Ta ku yisiwa ka areka eYerusalema.
1Davhida a hlengeleta kambe tinhenha hinkwato ta Israele va ri vavanuna va 30 000: 2Kutani Davhida a pfuka ni tiko hinkwaro leri ngi ri ri na yena, a suka eBaale-Yuda ku heleketa areka ya Xikwembu, leyi ku khongeriwaka ehenhla ka yona vito ra Yehovha wa mavandla, la tshamaka exikarhi ka tikerubu ehenhla ka yona. 3Va veka areka ya Xikwembu egolonyini leyintshwa, va yi tekile endlwini ya Abinadaba, leyi nga exitsungeni; kutani Uza na Ahiyo, vana va Abinadaba, a va fambisa golonyi leyintshwa. 4Sweswo va yi teka endlwini ya Abinadaba leyi nga exitsungeni swin'we ni areka ya Xikwembu, kutani Ahiyo a a famba emahlweni ka areka; 5Davhida ni yindlu hinkwayo ya Israele, a va yimba emahlweni ka Yehovha hi tinxaka leto tala ta timbila, ta murhi wa kipresi, ni tiharipa, ni magupu, ni madzandzana, ni tinanga, ni swiphambati. 6Kakuloko va fika exivuyeni xa Nakono, Uza a tshambuluta voko! A khoma areka ya Xikwembu, hikuva tihomu a ti lava ku yi wisa; 7kutani vukari bya Yehovha byi pfurhela Uza, kutani Xikwembu xi n'wi dlaya kona hikuva a nga chavanga; sweswo a fa ekusuhi ni areka ya Xikwembu. 8Davhida a twa ku vaviseka hikuva Yehovha a bile Uza hi ku avanyisa loku, kutani a thya ndhawu leyi Perese-Uza (ku petluka ka Uza), ku fika ni namuntlha. 9Kutani Davhida a chava Yehovha siku leri, a ku: “Areka ya Yehovha yi ta nghenisa ku yini endlwini ya mina xana?” 10Sweswo Davhida a nga rhandzanga ku rhurhela areka ya Yehovha endlwini ya yena, emutini wa Davhida, kutani Davhida a yi hambukisa endlwini ya Obede-Edomu wa Gati; 11areka ya Yehovha yi tshama tin'hweti tinharhu endlwini ya Obede-Edomu, wa Gati; kavaloko Yehovha a katekisa Obede-Edomu ni yindlu hinkwayo ya yena.
12Kutani va ya byela hosi Davhida, va ku: “Yehovha u katekisile yindlu ya Obede-Edomu ni hinkwaswo leswi nga swa yena hikwalaho ka areka ya Xikwembu.” Kavaloko Davhida a ya kona, a tlhandlukisa areka ya Xikwembu hi ku tsaka emutini wa Davhida, yi susiwa endlwini ya Obede-Edomu. 13Kutani lava rhwaleke areka ya Yehovha, kuteloko va fambile mpfhuka wa mikondzo ya ntlhanu na wun'we va tlhava nkunzi ni rhole leri noneke; 14kutani Davhida a cina hi matimba hinkwawo ya yena emahlweni ka Yehovha, kambe Davhida a a ambarile efodi ya ntsembyana.
15Davhida ni yindlu ya Israele hinkwayo, a va tlhandlukisa areka ya Yehovha hi ku huwelela ni ku yimba tinanga. 16Kakuloko areka ya Yehovha yi nghena emutini wa Davhida, Mikala, n'wana Sawulo, a languta hi fasitere, kutani a vona hosi Davhida loko a ri karhi a cina hi matimba emahlweni ka Yehovha; kutani a n'wi sandza embilwini ya yena. 17Kambe va tisa areka ya Yehovha, kutani va yi veka ekaya ka yona, entsongeni lowu Davhida a wu lunghiseleke yona; kutani Davhida a humesa tiholokosta ni magandzelo ya ku khensa, emahlweni ka Yehovha. 18Kuteloko a hetile ku humesa tiholokosta ni magandzelo ya ku khensa, a katekisa tiko hi vito ra Yehovha wa mavandla; 19kutani a avela swakudya eka tiko hinkwaro vunyingi hinkwabyo bya Israele va ri vavasati ni vavanuna; a nyika un'wana ni un'wana xinkwa xin'we, ni nhluvi wa nyama, ni buwu ra mihandzu ya vhinya. Kavaloko tiko hinkwaro ri muka, un'wana ni un'wana endlwini ya yena.
20Na yena Davhida a muka ku ya katekisa yindlu ya yena; kutani Mikala, n'wana Sawulo, a huma ku ya hlangana na Davhida, a ku: “Hosi ya Israele yi tidzunisile swonghasi namuntlha, yi tifunungula namuntlha emahlweni ka malandza ya xisati ya malandza ya yona, hi laha munhu wa hava a nga endlaka hakona!” 21Kutani Davhida a ku eka Mikala: “A ku ri emahlweni ka Yehovha la ndzi hlawuleke ematshan'weni ya tata wa wena ni yindlu ya yena hinkwayo, ku ndzi veka mufambisi wa tiko ra Yehovha, ni wa Israele! 22Ndzi ta cina kambe emahlweni ka Yehovha, ndzi ta titsongahata ni ku tlurisa, ndzi ta tsongahatiwa emahlweni ya mina kambe emahlweni ya malandza ya xisati lawa u ma vuleke ndzi ta dzunisiwa.” 23Kutani Mikala, n'wana Sawulo, a nga ha velekanga vana ku fika siku ra ku fa ka yena.
