2 PETRO 2

₁Na vona vafundhisi va mavunwa a va ri kona etikweni, kukotisa leswi vafundhisi va mavunwa va nga ta va kona exikarhi ka n'wina va nghenisa hitlhelo tidyondzo leti onhaka, kutani hi ku landzula Hosi leyi va kutsuleke, va ta tikokela ehenhla ka vona, ku lota loku nga hlweriki. ₂Kutani lavo tala va ta va landzela eku lahlekeni ka vona, lava ndlela ya ntiyiso yi nga ta soriwa hikwalaho ka vona; ₃kutani leswi va navelaka ku fuwa, va ta bindzula ha n'wina hi ku vulavula loku kanganyisaka, volavo, ku avanyisa ka vona ka khale ku nga lolohiki, ni ku lova ka vona ku nga etleriki.

₄Hikuva Xikwembu, loko xi nga tsetselelanga tintsumi leti nga dyoha, Kambe xi ti nyiketa etimpecaneni ta munyama, ti hoxiwa etiheleni; kutani a ti nyiketa leswaku ti hlayiseriwa ku avanyisiwa; ₅ni loko xi nga tsetselelangi tiko ra khale, kambe xi hlayisa Nowa, yena wa ntlhanu na vunharhu, mudyondzisi wa ku lulama, hi nkarhi xi tisaka khombo ra ndhambi ehenhla ka misava ya vasandzi; ₆ni loko xi avanyisile miti ya Sodoma na Gomora hi ku yi pfilunganya, ni ku yi hundzula mikuma, leswaku lava lavaka ku sandza va vekeriwa xitsundzuxo; ₇ni loko xi ponisile Lota, wanuna la lulameke, la tweke ku vaviseka hikwalaho ka mikhuva ya manyala ya vanhu va ku homboloka; ₈(hikuva wanuna yeloyi wo lulama la akeke exikarhi ka vona, a a xanisiwa emoyeni wa yena wo lulama hi masiku hinkwawo, hikwalaho ka mitirho yo homboloka ya vona, leyi a nga yi vona, ni ku yi twa): ₉naswona, Hosi yi tiva ku kutsula emiringweni lava nga ni xichavo, ni ku hlayisela lavo homboloka ku biwa hi siku ra ku avanyisa; ₁₀ngopfungopfu lava landzaka nyama eku naveleni ka thyaka, va sandza vuhosi, va tiarisa, va tikurisa, va nga chavi ku sola leswi kwetsimeke; ₁₁kasi tintsumi, hambi ti va tlula hi matimba ni vukulu, a ti swi avanyisi hi ku avanyisa loku sandzaka emahlweni ka Hosi.

₁₂Kambe valavo, kukotisa swiharhi leswi pfumalaka ku twisisa, leswi nga tswariwa hi mukhuva wa misava ku ta khomiwa ni ku lova; va sandza leswi va nga swi tiviki, kutani va ta lova eku onhakeni ka vona, kambe va ta amukela hakelo ya ku homboloka ka vona; ₁₃va ringanisa leswaku ku tsaka; ku hanya emanyaleni hi masiku hinkwawo, va tele swivati ni swisandzu, va titsakela hi ku xisa ka vona, loko va ri karhi va dya na n'wina. ₁₄Mahlo ya vona ma tele vuoswi a ma rhuteri ku dyoha; va rhiya mimoya leyi tsekatsekaka, va ni timbilu leti tlharihelaka makwanga, i vana va ndzhukano. ₁₅Va lahlekile hi ku hambuka ndlela leyo lulama, va landza ndlela ya Balaama n'wana Beyori, la rhandzeke hakelo leyo homboloka, kambe a tshinyiwa eku dyoheni ka yena: ₁₆xifuwo lexi nga riki na ku vulavula, xi laya hi rito leri nga ra munhu, rihuhu ra muprofeta loyi. ₁₇Valavo, i swihlovo leswi nga riki na mati, mapapa lama susumetiwaka hi xidzedze; kambe munyama lowu chavisaka hi ntima, wu hlayiseriwa vona hilaha ku nga heriki.

₁₈Hikuva hi ku vulavula timhaka ta manyunyu, ni ta hava, va rhiya hi ku navela ka nyama ni manyala, vanhu lava ha ku fularhelaka lava hanyaka eku hungukeni. ₁₉Va va tshembisa ku tshunxeka, kasi vona i makhumbi ya ku bola, hikuva munhu u hundzuka khumbi ra loyi a nga hluriwa hi yena.

₂₀Hikuva loko va fularhele thyaka ra misava hi ku tiva Yesu Kriste Hosi ni Mulondzovoti wa hina, kutani va tlhela va khomiwa ha rona, timhaka ta vona ta makumu ti bihile ku tlula leto rhanga. ₂₁Hikuva a swi sasekile eka vona loko va nga tivanga ndlela ya ku lulama, ku nga ri ku hambuka nawu lowu hlawuriweke, lowu va wu nyikiweke lowu va wu tiveke. ₂₂Kambe va humeleriwe hi mhaka ya xivuriso lexinene lexi nge: Mbyana yi tlhelele emahlantini ya yona, ni nguluve, loko yi hlantswiwile yi tlhela yi puluvundza endzhopeni.