ntlhanu na timbirhi, Solomoni a tlherisa tiko emitsongeni ya rona, va tsakile etimbilwini ta vona, hikuva Yehovha a a katekisile Davhida na Solomoni, na Israele, tiko ra yena.
11Solomoni a heta yindlu ya Yehovha ni yindlu ya vuhosi, a hetisisa hinkwaswo leswi Solomoni a a rhandzile ku swi endla endlwini ya Yehovha ni le ndlwini ya yena.
12Kutani Yehovha a humelela eka Solomoni nivusiku, a ku eka yena: “Ndzi yingisile ku khongela ka wena, kutani ndzi tihlawulele ndhawu leyi, yi va yindlu ya magandzelo. 13Kutakuloko ndzi pfala matilo, ku nga ni mpfula, ni loko ndzi lerisa tinjiya ku heta masimu, ndzi rhuma ni ntungu etikweni ranga, 14loko tiko ranga leri vito ra mina ri khongeriwaka ehenhla ka rona, ri titsongahata, loko va khongela, va lava mombo wa mina, va fularhela tindlela leto biha ta vona, ndzi ta va yingisa hi le tilweni, ndzi va rivalela swidyoho swa vona, ndzi horisa tiko ra vona. 15Sweswi, mahlo ya mina ma hanyanya, ni tindleve ta mina ti ta yingisa xikhongelo xa ndhawu leyi; 16hikuva sweswi, ndzi hlawurile, ndzi va ndzi kwetsimisa yindlu leyi, leswaku vito ra mina ri va kona hi masiku, ni leswaku mahlo ya mina ni mbilu ya mina yi va kona hilaha ku nga heriki. 17Na wena loko u famba emahlweni ka mina hilaha Davhida, tata wa wena, a fambeke hakona, ku endla hinkwaswo leswi ndzi ku leriseke swona, ni loko u hlayisa milawu ya mina ni ku lerisa ka mina, 18ndzi ta tiyisa xiluvelo xa vuhosi bya wena hilaha ndzi swi boheke hakona ni tata wa wena, Davhida, loko ndzi te: ‘U nga ka u nga pfumali, ni siku ni rin'we, munhu wa rixaka ra wena la fumaka Vaisraele.’ 19Kambe loko mi hundzuka, ni loko mi fularhela ku lerisa ka mina, ni milawu ya mina leyi ndzi yi vekeke emahlweni ka wena, kutani mi ya tirhela swikwembu swin'wana, mi khinsama emahlweni ka swona; 20ndzi ta mi tsuvula etikweni ra mina leri ndzi va nyikeke rona, ni yindlu leyi ndzi yi hlawuleleke vito ra mina, ndzi ta yi cukumeta ekule na mina, ndzi yi endla mitsheketo ni swihlekiso swa matiko hinkwawo. 21Loko yi ri yindlu leyi tlakukeke swonghasi mani na mani la nga ta hundza ekusuhi na yona, u ta hlamala a ku: ‘Xana Yehovha u endlele yini leswi, eka tiko leri ni ka yindlu leyi xana?’ ” 22Va ta hlamula, va ku: “Hi leswi va tshikeke Yehovha, Xikwembu xa vatata wa vona, loyi a va humeseke etikweni ra Egipta, va namarheleke swikwembu swin'wana, va khinsama emahlweni ka swona, va swi tirhela; hikwalaho ka swona u rhumele ehenhla ka vona makhombo lawa hinkwawo.”
