Ta Yosiya, hosi ya Yuda.
1Yosiya a a ri wa malembe ya ntlhanu na manharhu loko a sungula ku fuma, kutani a fuma malembe ya 31, eYerusalema. Vito ra mana wa yena a a ri Yedida, n'wana Adaya, wa Bosikata. 2A endla leswo lulama emahlweni ka Yehovha, a famba endleleni hinkwayo ya Davhida, tata wa yena, a nga yi hambukanga, hambi exineneni, hambi eximatsini.
Buku ya nawu yi kumiwa etempeleni.
3Hi lembe ra 18 ra hosi Yosiya, hosi yi rhuma Xafani, mutsari, n'wana Asaliya, n'wana Mexulama, endlwini ya Yehovha, a ku eka yena: 4“Tlandluka eka Hilkiya, muprista lonkulu, a ta humesa mali hinkwayo leyi tisiweke endlwini ya Yehovha, leyi hlengiweke ka vanhu va tiko hi valanguteri va nyangwa, 5yi ta vekiwa emavokweni ya lava khomaka ntirho, va nga valanguteri va yindlu ya Yehovha, va ta yi nyika lava tirhaka ntirho endlwini ya Yehovha ku siva timfa ta yindlu, 6va ri vavatli, ni vatirhi, ni vaaki va maribye; ni ku xava mirhi, ni maribye lama vatliweke ku lunghisa yindlu. 7Ntsena va nga vutisiwi nchumu hi mali leyi vekiwaka emavokweni ya vona, hikuva va tirha hi ku tshembeka.”
8Kutani Hilkiya, muprista lonkulu, a ku eka Xafani, mutsari: “Ndzi kumile buku ya nawu endlwini ya Yehovha.” Hilkiya a nyika Xafani buku, kutani a yi hlaya. 9Kavaloko Xafani, mutsari, a ya eka hosi, a tivisa hosi, a ku: “Malandza ya wena ma hlengeletile mali leyi ngi yi ri Ndlwini, va yi vekile emavokweni ya lava khomaka ntirho, va nga valanguteri va yindlu ya Yehovha.” 10Xafani, mutsari, a engeta a ku eka hosi: “Hilkiya, muprista, u ndzi nyikile buku.” Kutani Xafani a yi hlaya emahlweni ka hosi. 11Hosi, kuteloko yi twile marito ya buku ya nawu, yi handzula tinguvu ta yona. 12Kutani hosi yi lerisa Hilkiya, muprista, na Ahikama, n'wana Xafani, na Akibora, n'wana Mikaya, na Xafani, mutsari, na Asaya, nandza wa hosi, yi ku: 13“Yanani, mi ndzi vutisela Yehovha, mi vutisela ni tiko ni va Yuda hinkwavo hikwalaho ka buku leyi kumiweke; hikuva vukari bya Yehovha lebyi hi pfurheleke byikulu, hikuva vatata wa hina a va yingisangi marito ya buku leyi, ku endla hinkwaswo hilaha hi tsaleriweke hakona eka yona.”
14Kavaloko Hilkiya, muprista, na Ahikama, na Akibora na Xafani, na Asaya, va ya ka Hulida, muprofeta, nsati wa Xalumi, n'wana Tikivha, n'wana Harihasi, muhlayisi wa tinguvu, a a akile eYerusalema, etlhelweni lerintshwa ra muti, va vulavula na yena. 15Kutani a ku eka vona: “Yehovha, Xikwembu xa Israele, xi ku: ‘Byelani munhu loyi a mi rhumeke eka mina, mi ku: Yehovha u vurisa, a ku: 16Ndzi ta tisa khombo endhawini leyi ni le henhla ka vaaki va yona, hi marito hinkwawo ya buku leyi hosi ya Yuda yi yi hlayeke. 17Hikuva va ndzi tshikile va hisele swikwembu swin'wana mirhi ya risuna ku ndzi pfuka hi mitirho hinkwayo ya mavoko ya vona, vukari bya mina byi pfurhele ndhawu leyi, byi nga ka byi nga timeki. 18Loko yi ri hosi ya Yuda leyi mi rhumeke ku vutisa Yehovha, mi ta n'wi byela, mi ku: Yehovha, Xikwembu xa Israele xi vurisa sweswo ehenhla ka marito lawa u ma tweke, xi ku: 19Leswi mbilu ya wena yi oloveke, kutani u titsongahatile emahlweni ka Yehovha loko u yingisile leswi ndzi swi vuleke ehenhla ka ndhawu leyi, ni le henhla ka vaaki va yona, leswaku va ta herisiwa ni ku rhukaniwa, kutani leswi u handzuleke tinguvu ta wena, u ko u rila emahlweni ka mina, na mina ndzi yingisile, ku vula Yehovha. 20Hikwalaho, ndzi ta ku amukela eka vatata wa wena, u ta amukeriwa hi ku rhula esirheni ra wena; mahlo ya wena ma nga ka ma nga voni makhombo hinkwawo lawa ndzi ma tiselaka ndhawu leyi.’ ” Kutani va yisa rito leri eka hosi.
