Ta Azariya (Uziya) hosi ya Yuda.
1Hi lembe ra 27 ra Yerobuwamu, hosi ya Israele, Azariya, n'wana Amasiya, hosi ya Yuda a sungula ku fuma. 2A a ri wa malembe ya 16 loko a vekiwa hosi, kutani a fuma hi malembe ya 52 eYerusalema. Vito ra mana wa yena a a ri Yekoliya, wa Yerusalema.
3A endla leswo lulama emahlweni ka Yehovha, hinkwaswo hilaha Amasiya, tata wa yena, a endleke hakona. 4Ntsena switsunga a swi susiwanga: tiko a ri tshama ri humesa magandzelo, ni ku hisa mirhi ya risuna eswitsungeni. 5Kutani Yehovha a rhumela hosi vuvabyi, a va ni nhlokonho ku fika siku ra ku fa ka yena. A a tshama endlwini ya vavabyi; Yotamu n'wana hosi, a lerisa endlwini ya hosi, a ri karhi a avanyisa vanhu va tiko.
6Leswi seleke swa timhaka ta Azariya, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda xana? 7Azariya a etlela ni vatata wa yena, kutani va n'wi lahla ni vatata wa yena emutini wa Davhida; Yotamu, n'wana wa yena, a fuma ematshan'weni ya yena.
Ta Zakariya, na Xalumi, na Menahema, na Pekahiya, na Peka, tihosi ta Israele.
8Hi lembe ra 38 ra Azariya, hosi ya Yuda, Zakariya, n'wana Yerobuwamu a sungula ku fuma etikweni ra Israele eSamariya; a fuma hi tin'hweti ta ntlhanu na yin'we. 9A endla leswo biha emahlweni ka Yehovha, kukotisa vatata wa yena; a nga fularhelanga swidyoho swa Yerobuwamu, n'wana Nebati, la nga dyohisa Israele. 10Xalumi, n'wana Yabexe a endla makungu ku n'wi xandzukela, kutani a n'wi tlhava emahlweni ka tiko, a n'wi dlaya; a fuma ematshan'weni ya yena.
11Timhaka leti seleke ta Zakariya, ti tsariwile ebukwini ya Tikronika ta tihosi ta Israele. 12Hi rona rito ra Yehovha leri a ri byeleke Yehu loko a ku: “Vana va wena va ta tshama exiluvelweni xa Israele, ku fika erixakeni ra vumune”; swi va tano.
13Xalumi, n'wana Yabexe, a sungula ku fuma hi lembe ra 39 ra Uziya, hosi ya Yuda. A fuma n'hweti yin'we eSamariya. 14Menahema, n'wana Gadi, a tlhandluka a suke eTirisa, a ta eSamariya, a tlhava Xalumi, n'wana Yabexe, eSamariya, a n'wi dlaya; a fuma ematshan'weni ya yena.
15Leswi seleke swa timhaka ta Xalumi, ni ku xandzuka loku a ku kaneleke, swi tsariwile ebukwini ya Tikronika ta tihosi ta Israele.
16Kutani Menahema a hlasela Tifisaka, ni hinkwavo lava ngi va ri ka wona ni tikwanyana ra wona, ku suka eTirisa hikuva a wu n'wi pfulelanga tinyangwa ta wona, a wu hlasela, kutani a boxa makhwiri ya vavasati hinkwavo lava ngi va ri ni tinyimba.
17Hi lembe ra 39 ra Azariya, hosi ya Yuda, Menahema, n'wana Gadi a sungula ku fuma etikweni ra Israele; a fuma khume ra malembe eSamariya. 18A endla leswo biha emahlweni ka Yehovha, a nga fularhelangi eku hanyeni hinkwako ka yena, ku dyoha ka Yerobuwamu, n'wana Nebati la nga dyohisa Israele. 19Pulu, hosi ya Asiriya a nghena etikweni ra Israele, kutani Menahema a nyika Pulu titalenta ta silivhere ta 1 000 leswaku a n'wi pfuna ku tiyisa vuhosi evokweni ra yena. 20Menahema a hlenga mali leyi etikweni ra Israele ku yi nyika hosi ya Asiriya; mufuwi un'wana ni un'wana a humesa tixikele ta ntlhanu wa makume; kutani hosi ya Asiriya, a tlhela a muka a nga ha hlwelangi etikweni ra Israele.
