Ta Davhida loko a dyoha na Batixeba.
1Kutani hi lembe leri tlhandlamaka, enkarhini lowu tihosi ti humaka nyimpi, Davhida a rhuma Yowabu, ni malandza ya yena, ni Vaisraele hinkwavo, va ya hlasela tiko ra vana va Amoni, kutani va rhendzela Rhaba; kambe Davhida a sala eYerusalema. 2Siku rin'wana, nimadyambu Davhida a pfuka ebyetlelweni bya yena, a fambafamba elwangwini ra yindlu ya hosi, kutani a vona a ri elwangwini wansati la hlambaka; wansati loyi, a a sasekile ngopfu. 3Kutani Davhida a rhuma va ya vutisa ta wansati loyi kutani va ku eka yena: “A hi Batixeba n'wana Eliyama, nsati wa Uriya, munhu wa ka Hiti xana?” 4Kavaloko Davhida a rhuma tintsumi, ku ya n'wi teka; kutani a ta eka yena, a etlela na yena (kambe wansati a a tibasisile ethyakeni ra yena); kutani a tlhelela endlwini ya yena. 5Kutani wansati loyi, a tika nyimba; kutani a rhuma eka Davhida, a n'wi tivisa, a ku: “Ndzi xurhile nyimba.” 6Kavaloko Davhida a rhuma eka Yowabu, a ku: “Ndzi rhumele Uriya wa Muhiti.” Sweswo Yowabu a rhuma Uri eka Davhida. 7Uriya a ta eka yena, kutani Davhida a n'wi vutisa timhaka ta Yowabu, ni ta tiko, ni ta nyimpi. 8Davhida a ku eka Uriya: “Xikela endlwini ya wena, u ya hlamba milenge,” kutani Uriya a huma endlwini ya hosi, kambe tinyiko ta hosi ti huma endzhaku ka yena. 9Kutani Uriya a etlela enyangweni ya yindlu ya hosi ni malandza hinkwawo ya hosi ya yena; kambe a nga xikelanga endlwini ya yena. 10Kavaloko va ya byela Davhida, va ku: “Uriya a nga xikelanga endlwini yakwe.” Kutani Davhida a ku eka Uriya: “A ku vuyangi erendzweni xana? A ku xikelanga ha yini endlwini ya wena-ke?” 11Uriya a ku eka Davhida: “Areka na Israele na Yuda va tshame emitsongeni, ni n'wini wa mina Yowabu ni malandza ya hosi yanga va govile enhoveni, xana mina ndzi ta nghena endlwini ya mina ku ta dya ni ku nwa, ni ku etlela ni nsati wa mina xana? Wa hanya, ni moya wa wena wu hanya, ndzi nga ka ndzi nga endli xilo lexo tano!” 12Kutani Davhida a ku eka Uriya: “Tshama la kambe namuntlha, mundzuku ndzi ta ku tlherisela.” Sweswo Uriya a xwa eYerusalema, siku lero ni leri tlhandlamaka. 13Kavaloko Davhida a rhuma ku n'wi vita, leswaku a dya a nwa emahlweni ka yena, kutani Davhida a n'wi pyopyisa; kambe nimadyambu, a huma ku ya etlela esangwini ra yena ni malandza ya hosi ya yena, a nga xikelanga endlwini ya yena.
14Kambe nimixo, Davhida a tsalela Yowabu papila, a ri rhuma hi voko ra Uriya. 15A tsarile epapileni leri, a ku: “Vekani Uriya laha nyimpi yi hisaka kona, mi n'wi sukela kona leswaku a tlhaviwa, a fa.” 16Kuteloko Yowabu a rhendzerile muti, a veka Uriya laha a tivaka leswaku tinhenha ti ta va kona. 17Kutani vanhu va muti va huma, va lwa na Yowabu, kutani van'wana va tiko va malandza ya Davhida va dlawa, na yena Uriya wa ka Hiti a dlawa. 18Kutani Yowabu a rhuma vanhu va ya vikela Davhida mahungu hinkwawo ya ku lwa, kambe a byela ntsumi, a ku: 19“Kutakuloko u hetile ku byela hosi timhaka ta ku lwa, 20loko hosi yi kariha, yi ku eka wena: ‘Mi tshinelele yini muti ku lwa xana? A mi swi tivi leswaku va balesela va ri erirhangwini xana? 21I mani la dlayeke Abimeleke n'wana Yerubexete xana? A hi wansati la n'wi hoxeke hi tamba ra ku sila, a ri erirhangwini, kutani a fa eTebese? Mi tshinelele rirhangu ha yini xana?’ Kutani u ta ku eka yena: ‘Nandza wa wena Uriya wa ka Hiti u file na yena.’ ”
22Ntsumi yi suka; kuteloko yi fikile, yi ya vikela Davhida hinkwaswo leswi Yowabu a n'wi rhumeleke swona. 23Ntsumi yi ku eka Davhida: “Vanhu lava va humile hi matimba ku lwa na hina, hi hlanganile na vona emasin'wini, kutani hi va hlongorisa ku fika enyangweni, 24kambe lava copaka hi vurha va copa malandza ya wena va ri ehenhla ka rirhangu kutani malandza layo tala ya hosi ma file, ni nandza wa wena Uriya wa ka Hiti u file, na yena.” 25Kutani Davhida a ku eka ntsumi: “U ta vurisa sweswo eka Yowabu, u ku: ‘Mhaka leyi yi nga tshuki yi biha emahlweni ka wena, hikuva tlhari ri dlaya hala ni hala: tiyisa ku lwa ni muti lowu, u wu hlanhla.’ Sweswo u ta n'wi tiyisa.”
26Nsati wa Uriya a tiva leswaku nuna wa yena u file, kutani a rila nuna wa yena; 27kuteloko nkosi wu hundzile, Davhida a rhuma va ya n'wi vita kutani a n'wi rhurhela endlwini ya yena, a va nsati wa yena, kutani a n'wi velekela n'wana wa wanuna. Kambe mhaka leyi Davhida a yi endleke, yi biha emahlweni ka Yehovha.
