2 SAMIELE 17

₁Ahitofele a ku eka Abixalomu: “Ndzi pfumelele ku ya hlawula vavanuna va 12 000. Kutani ndzi ta pfuka ndzi landzela Davhida hi vusiku lebyi; ₂ndzi ta n'wi kuma a ha karhele, ni mavoko ya yena ma ha tsanile; ndzi ta n'wi chavisa, kutani tiko hinkwaro leri nga na yena ri ta baleka. ₃Ndzi ta dlaya hosi ntsena, kutani ndzi ta ku vuyisela tiko hinkwaro; ku fa ka wanuna loyi u n'wi lavaka ku ta tlherisa hinkwavo; tiko hinkwaro ri ta rhula.” ₄Rito leri, ri tsakisa Abixalomu ni vakulukumba hinkwavo va Israele.

₅Kambe Abixalomu a ku: “Vitanani na yena Huxayi Muariki, hi ta yingisa leswi a nga ta swi vula na yena.” ₆Kavaloko Huxayi a ta eka Abixalomu, kutani Abixalomu a ku eka yena: “Ahitofele u vurise sweswo; xana hi ta endla leswi a swi vuleke xana? Loko swi nga ri tano, vulavula wena!” ₇Huxayi a ku eka Abixalomu: “Namuntlha makungu ya Ahitofele a ma sasekanga.” ₈Kutani Huxayi a ku: “Wa tiva vunhenha bya tata wa wena ni bya vanhu va yena, va kariha kukotisa bere leyi lahlekeriweke hi vana va yona emananga. Kambe tata wa wena i wanuna wa nyimpi, kutani a nga ka a nga tshami ni tiko nivusiku. ₉Waswivo, u tumberile sweswi ekheleni rin'wana, kumbe endhawini yin'wana; kutani kutakuloko van'wana va dlayiwa eku sunguleni, mahungu ma ta hangalaka kutani va ta ku: ‘Tiko leri landzaka Abixalomu ra hluriwa.’ ₁₀Kutani hambi la tiyeke ku tlurisa, ni lowa mbilu leyi kotisaka ya nghala, u ta chava; hikuva Vaisraele hinkwavo va tiva leswaku tata wa wena i wanuna wa matimba ni leswaku u landziwa hi tinhenha. ₁₁Hikwalaho ndzi vula leswaku Vaisraele hinkwavo va hlengeletana eka wena, ku suka eDani ku fika eBerexeba, byi ri vunyingi lebyi fanaka ni sava leri nga eribuwini ra lwandle; kavaloko u ta famba u ri wena eku lweni. ₁₂Hi ta n'wi kuma kwihi ni kwihi laha a nga ta va kona, kutani hi ta n'wi wela ehenhla kukotisa mberha loko yi wela misava, ku nga baleki munhu ni un'we, hambi a ri yena, hambi va ri lava fambaka na yena. ₁₃Kungakuloko a ya chavela emutini wun'wana, Vaisraele hinkwavo va ta tisa tingoti emutini lowu, hi wu koka enambyeni, ku nga sali ni ribye rin'we eka wona.” ₁₄Abixalomu ni vanhu hinkwavo va Israele va ku: “Makungu ya Huxayi, Muariki, ma tlula hi vutlhari makungu ya Ahitofele.” Kambe Yehovha a a kanerile ku onha makungu lamanene ya Ahitofele, leswaku khombo ri tela Abixalomu.

₁₅Huxayi a ku eka Sadoki ni le ka Abiyatara, vaprista: “Ahitofele u vurile makungu ya ku karhi ni ku karhi eka Abixalomu ni ka vakulukumba va Israele, na mina ndzi vurile makungu ya ku karhi. ₁₆Sweswi, rhumani hi ku hatlisa mi tivisa Davhida, mi ku: ‘U nga tshami nivusiku ekusuhi ni mahlaluko ya mananga, kambe famba emahlweni, leswaku ku nga lovi hosi ni tiko hinkwaro leri ngi ri ri na yona.’ ” ₁₇Yonatani na Ahimaasi a va yimile eEni-Rogele, kutani nandza wa wansati a ta va byela timhaka leswaku va ya tivisa hosi Davhida; hikuva a va chava ku tikombisa emutini. ₁₈Kambe jaha ri va vona kutani ri ya vikela Abixalomu. Vona lavambirhi va suka hi ku hatlisa, va ya fika endlwini ya munhu wa Bahurimi, loyi ngi a ri ni xihlovo xa ku enta emutini wa yena, kutani va ngirimela eka xona. ₁₉Kutani wansati a teka nkumba a wu andlala enyangweni ya xihlovo, a aneka mavele lama kandziweke ehenhla ka wona, leswaku ku nga vonaki nchumu. ₂₀Malandza ya Abixalomu ma ta eka wansati endlwini ma ku: “Va Ahimaasi na Yonatani va kwihi xana?” Wansati a ku eka vona: “Va perile xinambyana.” Kutani va va lava, kambe va nga va kumi kutani va tlhelela eYerusalema. ₂₁Kuteloko va sukile, Ahimaasi na Yonatani va huma exihlobyeni, va ya byela hosi Davhida mahungu, va ku eka Davhida: “Pfukani, mi hatlisa ku pela nambu, hikuva hi wona makungu ya Ahitofele ehenhla ka n'wina.” ₂₂Kavaloko Davhida ni tiko hinkwaro leri ngi ri ri na yena va pfuka, va pela Yordani; loko ri xa nimixo, a ku nga salanga na un'we la nga pelangiki Yordani.

₂₃Kuteloko Ahitofele a vonile leswaku makungu ya yena a ma yingisiwanga, a pana mbhongolo ya yena, a pfuka a famba karikwavo, emutini wa yena, kutani kuteloko a lerisile va yindlu ya yena timhaka ta yena, a tisunga; sweswo a fa, a lahliwa esirheni ra tata wa yena.

₂₄Davhida a fika eMahanayimi kutani Abixalomu a pela Yordani, ni vanhu hinkwavo va Israele lava ngi va ri na yena. ₂₅Abixalomu a a vekile Amasa leswaku a va ndhuna ya nyimpi ematshan'weni ya Yowabu. Amasa a a ri n'wana wa wanuna la thyiweke Yitira, wa Muisraele, la nga ya ka Abigayele, n'wana Nahaxi, makwa Seruya, mana wa Yowabu. ₂₆Kutani Vaisraele na Abixalomu va gova etikweni ra Giliyadi. ₂₇Kakuloko Davhida a fika eMahanayimi, Xobi, n'wana Nahaxi wa Rhaba, wa vana va Amoni, na Makiri n'wana Amiele, wa Lo-Debara, na Barizilayi Mugiliyadi wa Rogelimi, ₂₈va tisa masangu ni mikambana, ni timbita ta vumba, ni koro, ni barley ni mapa, ni mavele lama oxiweke ni tinyawa, ni tindluwa ni mavele man'wana lama oxiweke, ₂₉ni vulombe, ni mafurha ya ntswamba, ni tinyimpfu, ni machizi ya tihomu, va swi tisela Davhida ni tiko leri ngi ri ri na yena, va ta dya, hikuva a va te: “Tiko ri ni ndlala, va karhele va ni torha emananga.”