21Leswi seleke swa timhaka ta Menahema, ni hinkwaswo leswi a swi endleke a swi tsariwanga ebukwini ya Tikronika ta tihosi ta Israele xana? 22Menahema a etlela ni vatata wa yena kutani Pekahiya, n'wana wa yena, a fuma ematshan'weni ya yena.
23Hi lembe ra ntlhanu wa makume ra Azariya, hosi ya Yuda, Pekahiya, n'wana Menahema, a sungula ku fuma etikweni ra Israele; a fuma malembe mambirhi eSamariya. 24A endla leswo biha emahlweni ka Yehovha; a nga fularhelanga ku dyoha ka Yerobuwamu, n'wana Nebati, la nga dyohisa Israele. 25Peka, n'wana Remaliya, ndhuna ya yena, a n'wi xandzukela, a n'wi tlhava eSamariya endlwini ya hosi, swin'we na Arigobi, na Ariye; vavanuna va ntlhanu wa makume va Giliyadi a va ri na yena; a n'wi dlayisa sweswo, a fuma ematshan'weni ya yena.
26Timhaka leti seleke ta Pekahiya, ni hinkwaswo leswi a swi endleke, swi tsariwile ebukwini ya Tikronika ta tihosi ta Israele.
27Hi lembe ra 52 ra Azariya, hosi ya Yuda, Peka, n'wana Remaliya, a sungula ku fuma etikweni ra Israele a fuma hi malembe ya makume mambirhi eSamariya. 28A endla leswo biha emahlweni ka Yehovha, a nga fularhelanga swidyoho swa Yerobuwamu n'wana Nebati, la nga dyohisa Israele. 29Emasikwini ya Peka, hosi ya Israele, Tiglata-Pilezere, hosi ya Asiriya, a ta, kutani a teka Iyoni, na Avele-Beta-Maaka, na Yanowaka, na Kedexe, na Hasoro, na Giliyadi, na Galeliya, ni tiko hinkwaro ra Neftali, kutani a fambisa vaaki va kona eAsiriya. 30Kutani Hoxeya, n'wana Ela, a xandzukela Peka, n'wana Remaliya, a n'wi tlhava, a n'wi dlaya; a fuma ematshan'weni ya yena, hi lembe ra makume mambirhi ra Yotamu, n'wana Uziya. 31Leswi seleke swa timhaka ta Peka, ni hinkwaswo leswi a swi endleke, swi tsariwile ebukwini ya Tikronika ta tihosi ta Israele.
Ta Yotamu, hosi ya Yuda.
32Hi lembe ra vumbirhi ra Peka, n'wana Remaliya, hosi ya Israele, Yotamu, n'wana Uziya, hosi ya Yuda, a sungula ku fuma. 33A a ri wa malembe ya 25 loko a sungula ku fuma, kutani a fuma malembe ya 16 eYerusalema; vito ra mana wa yena a a ri Yeruxa n'wana Sadoki. 34A endla leswo lulama emahlweni ka Yehovha; a endla hinkwaswo hilaha Uziya, tata wa yena, a endleke hakona. 35Ntsena switsunga a swi susiwanga; tiko ri tshama ri humesa magandzelo, ni ku hisa mirhi ya risuna eswitsungeni. Hi yena la nga aka nyangwa ya le henhla ya yindlu ya Yehovha.
36Leswi seleke swa timhaka ta Yotamu, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda xana?
37Emikarhini yoleyo, Yehovha a sungula ku rhumela tiko ra Yuda ku ri pfuka, Resini, hosi ya Siriya, na Peka, n'wana Remaliya.
38Yotamu a etlela ni vatata wa yena, a lahliwa ni vatata wa yena emutini wa Davhida tata wa yena; kutani Akazi, n'wana wa yena, a fuma ematshan'weni ya yena.
