2 VAKORINTO 3

₁Xana hi ta tlhela hi sungula ku tiyimelela xana? Kumbe a hi faneri ku tilavela, kukota van'wana, mapapila lama hi yimelelaka eka n'wina, hambi ma ri lama humaka eka n'wina? ₂Hi n'wina mi nga mapapila ya hina, lama tsariweke etimbilwini ta hina, lama tiviwaka ni lama hlayiwaka hi vanhu hinkwavo; ₃hikuva ma vonakisa leswaku mi mapapila ya Kriste, lama lunghisiweke hi Mitirho ya hina, lama tsariweke, ku nga ri hi inki, kambe hi Moya wa Xikwembu lexi hanyisaka, lama tsariweke ku nga ri ematambheni ya maribye, kambe ematambheni ya nyama, leti nga timbilu ta n'wina.

₄Kunene hi ni ku tshemba loko tano eka Xikwembu ha Kriste; ₅swi nga ri leswaku hi tiva hi ri sweru ku ringanyeta mhaka leyi nga huma eka hina, ₆kambe matimba ya hina ma huma eka Xikwembu xi nga xona lexi hi nyikeke matimba ya ku tirhela ntwanano lowuntshwa, wu nga ri wa letere, kambe wu ri wa Moya; hikuva letere rona ra dlaya, kambe Moya wa hanyisa.

₇Kambe loko mitirho ya rifu leyi tsariweke hi maletere lama vatliweke emaribyeni, yi ri ni ku vonakala lokukulu, hi mukhuva wolowo vana va Israele va tsandzekile ku languta Muxe, hikwalaho ka ku vangama ka mombo wa yena, kasi a ku ri ku vangama loku ngi ku ri ni ku hela, ₈ntirho wa Moya wu ni ku kwetsima loku tlurisaka ngopfu. ₉Hikuva leswi mitirho ya ku avanyisiwa a yi ri ni ku kwetsima lokukulu, mitirho ya leswo lulama yi ta tlurisa hi ku kwetsima loku hlamarisaka. ₁₀Kunene, lexi ngi xi ri ni ku kwetsima eku rhangeni, a xa ha ri na ku kwetsima, loko xi xaxametiwa ni ku kwetsima loku hundzisaka ngopfu. ₁₁Hikuva lexi nga ta hela, loko xi ri ni ku kwetsima, ngopfungopfu, ku ta kwetsima lexi nga ta tshama.

₁₂Hikwalaho-ke, leswi hi nga ni ku langutela loko tano, hi vulavula hi ku tshemba lokukulu; ₁₃kutani a hi endli kukota Muxe la nga tifihla emahlweni hi xisirhelelo, leswaku vana va Israele va nga tshuki va languta makumu ya lexi helaka. ₁₄Kambe ku anakanya ka vona ku nonon'hwisiwile; hikuva ku fika sweswi, loko va hlaya timhaka ta ntwanano wa khale, xisirhelelo lexo xa ha tshamile, a xi nga suki, hikuva xi ngo susiwa hi Kriste ntsena. ₁₅Kambe ni sweswi, loko ku hlayiwa timhaka ta Muxe, xisirhelelo xa ha sirhela timbilu ta vona. ₁₆Kambe siku va nga ta hundzukela eka Hosi, xisirhelelo xi ta susiwa. ₁₇Hosi i Moya; kutani Moya wa Hosi laha wu nga kona ku tshunxeka ku kona. ₁₈Hina hinkwerhu lava hlalelaka hi xivonivoni ku kwetsima ka Hosi, hi mahlo lama nga sirheriwangiki, hi hundzukile xifaniso xi ri xin'we na yena, hi ku kwetsima loku yisaka eku kwetsimeni, ku nga hi Moya wa Hosi.